ԽՄԲԱԳՐԱԿԱՆ՝ Փետրուար Գ./2018. ՄԱՄԵՏԵԱՐՈՎ ՄԷԿ ԱՉՔԸ ՓԱԿԱ՞Ծ ԿԸ ՔՆՆԷ ՀԱՐՑԵՐԸ

0

Երկուշաբթի 12 Փետրուարին,  Ատրպէյճանի արտաքին գործոց նախարար Էլմար Մամետեարով Պաքուի մէջ Վատիկանի պետութեան հետ կապերու քարտուղարին՝ Փօլ Ռիչըրտ Արքեպիսկոպոսին հետ հանդիպումի մը ընթացքին յայտարարած է, որ Հայաստանի իշխանութիւնը Արցախի տարածքը կը բնակեցնէ Սուրիայէն գաղթած հայերով:

Ըստ Մամետեարովի, «բռնագրաւուած» տարածքներու մէջ սուրիահայեր  բնակեցնելու քաղաքականութիւնը եւ ժողովրդագրութիւնը նպատակաուղղուած կերպով փոխելու փորձերը միջազգային իրաւունքի կոպիտ խախտումներ են:

Մամետեարով, ըստ երեւոյթի, տեղեակ չէ, որ Արցախ հաստատուած քանի մը սուրիահայ ընտանիքները Սուրիոյ յատկապէս այն շրջաններէն եկած են, որոնք սահմանակից են Թուրքիոյ, իսկ այդ շրջաններու սուրիացի բնակիչները՝ հայ թէ այլազգի, թիրախը դարձած էին թրքական սահմանէն Սուրիա խուժած ահաբեկիչներուն:

Մամետեարով արդեօ՞ք տեղեակ ալ չէր, որ, միջազգային եւ սուրիական լրատուամիջոցներուն իսկ հաստատումով, այդ ահաբեկչական խումբերուն մաս կը կազմէին ինչպէս թուրք, այնպէս ալ ատրպէյճանցի ահաբեկիչներ: Գաղտնիք մը չէր ասիկա: Սպանուած ահաբեկիչներուն լուսանկարներն ու անձնագիրները օրին ցուցադրուած ալ էին զանազան լրատուամիջոցներու կողմէ:

Ահաբեկչական այդ շարժումներուն զօրակցող երկիրներն էին, որոնք կը միտէին փոխել Սուրիոյ կարգ մը շրջաններու ժողովրդագրութիւնը՝ յանուն իրենց քաղաքական եւ ծաւալապաշտական ծրագիրներուն:

Հայատեացութիւնը, սակայն, այնքան իշխած է նման ղեկավարներու մտքին ու տրամաբանութեան, որ անոնք չտեսնելով իրենց իսկ երկրին կողմէ արհամարհուող միջազգային օրէնքները, զինադադարի ամէնօրեայ խախտումները, մանաւանդ՝ ինքնորոշման իրաւունքի տէր Արցախի բնակչութեան ուղղուած ազերիական սպառնալիքները, պատերազմէն մազապուրծ եղած ու իրենց պատմական հայրենիքի մէկ հատուածին մէջ ապաստան գտած քանի մը հայ ընտանիքները քաղաքական հաշուարկներու առարկայ կը դարձնեն:

Հայատեացութեան հերթական դրսեւորում մըն է սա՝ պատերազմի արհաւիրքը ապրողներուն իսկ նկատմամբ:

Դրսեւորում մը, որ մեզ կը յիշեցնէ ազերիներուն բարբարոսութիւնները Սումկայիթի մէջ, Թալիշի մէջ:

Եւ այսպիսի դրսեւորումներուն շեշտադրումները, անպատժելիութեան ու միջազգային ընտանիքի անվճռական քայլերուն արդիւնքով, յաճախակիօրէն կը յայտնուին Ատրպէյճանի ղեկավար դէմքերուն մօտ:

«Գ.»

Share.

Leave A Reply