ԳԵՐԱԳՈՅՆ ՀՈԳԵՒՈՐ ԽՈՐՀՈՒՐԴԸ ՊՈԼՍՈՅ ՀԱՅՈՑ ՊԱՏՐԻԱՐՔԻ ԸՆՏՐՈՒԹԻՒՆԸ ՉԽՈՉԸՆԴՈՏԵԼՈՒ ԿՈՉ ՈՒՂՂԵՑ

0

20-23 Փետրուարին, նախագահութեամբ Գարեգին Բ. Ամենայն Հայոց կաթողիկոսին տեղի ունեցաւ Գերագոյն հոգեւոր խորհուրդի ժողովը, որուն ընթացքին անդրադարձ կատարուեցաւ Պոլսոյ Հայոց պատրիարքի ընտրութիւններու կազմակերպումի գործընթացին:

Մայր Աթոռի տեղեկատուական համակարգը կը յայտնէ, որ քննարկումներուն իբրեւ արդիւնք, Գերագոյն հոգեւոր խորհուրդը իր մտահոգութիւնը արտայայտած է պատրիարք Մեսրոպ արք. Մութաֆեանի հիւանդութեան պատճառով անցնող տասը տարիներուն ստեղծուած անցանկալի զարգացումներուն առնչութեամբ, որոնք «լուրջ անհանգստութիւն եւ ընդվզում յառաջացուցած են աշխարհասփիւռ մեր ժողովուրդին մէջ»:

Յայտարարութեան մէջ կը յիշուի, որ մինչ պատրիարքական տեղապահի ընտրութիւնը նոր յոյս ներշնչած է պատմական Աթոռը գահակալով օժտելու եւ պոլսահայութեան բնականոն կեանքը վերականգնելու առումով, կարճ ժամանակ անց, եկեղեցական մարմիններու եւ անհատներու «անշրջահայեաց քայլերուն իբրեւ հետեւանք» ստեղծուեցաւ իրավիճակ մը, որ առիթ տուաւ արտաքին ներազդեցութիւններու եւ Թուրքիոյ իշխանութիւններուն միջամտութեան՝ դարձեա՛լ ձախողութեան մատնելով պատրիարքական ընտրութիւններու կազմակերպումին ի նպաստ ներդրուած ջանքերը:

Աւարտին, յայտարարութեան մէջ կը յիշուի. «Մայր Աթոռ Ս. Էջմիածնի յորդորն է Կրօնական ժողովի անդամներուն եւ համայնքին մէջ հանգամանք ու հեղինակութիւն ունեցող աշխարհական հայորդիներուն՝ միաբան ու համախորհուրդ, Հայոց եկեղեցւոյ կանոններու եւ օրինական պահանջներու պահպանումով հետամուտ ըլլալ երկարամեայ ծանր հիւանդութեան մէջ գտնուող ամենապատիւ Մեսրոպ պատրիարքին անգործունեայ ճանչնալուն եւ պետութեան հետ սահմանուած ընթացակարգով պատրիարքական ընտրութիւններու կազմակերպումը՝ ի պայծառութիւն Պոլսոյ Հայոց պատրիարքութեան եւ ի մխիթարութիւն մեր բարեպաշտ ժողովուրդի: Մեր ակնկալութիւնն է Թուրքիոյ իշխանութիւններէն, որ ընդառաջեն Հայոց պատրիարքի ընտրութիւններու կազմակերպումին հայ համայնքի արդար պահանջին: Հանդարտութեան հրաւէր կ’ուղղենք նաեւ աշխարհասփիւռ մեր ժողովուրդին՝ ողջախոհութեամբ եւ զսպուածութեամբ առիթ ընձեռելու Պոլսոյ աթոռին՝ յաղթահարելու ստեղծուած կացութիւնը»:

Share.

Leave A Reply