ՄԱՐԶԱԿԱՆ՝ ՓԵՏՐՈՒԱՐ Բ./2018

0

ՏԵՂԱԿԱՆ

Պետիկ Մահսերէճեան Յաջող Մասնակցութիւն Բերաւ Սուրիոյ Հաւաքականին

ՀՄԸՄ-ի պասքեթի տղոց խումբի խաղցող, 2002-ի ծնունդ Պետիկ Մահսերէճեան անցեալ ամսուան աւարտին իր մասնակցութիւնը բերաւ Սուրիոյ պասքեթի պատանեկան հաւաքականի ուսումնամարզական  մրցումին, որ տեղի ունեցաւ Պելառուսիոյ մէջ: Սուրիոյ հաւաքականը բարեկամական մրցում մը ունեցաւ հիւրընկալ կազմին դէմ: Մրցումին մասնակցեցաւ նաեւ Պետիկը՝ որպէս խմբապետ եւ փայլուն խաղարկութեամբ հանդէս եկաւ: Աւարտին ան արժանացաւ պատասխանատու կազմի գնահատական մետալին: Աւելցնենք, որ Պետիկ այս տարի մաս կը կազմէ նաեւ ՀՄԸՄ-ի պասքեթի տղոց առաջին խումբին:

 

ՄԻՋԱԶԳԱՅԻՆ

Ծանօթացում Ռուսիա 2018-ի Մասնակից Հաւաքականներու Պատմականին «ԹԻՒ – 9»

ՄԱՐՕՔ

Մարօքի ֆութպոլի պատմութիւնը սկսաւ 1956-ին: Ան կրցաւ իր յաջող դիրքը գրաւել ափրիկէի կազմերուն մէջ: Պատմութեան ընթացքին Մարօք յաջողեցաւ չորս անգամ իր մասնակցութիւնը բերել համաշխարհային ֆութպոլի մրցաշարքին 1970,1986,1994 եւ1998 թուականներուն: Միջազգային մակարդակով իր առաջին մրցումը կատարեց Իրաքի կազմին դէմ: Մրցումը աւարտեցաւ 3 – 3 հաւասար արդիւնքով: Ափրիկէի մրցաշարքին Մարօք իր մասնակցութիւնը բերաւ 17 անգամ, բայց ախոյեանութիւնը վայելեց միայն մէկ անգամ: Հաւաքականի պաշտօնական տարազին գոյնը կարմիրն է: Հաւաքականի մարզիչի պաշտօնը վստահուած է ֆրանսացի Հէրֆի Քոնարին: Աւելցնենք, որ 2018-ի ախոյեանութեան Մարօք մաս կազմեց 2-րդ խմբակին՝ իր հետ մրցակից ունենալով Փորթուկալի, Սպանիոյ եւ Պարսկաստանի հաւաքականները:

Հայազգի Կարօ Մուրատ Գերմանիոյ Լաւագոյն Բռնցքամարտիկը Համարուեցաւ

Գերմանիոյ մէջ լոյս տեսնող BOXSPORT ամսագիրին հարցախոյզի արդիւնքներուն համաձայն, 2017-ի մրցաշրջանին Գերմանիոյ «Տարուան բռնցքամարտիկ» ճանչցուեցաւ հայազգի 34-ամեայ արհեստավարժ բռնցքամարտիկ Կարօ Մուրատ: Ան հաւաքեց 1284 ձայն եւ անցնելով միւս երեք թեկնածուներուն՝ Վլատիմիր Կլիչկոյի, Իւրկէն Պրահմըրի եւ Տիրօն Ցուգէին, առաջին դիրքը գրաւեց: Այդպիսով, EBU-ի վարկածով Եւրոպայի ախոյեան Կարօ Մուրատ այդ տիտղոսը խլեց իր հայրենակից, աշխարհի նախկին ախոյեան Արթուր Աբրահամէն, որ եօթ տարի շարունակ ճանչցուած էր, որպէս Գերմանիոյ լաւագոյն բռնցքամարտիկ:

Ռաֆֆի Սիւլահեան

Share.

Leave A Reply