12 ՄԱՐՏԻՆ ՊԻՏԻ ՍԿՍԻՆ ՖՐԱՆՍԱԽՕՍ ԵՐԿԻՐՆԵՐՈՒ ՁԵՌՆԱՐԿՆԵՐԸ

0

Հայաստանի մէջ Ֆրանսայի դեսպանութիւնը ֆրանսախօս երկիրներու համախմբումի ձեռնարկները պիտի իրականացնէ 12 Մարտէն 12 Ապրիլ երկարող ժամանակամիջոցին:

Հայաստանի մօտ Ֆրանսայի դեսպան Ժոնաթան Լաքոթ 5 Մարտին յայտնեց, որ Ֆրանսախօսութեան միամսեակը մեծ դեր ունի Հայաստանէն ներս ֆրանսերէնի ամրապնդման մէջ:

«Կը փափաքինք, որ այս մէկ ամիսը ֆրանսերէնը սիրողներուն համար տօն դառնայ», յայտնեց դեսպանը:

Մէկ ամսուան ընթացքին ֆրանսական մշակոյթը պիտի ներկայացուի շարժապատկերի, երաժշտութեան, թատրոնի եւ զանազան մրցումներու միջոցով:

Ծրագիրի մեկնարկը պիտի կատարուի 12 Մարտ 2018-ին, «Մոսկուա» շարժապատկերի սրահին մէջ, Զուիցերիոյ եւ Քանատայի դեսպանութիւններուն հետ համագործակցութեամբ կազմակերպուած Ֆրանսախօս ֆիլմերու 2-րդ փառատօնով:

19-էն 22 Մարտին կը սպասուի ֆրանսահայ խոհարարապետ եւ «Պոքիւս Մակազին» հանդէսի գլխաւոր խմբագիր Սոնիա Եզգիւլեանի եւ նկարազարդող ու ձեւաւորող Կիյոմ Լոնի առաջին այցելութիւնը Հայաստան:

Ֆրանսախօսութեան միամսեակի ձեռնարկներէն մէկն է «Et en plus je parle francais… en Armenie!» (Ես կը խօսիմ ֆրանսերէն… Հայաստանի մէջ եւս)ը, որ տեսահոլովակի եւ բանաւոր խօսքի մրցոյթ է. անիկա պիտի սկսի 20 Մարտ 2018-ին, Հայաստանի մէջ Ֆրանսայի դեսպանութեան մշակութային նոր՝ www.culturefrance.am կայքին վրայ: Առաջին տեղը գրաւած մասնակիցը Ֆրանսա մեկնելու կարելիութիւն պիտի ունենայ:

24 Մարտին, հայկական «Ալիանս Ֆրանսէզ»ը պիտի կազմակերպէ ֆրանսերէնի գրաւոր մրցոյթ, որուն կրնան մասնակցիլ 13-էն 25 տարեկան պատանիներ եւ երիտասարդներ:

30 եւ 31 Մարտին, Գիւմրին պիտի հիւրընկալէ Հայաստանի մէջ Պատանի ֆրանսախօսներու թատերական ազգային 2-րդ՝ «10-էն 10» փառատօնը:

Ֆրանսախօսութեան օրերը պիտի փակուին Ժիւլ Մասնէի «Մանոն» օփերայով, որուն ֆրանսերէն տարբերակը 11 եւ 12 Ապրիլին պիտի ներկայացուի Օփերայի եւ պալէյի ազգային ակադեմական թատրոնին մէջ:

Share.

Leave A Reply

This site uses Akismet to reduce spam. Learn how your comment data is processed.