ԵԱՀԿ ՄԻՆՍՔԻ ԽՄԲԱԿԻ ՀԱՄԱՆԱԽԱԳԱՀՆԵՐՈՒՆ ՅԱՅՏԱՐԱՐՈՒԹԻՒՆԸ ՀԱՍՑԷԱԳՐՈՒԱԾ Է ԱՏՐՊԷՅՃԱՆԻՆ, ԲԱՅՑ, ՑԱՒՕՔ ԱՆՈՆՔ ԿԸ ԽՈՒՍԱՓԻՆ ՃՇԳՐԻՏ ՁԵՒԱԿԵՐՊՈՒՄԷՆ. ՏԵՍԱԿԷՏՆԵՐ

0

 «Թերթ» կը յայտնէ, թէ Եւրոպայի Անվտանգութեան Եւ Համագործակցութեան Կազմակերպութեան Մինսքի խմբակի համանախագահները Արցախի հակամարտութեան խաղաղ լուծումին առնչութեամբ յայտարարութիւն տարածած են եւ կողմերուն կոչ ուղղած յաւելեալ քայլերու ձեռնարկել լարուածութիւնը նուազեցնելու եւ զինադադարը պահպանելու համար, ինչպէս նաեւ կատարել Վիեննայի եւ Սան Փեթերսպուրկի համաձայնութիւնները: Հայաստանի Հանրապետութեան Ազգային Ժողովի ճեպազրոյցներուն ընթացքին ՀՅԴ խմբակցութեան ղեկավար Արմէն Ռուստամեան` խօսելով ԵԱՀԿ Մինսքի խմբակի համանախագահներու այս յայտարարութեան մասին ըսաւ, որ ԵԱՀԿ Մինսքի խմբակը նոր հարց ունի` պէտք է բանակցելի դարձնել Ատրպէյճանը եւ զինք բերել ճշմարիտ բանակցութիւններու սեղան: Արմէն Ռուստամեան յիշեցուց, որ Ալիեւ քանի մը օր առաջ նախագահ դառնալու յաւակնութեամբ յոխորտացող յայտարարութեամբ հանդէս եկաւ: Յայտնենք, որ Ատրպէյճանի նախագահ Իլհամ Ալիեւ յայտարարած էր, թէ ատրպէյճանցիները պէտք է աստիճանաբար մօտենան իրենց պատմական հողեր` Երեւան վերադառնալու առնչութեամբ իրենց ռազմավարական նպատակին: Ըստ Ռուստամեանի, այս ձեւով բանակցութիւնները շարունակել բացարձակապէս կարելի չէ, բանակցութիւններու համար բնականոն միջավայր պէտք է ստեղծուի. սա միջնորդներուն հիմնական յանձնառութիւնն է: «Ելք» խմբակցութեան ղեկավար Նիկոլ Փաշինեան Ազգային Ժողով ընդգծեց, որ յայտարարութիւնը հասցէագրուած է Ատրպէյճանին, բայց, ցաւօք սրտի, համանախագահները կը խուսափին զայն ճշգրիտ ձեւակերպելէ: «Եթէ կ’ըսեն, որ կոչ կ’ուղղեն կողմերուն սադրիչ գործողութիւններէ զերծ մնալու, ես չեմ պատկերացներ, թէ Հայաստանի կողմէն ինչպիսի սադրանքներ եղած պիտի ըլլան: Մեզի համար այդ սադրանքները նպաստաւոր չեն, մեզի ի նպաստ են բանակցութիւնները: Խայտառակութիւն է այն իրողութիւնը, որ առ այսօր Վիեննայի համաձայնութիւններն ու զինադադարը գործարկուած չեն, Ատրպէյճան խայտառակ կերպով կրնայ խուսափիլ այդ համաձայնութիւնները իրականացնելէ, ատիկա առաջին կարգի խայտառակութիւն է նաեւ համանախագահներուն համար», յայտնեց պատգամաւորը: ՀՀԿ խմբակցութեան ղեկավար Վահրամ Պաղտասարեանն ալ նոյն տեսակէտը յայտնեց՝ ըսելով որ ակնյայտ է, թէ Մինսքի խումբի համանախագահներուն յայտարարութիւնները կ’առնչուին ատրպէյճանական կողմին: Միեւնոյն ատեն պատգամաւորը նկատել տուաւ, թէ պէտք է հասցէական յստակ յայտարարութիւններ ըլլան: «Պէտք է յստակօրէն ըսուի, թէ որոնք են սադրիչները, մենք պէտք է պնդենք, որ մշտադիտարկումի մեքանիզմներու առկայութիւնը պարտադիր է», ըսաւ ան:

Share.

Leave A Reply

This site uses Akismet to reduce spam. Learn how your comment data is processed.