ԱՐՄԷՆ ՌՈՒՍՏԱՄԵԱՆ. «ՎԱՐԿԱՆՇԱՅԻՆ ԸՆՏՐԱԿԱՐԳԸ ՉԻ ԿՐՆԱՐ ՊԱՏՃԱՌ ԴԱՌՆԱԼ«ՀՀԿ-ՀՅԴ» ՀԱՄԱԳՈՐԾԱԿՑՈՒԹԵԱՆ ՅՈՒՇԱԳԻՐԸ ՉԵՂԵԱԼ ՅԱՅՏԱՐԱՐԵԼՈՒ»

0

Հայաստանի Հանրապետութեան Ազգային Ժողովի զրոյցներուն ընթացքին, ՀՅԴ խմբակցութեան ղեկավար Արմէն Ռուստամեան` պատասխանելով այն հարցումին, որ տեղին են այն դիտարկումները, թէ վարկանշային ընտրակարգի շուրջ ՀՀԿ-ի եւ ՀՅԴ-ի միջեւ տարաձայնութիւններ կան, եւ կարելի՞է, որ անոնք պատճառ դառնան համախոհական գործընկերներու քաղաքական ապահարզանին՝ ըսաւ, որ Վարկանշային ընտրակարգը չի կրնար պատճառ դառնալ «ՀՀԿ-ՀՅԴ» համագործակցութեան յուշագիրը չեղեալ յայտարարելու: «Բանակցութիւններու փուլին խոցելի յայտարարութիւններ կ’ըլլան, բայց այս փուլին ես ձեռնպահ կը մնամ հաստատելէ, թէ ինչու ՀՀԿ-ն կը պաշտպանէ վարկանշային ընտրակարգը: Բայց վարկանշային ընտրակարգը նախապայման չէ եղած «ՀՀԿ-ՀՅԴ» համագործակցութեան յուշագիրին համար», ըսաւ Ռուստամեան` շեշտելով, որ ան կրնայ դառնալ յարաբերութիւնները հետագային աւելի սերտացնելու հարց, թէեւ չի կարծեր, որ գերակայ հարց կրնայ ըլլալ այդ մէկը: Արմէն Ռուստամեան շեշտեց, որ ՀՅԴ ունի համախոհութենէն բխող ծրագիրներ, որոնք պէտք է կեանքի կոչել մինչեւ 2022 թուական, եւ պարտաւոր է իրականացնել` յօգուտ ժողովուրդին: Պատգամաւորը յիշեցուց, որ վարկանշային ընտրակարգի շուրջ տարաձայնութիւնը գոյութիւն ունէր նաեւ մինչեւ ՀՅԴ-ի համախոհական գործընկեր ըլլալը, եւ անոր մասին իրենք բազմիցս հարց բարձրացուցած են: «Անձամբ քննարկումներու ընթացքին առիթներ ունեցած եմ յայտնելու, որ այն կարգը, որ կ’առաջարկուի վարկանշայինին հետկապուած, շեղում է համամասնական ընտրակարգի դասական պատկերացումներէն: Հարցը գոյութիւն ունէր նաեւ մինչ համախոհութեան ձեւաւորումը, հարցը օրակարգէն չենք հանած, անկախ անկէ` գիտէինք, որ ՀՀԿ-ն դէմ էր, սակայն պիտի շարունակենք պաշտպանել մեր մօտեցումը այդ ուղղութեամբ», ըսաւ ան եւ յայտնեց, որ հաւանական լուծումին հետ կապուած հարցը տակաւին քննարկուող հարց է:

Share.

Leave A Reply