ԴԱՄԱՍԿՈՍԻ ՄԷՋ ԻՐԱՎԻՃԱԿԸ ԼԱՐՈՒԱԾ Է

0

Դամասկոսի «Գանձասար»ի թղթակիցը յայտնեց, թէ զինեալ ահաբեկչական խմբաւորումներ մէկ շաբաթէ ի վեր կը հրթիռակոծեն Դամասկոսի Պապ Թումա, Ճարամանա եւ Քասսաա շրջանները, առանց խնայելու բնակչութիւնն ու հասարակական կառոյցները։

Կիրակի, 11 Փետրուարի յետմիջօրէին հրթիռ մը ինկած է Ազգ. Միացեալ վարժարանի հանրակառքին վրայ։ Հանրակառքը, որ ծառայութեան մէջ չէր, ամբողջովին ջախջախուած է։

Ապահովական նկատառումներով աշակերտութիւնը դպրոց չէ ժամանած, սակայն վարժարանը բաց կը պահէ իր դռները։

Շրջանի պատասխանատու մարմինները սահմանափակած են միութիւններու հանրային ձեռնարկներն ու գործունէութիւնը՝ մինչեւ իրավիճակի բարելաւումը։

ՍԱՆԱ-ի համաձայն, արեւելեան Ղութայի մէջ կայք հաստատած զինեալ ահաբեկչական խմբաւորումները, շարունակելով խախտել լարուածութեան մեղմացման գօտիներու համաձայնութիւնը, կը հրթիռակոծեն Դամասկոսի եւ անոր գիւղերու բնակելի շրջանները։ Այսօր, 3 հրթիռներ ինկած են Ճարամանա շրջանին մէջ, նիւթական վնասներուն կողքին, զոհուած է քաղաքացի մը, վիրաւորուած են ուրիշներ։ Հրթիռակոծուած է նաեւ Ապասիին հրապարակը եւ Տուէյլիա շրջանը, որուն հետեւանքով վիրաւորուած են երեք քաղաքացիներ։ Երէկ, Ումաուիին հրապարակի հրթիռակոծման հետեւանքով, հրդեհ կը բռնկած է տեղւոյն ելեկտրակայանին մէջ, եւ կայանը ծառայութենէ դուրս եկած է։ Սուրիական բանակը հակադարձելով հրթիռակոծած է ահաբեկիչներուն կեդրոններն ու զինապահեստները։ Յիշենք, որ 22 Յուլիսին, սուրիական բանակը արեւելեան Ղութայի եւ Դամասկոսի կարգ մը գիւղերուն մէջ զինադադար յայտարարած էր, հաստատելով, որ զինադադարի խախտումին պարագային, բանակը վճռականօրէն պիտի հակադարձէ ահաբեկիչներու ռմբակոծումներուն։

Share.

Leave A Reply