ԼԻԲԱՆԱՆԻ ԶԲՕՍԱՇՐՋՈՒԹԵԱՆ ՆԱԽԱՐԱՐ ԱՒԵՏԻՍ ԿԻՏԱՆԵԱՆ ՀԱՆԴԻՊՈՒՄ ՈՒՆԵՑԱՒ ՄՈՆԹՐԷԱԼԱՀԱՅՈՒԹԵԱՆ ՀԵՏ

0

«Հորիզոն».- Կիրակի, 4 Մարտ 2018-ին, երեկոյեան ժամը 7:30-ին, Մոնթրէալի Հայ կեդրոնի «Ահարոնեան» սրահին մէջ տեղի ունեցաւ հանդիպում Լիբանանի զբօսաշրջութեան նախարար Աւետիս Կիտանեանի հետ:

Բարի գալուստի խօսքով հանդէս եկաւ տիկին Մարալ Նազարեան ու ըսաւ, որ նախարար Կիտանեանի Քանատա այցելութիւնը Հիւսիսային Ամերիկա կատարած իր այցելութեան մէկ օղակն է, որուն ընթացքին ան հանդիպում ունեցաւ նաեւ Թորոնթոյի հայ համայնքին հետ, ապա ժամանեց Մոնթրէալ՝ զեկուցելու Լիբանանի խորհրդարանական մօտալուտ ընտրութիւններուն մասին: Ապա ան ներկայացուց նախարար Աւետիս Կիտանեանի հակիրճ կենսագրականը. Աւետիս Կիտանեան ծնած է Պէյրութ 21 Նոյեմբեր 1966-ին, երկրորդական ուսումը ստացած է Հայ կաթողիկէ Մեսրոպեան բարձրագոյն վարժարանին մէջ, աւարտած է Լիբանանեան համալսարանի բնագիտութեան բաժինը: Անդամ է ՀՅ Դաշնակցութեան եւ ստանձնած է կուսակցական զանազան պաշտօններ:

Տիկին Նազարեան բեմ հրաւիրեց նախարար Կիտանեան, որ նախ շնորհակալութիւն յայտնեց քանատահայութեան՝ սոյն ընտրութիւններուն առիթով գաղութին տարած աչալուրջ աշխատանքին համար: Ան յայտնեց, թէ Լիբանան, վերջերս, կ’ապրի համեմատաբար խաղաղ շրջան մը, շնորհիւ երկրի նախագահին եւ վարչապետին համախոհութեան: «Եւ մենք՝ լիբանանահայերս, Լիբանանի ճգնաժամային պայմաններուն տոկացինք եւ շարունակեցինք ապրիլ որպէս Լիբանանի հաւատարիմ քաղաքացիներ, այդ պատճառով ալ բոլոր ուժերուն կողմէ մեծ յարգանք կը վայելենք առ այսօր, հետեւաբար ժամանակն է, այս բարօր ժամանակաշրջանին, որ Դաշնակցութիւնն ու լիբանանահայութիւնը օգտուին ընձեռուած կարելիութիւններէն, եւ Սփիւռքի մեր հայրենակիցները մասնակցելով քուէարկութիւններուն՝ նպաստեն ոչ միայն լիբանանահայութեան, այլ նաեւ մեր ազգային հարցերուն»: Նախարար Կիտանեան այս առումով անդրադարձաւ Լիբանանի նախագահ Միշէլ Աունի վերջերս կատարած Հայաստան այցելութեան, որուն ընկերակցած էր նաեւ ինք, եւ յիշեց, թէ նախագահը Հայաստանի, Արցախի եւ Ցեղասպանութեան ճանաչման հարցերուն շուրջ իր անվերապահ զօրակցութիւնը յայտնած էր:

Նախարար Կիտանեան յայտնեց, որ 2000-էն ի վեր Դաշնակցութիւնը Լիբանանի Խորհրդարանէն ներս ունեցած է երկու երեսփոխան, ուստի քանի որ ներկայ պայմանները փոխուած են եւ ընտրութիւններուն օրէնքները նոր կարելիութիւններ կ’ընձեռեն մեզի, պէտք է ամէն ճիգ ի գործ դնենք, որպէսզի արդարօրէն ունենաք երեք կամ չորս երեսփոխան, եւ այսպիսով դառնանք իրաւակա՛ն ներկայացուցիչը մեր ժողովուրդին՝ Լիբանանի քաղաքական կեանքէն ներս:

Քաջալերելով Քանատա ապրող լիբանանահայերը կատարելու իրենց քաղաքացիական եւ ազգային պարտականութիւնները, ան ըսաւ. «Գրանցուելու ճշդուած ժամանակաշրջանը անբաւարար նկատելով, ներքին համաձայնութիւն կար զայն երկարաձգելու, սակայն քաղաքական կարգ մը անակնկալ իրադարձութիւններ պատճառ դարձան երկարաձգումին խափանման: Հետեւաբար սպասուած արդիւնքներուն չկրցանք հասնիլ: Կը մտածուի նոր միջոցներու մասին՝ համալրելու քուէարկողներու պահանջուած թիւը»: Ան կարեւորութեամբ շեշտեց, որ բոլոր գրանցուողները 29 Ապրիլին պէտք է ուղղուին քուէակեդրոններ եւ իրենց քուէն տան  Դաշնակցութեա՛ն թեկնածուներուն: Նախարար Կիտանեան յայտնեց նաեւ, թէ անոնց,  որոնց լիբանանեան փաստաթուղթերն ու անցագիրները ի զօրու չեն այլեւս, դեսպանատունը դիւրութիւններ կ’ընծայէ նորոգելու եւ նոր անցագիրներ ապահովելու շատ կարճ ժամանակամիջոցի ընթացքին (առաւելաբար մէկ շաբաթ) եւ գրեթէ անվճար (1000 լիբանանեան ոսկի):

Փարատելու համար գրանցուողներուն մտահոգութիւնը՝ քուէարկութեան համար Օթթաուա մեկնելու, նախարարը յայտնեց, թէ այդ հարցը եւս լուծուած է, եւ քուէակեդրոններ պիտի նշանակուին Մոնթրէալի եւ Թորոնթոյի մէջ:

Իր խօսքի աւարտին նախարարը յայտնեց, թէ Դաշնակցութեան թեկնածուներու ընտրատարածքներն են Պէյրութ մայրաքաղաքը, Մաթընի շրջանն ու Այնճարը: Ան կոչ ուղղեց լիբանանահայ մեր հայրենակիցներուն վերջին ճիգը չխնայելու՝ ի նպաստ լիբանանահայութեան, ազգին եւ հայրենիքին: Շնորհակալական խօսք ուղղեց Քանատայի մէջ Ընտրական յանձնախումբին եւ ՀՅԴ Կեդրոնական կոմիտէին՝ այս առնչութեամբ իրենց տարած անխոնջ աշխատանքին համար:

Սոնա Թիթիզեան

Share.

Leave A Reply