Պէքճեան հրաժեշտի նամակ յղած է. «Թէկուզ չուզելով՝ ստիպուած եմ լքել Պոլիսը»

0

Պոլսոյ հայոց պատրիարքի տեղապահի պաշտօնէն ստիպողաբար հրաժարած Գարեգին Արքեպիսկոպոս Պէքճեան հրաժեշտի նամակ յղած է:

Ըստ «Ակօս»ի, նամակին մէջ ան կը խոստովանի, որ Պոլսոյ Հայոց պատրիարքի տեղապահի պաշտօնը ստանձնելէ ի վեր չեն ստեղծուած այն պայմանները, որոնք անհրաժեշտ էին արդար, ճիշդ ու թափանցիկ ընտրութեան համար:

«Անհրաժեշտ չեմ զգար ներկայացնել անոր բազմաթիւ դրսեւորումներն ու օրինակները. այդ տխրեցնող, վիրաւորական օրինակները չեմ փափաքիր ո՛չ յիշել, ո՛չ յիշեցնել», նամակին մէջ գրած է Պէքճեան՝ յայտնելով, որ վերջին իրադարձութիւնները պատահական դէպքեր չեն:

«Ցաւօք, այն որոշումը, որ կը թուի, թէ զիս թիրախ կը դարձնէ, իրականութեան մէջ նպատակ ունի տապալել Պոլսոյ Հայոց 85-րդ պատրիարքի ընտրութիւնները եւ արդիւնք է բաւականին երկար ու լաւ ծրագրուած նախաձեռնութեան մը», յայտնած է Պէքճեան՝ յոյս յայտնելով, որ եղածը հայ համայնքին համար դաս կ’ըլլայ:

Եզրափակելով նամակը, ան յայտնած է, որ ստիպուած կը լքէ Իսթանպուլը: «Թէկուզ չուզելով՝ ստիպուած եմ լքել Իսթանպուլը, ուր ապրելով ու ձեզի հետ ըլլալով երջանիկ եղած եմ », գրած է Պէքճեան՝ աւելցնելով, որ այսուհետեւ իր ժամանակը պիտի անցընէ աղօթելով՝ երկար ժամանակ մահաքունի մէջ գտնուող պատրիարք Մեսրոպ Մութաֆեանին, անոր դժբախտ մօր՝ Մարի Մութաֆեանին, ինչպէս նաեւ կրօնական իր եղբայրներուն համար:

Share.

Leave A Reply