ՎԱՐՉԱՊԵՏԸ ՊԷՏՔ ՉԷ ՓՈԽԱՐԻՆԷ ԿԱՌԱՎԱՐՈՒԹԻՒՆԸ. ՀՅԴ-Ն Կ’ՈՒԶԷ ՎԵՐԱՑՆԵԼ ԻՇԽԱՆՈՒԹԵԱՆ ԳԵՐԿԵԴՐՈՆԱՑՈՒՄԸ

0

12 Փետրուարին, Հայաստանի Հանրապեութեան Ազգային ժողովի զրոյցներուն ընթացքին ՀՅԴ խմբակցութեան ղեկավար Արմէն Ռուստամեան` անդրադառնալով այն պնդումներուն, որ Հայաստան կ’ուղղուի դէպի գերվարչապետական համակարգ՝ յայտնեց, որ պէտք է գտնել համեմատական լուծում, որպէսզի փոխուած Սահմանադրութեամբ կառավարման համակարգը լիարժէքօրէն կեանքի կոչուի կիրառումի փուլին մէջ: Ռուստամեանի խօսքով, իրենց նպատակն էր վերացնել գերկեդրոնացած, միահեծան իշխանութիւնը Հայաստանի մէջ. բոլորին գնահատականներով` ոչ միայն տեղւոյն, այլ նաեւ Եւրոպական գործընկերներու, Հայաստան աւելի ժողովրդավարական համակարգ որդեգրած է` անցում կատարելով դէպի ապակեդրոնացած համակարգ: «Ապակեդրոնացումը պէտք է լիարժէքօրէն իրականացնել: Այս տեղ ալ կրնան ըլլալ կիրառումի փուլին տարբեր մօտեցումներ, որոնք տպաւորութիւն կը ստեղծեն, որ գործընթացի լիարժէք ապակեդրոնացում տեղի պիտի չունենայ այն փափաքներուն համապատասխան, որ անցեալին ունեցած ենք: Բայց միանշանակ, սահմանադրական մեքանիզմներու ապակեդրոնացումը ելակէտային փուլին մէջ անպայման տեղի պիտի ունենայ, եւ իշխանութեան ճիւղերը պիտի տարանջատուին», ընդգծեց Ռուստամեան: Որպէս ապակեդրոնացումի օրինակ ան բերաւ դատական իշխանութեան օրինակը` յայտնելով, որ եթէ անցեալին դատաւորներ նշանակելը եւ ազատ արձակելը նախագահի լիազօրութիւնն էր, այսօր արդէն վարչապետն ալ չունի նման լիազօրութիւն: ՀՅԴ խմբակցութեան ղեկավարին խօսքով, պէտք է այնպէս ընել, որ կառավարութիւն, վարչապետ, նախարար գործառոյթները յստակ տարանջատուին` համաձայն Սահմանադրութեան եւ այնպիսի վիճակ չյառաջանայ, որուն արդիւքնով վարչապետը փոխարինէ կառավարութիւնը: Այսօր վարչապետ-կառավարութիւն գործառոյթները տարանջատուածեն, այլ հարց, որ գուցէ ալ աւելի տարանջատելու կարելիութիւն կայ»: Ան նկատեց, որ Հայաստանի մէջ տակաւին կայ թոյլ մտածելակերպ, որուն համաձայն համակարգը թէեւ փոխուած է, սակայն համակարգի փոփոխութիւններու քօղին տակ պահպանուած են նոյն կառավարումին ոճը, նոյն ընկերային քաղաքականութիւնը. «Պէտք է վանենք նման մտածողութիւն», ընդգծեց Ռուստամեան:

Share.

Leave A Reply

This site uses Akismet to reduce spam. Learn how your comment data is processed.