ԱՐՄԷՆ ՌՈՒՍՏԱՄԵԱՆ. «ՀԱՅԱՍՏԱՆԻ ՏՆՏԵՍԱԿԱՆ ԿԱՐԳԸ ՊԷՏՔ Է ԱՄԲՈՂՋՈՒԹԵԱՄԲ ՎԵՐԱՆԱՅՈՒԻ»

0

 Հայաստանի Ազգային Ժողովի ՀՅԴ խմբակցութեան ղեկավար Արմէն Ռուստամեանի կարծիքով` խորհրդարանական համակարգին անցնելով` Հայաստան աւելի ժողովրդավարական դարձած է: Ազգային ժողովի ճեպազրոյցներու ընթացքին, ան յայտնած է, որ միջազգային հանրութիւնն ալ նման կարծիք ունի: «Այս համակարգը, որ փոխած ենք, կիրառումի փուլին պէտք է համապատասխան ըլլայ այն նպատակին, որ ճշդած ենք խորհրդարանական համակարգին անցնելու համար: Սա կարևոր է գերմիահեծան համակարգը վերափոխելու համար: Իսկապէս, Հայաստան աւելի ժողովրդավարական համակարգ ընտրած է, անցում կատարած է դէպի աւելի ապակեդրոնացուած համակարգ, այդ ապակեդրոնացումը, սակայն, պէտք է լիարժէքօրէն իրականանայ», ըսաւ ան: Ռուստամեան չի հերքեր, որ այս պարագային հարցեր կրնան յառաջանալ, կրնայ այնպիսի տպաւորութիւն ստեղծուիլ, որ իշխանութեան ապակեդրոնացումը լիարժէքօրէն չի իրականանար: «Սահմանադրական պահանջ է ապակեդրոնացումը, եւ բոլորս պարտաւոր ենք յարգել Սահմանադրութիւնը: Այդ մեքանիզմները պէտք է իրականացնենք, անպայման տեղի պէտք է ունենայ իշխանութեան ճիւղերու տարանջատում», ըսաւ Ռուստամեան` օրինակ բերելով դատական իշխանութեան անկախացումը: Պատգամաւորը յայտնեց, որ ՀՅԴ Բիւրօ-ԳՄ յայտարարութեան մէջ հիմնական հարցերէն մէկը, որը կարևոր համարուած է, կը վերաբերի կառավարութեան կառուցուածքին և պետական համակարգին առընթեր մարմիններու ստեղծման հարցին: «Այդ դաշտին մէջ պէտք է կարենանք այնպէս ընել որ կառավարութիւն- նախարար գործառոյթները կարենանք տարանջատել ու այնպիսի վիճակ չըլլայ, որ վարչապետը կարենայ փոխարինել նախարարները», ըսաւ ան: Ռուստամեանի կարծիքով` Հայաստանի մէջ տակաւին գոյութիւն ունի այնպիսի մտածելակերպ, որ համակարգը չէ փոխուած, սակայն քանի հասարակութեան լայն խաւերը նրբութիւններուն ծանօթ չեն, այն տպաւորութիւնը կ՚ունենան, որ ոչ մէկ բան փոխուած է: «Կը կարծենք, որ այս տպաւորութիւնը գոյութիւն ունի: Պէտք է կարենանք վերացնել զայն։ Միայն գործընթացներու արագ իրականացումով կարելի վերացնել նման տպաւորութիւններ», ըսաւ ան: Ըստ Ռուստամեանի` Հայաստանի տնտեսական կարգը պէտք է ամբողջութեամբ վերանայուի: Ան յայտնեց, որ մշակումներ կը կատարեն, որպէսզի ներկայացնեն, թէ իրենց պատկերացումով, ընկերային կարգը ինչպիսի՞ վիճակ պէտք է պարզէ: «Պէտք է այնպէս ընենք, որ Հայաստանի մէջ չմնայ մարդ, որ չկարենայ ընկերային հարցերը լուծել»,- եզրափակեց Ռուստամեան:

Share.

Leave A Reply