«ԳԱՆՁԱՍԱՐ ԲԱՑԱՌԻԿ -2018»Ի ՇՆՈՐՀԱՆԴԷՍԸ Ի ՄԻ ԲԵՐԱՒ «ԳԱՆՁԱՍԱՐ»Ի ԱՇԽԱՏԱԿԻՑՆԵՐՆ ՈՒ ԸՆԹԵՐՑՈՂՆԵՐԸ

0

Հովանաւորութեամբ Բերիոյ Հայոց Թեմի Առաջնորդ Գերշ. Տէր. Շահան Սրբ. Արք. Սարգիսեանի, կազմակերպութեամբ «Գանձասար»ի Վարչութեան եւ Խմբագրութեան,  Շաբաթ, 3 Մարտ 2018-ին, Արամ Մանուկեան Ժողովրդային Տան «Անի» սրահէն ներս «Գանձասար Բացառիկ 2018»ի շնորհանդէսին համախմբուած էին Հալէպի համայնքապետները, ՀՀ Հալէպի Գլխաւոր Հիւպատոսը, Ազգ. Իշխանութեան եւ միութիւններու ներկայացուցիչները, գրողներ, «Գանձասար»ի աշխատակիցներ, խմբագրական կազմի անդամներն ու թերթի մնայուն ընթերցողները մտերմիկ մթնոլորտի մէջ:

 

 

Բացման խօսքով հանդէս եկաւ հանդիսավար Մարէն Պապեան, որ բարի գալուստ մաղթելով ներկաներուն ըսաւ. «5 տարուան դաժան պատերազմին պարտադրած պայմանները յաղթահարելով, ահաւասիկ «Գանձասար Բացառիկ -2018» լոյս աշխարհ կու գայ՝ ընթերցողին հրամցնելով սուրիահայութեան վերջին տարիներու մաքառումները արտացոլող վաւերագրական նիւթեր, ինչպէս նաեւ զանազան գրողներու հրապարակագրական,գրական, գեղարուեստական պատառիկները համադրող փունջ մը»:

Ձեռնարկը սկսաւ ջերմութիւն պարգեւող գուսանական երգով մը: Արդարեւ, Սայաթ Նովայի «Քանի Վուր Ճան Իմ» երգը թաւշային իր ձայնով կատարեց Համազգայինի «Բարսեղ Կանաչեան» երաժշտանոցի շրջանաւարտ Մարիա Չիչեան:

«Գանձասար Բացառիկ -2018»ը ներկայացուց Ազգային Առաջնորդարանի դիւանապետ, ազգային գործիչ Գրիգոր Տունկեան: Բացառիկի 214 էջերուն եւ 40 գրողներուն համառօտ ներկայացումէն առաջ, Տունկեան անդրադարձաւ 5 տարի բացակայութենէ ետք «Գանձասարի Բացառիկ»ի վերահրատարակութեան կարեւորութեան՝ ըսելով. «Ամիսներ առաջ երբ «Գանձասար»ի սիրելի խմբագիրը կը խօսէր «Գանձասար Բացառիկ» հրատարակելու մասին, հպարտութեամբ լեցուեցայ, որովհետեւ տարիներու բացէ մը ետք, «Գանձասար»ի բացառիկը կրկին մեզի պիտի ներկայանար աշխոյժ գրողներու գեղեցիկ փունջով մը: Այս իսկ պատճառով, չկրցայ մերժել «Գանձասար-Բացառիկ»ը ներկայացնելու խմբագիրին առաջարկը, եւ վստահելով ձեր բարի կամեցողութեան պիտի փորձեմ ներկայացնել այն ինչ որ տեսայ այս հատորին մէջ:

«Գանձասար Բացառիկ»ին նուիրուած այս իւրայատուկ հանդիպումը, ես կը կարծեմ, իր անուանումին մէջ շնորհանդէսի համընկնող տարբերակ է՝ սակայն ոչ ամբողջական: Ընդհանրապէս գրական երկի մը կամ գրողի մը ծանօթացումին յատուկ ստեղծագործական երկի  գնահատումին համար աւանդութիւն դարձած շնորհանդէսին չափանիշերը  «Գանձասար Բացառիկ»ին հետ չեն համընկնիր, թէ որպէս ձեւ եւ թէ որպէս խորք, որովհետեւ հոս ոչ թէ մենագրութեան մը հետ գործ ունինք, այլ ինչպէս քիչ առաջ բացման խօսքով ներկայացուեցաւ մեր առջեւ կան 40-է աւելի մենագրութիւններ, որոնք համատեղուած ծաղկեփունջի մը վերածուելով ներկայացուած են մեզի», ըսաւ Տունկեան:

Այնուհետեւ Գրիգոր Տունկեան մէկ առ մէկ անդրադարձաւ նիւթերուն, դիտել տալով, որ այս հատորով ընթերցողը պատկերացում մը կ’ունենայ, թէ սուրիահայութիւնը ի՞նչ պայմաններու տակ ապրեցաւ նախորդ հինգ տարիներուն, ինչպիսի՞ դժուարութիւններ յաղթահարեց եւ տարբեր ոլորտներու մէջ ինչպիսի՞ աշխատանքներու ձեռնարկեց իր գոյերթը շարունակելու համար:

Տունկեան դրականօրէն գնահատեց թէ՛ սուրիահայ գրողներուն ստորագրած նիւթերը այս հատորին մէջ, թէ՛ պոլսահայ, հայրենի, սփիւռքահայ գրողներուն մասնակցութիւնը՝ դիտել տալով, որ այս բոլորին նպատակը, վերջապէս, համայն հայութիւնը մտահոգող նիւթերու արծարծումն է, եւ արեւմտահայերէնի պահպանման խթանումը: Տունկեան առանձնապէս անդրադարձաւ Սարգիս Մահսերէճեանի գրութեան՝ յայտնելով, որ Մահսերէճեան մեծ ներդրում բերած է «Գանձասար»ի հիմնադրութեան տարիներուն եւ որպէս խմբագիր ու գրող, թերթի հրատարակութեան իր ողջ փորձառութիւնը ի սպաս դրած է «Գանձասար»ին՝ անոր հիմնադրութեան օրերուն:

Ապա անդրադարձաւ «Գանձասար»ի կողքին՝ դիտել տալով որ ան կը խորհրդանշէ մեր լաւատեսութիւնն ու հաւատքը թէ՛ սուրիահայ համայնքի վերականգնումին, եւ թէ 100-ամեայ անկախ մեր հայրենիքի բարգաւաճման նկատմամբ:  Տունկեան լուսարձակի տակ առաւ նաեւ Բացառիկին կողքին հրատարակուած «Գանձասար»ի մանկապատանեկան յաւելուածի՝ «Կկու»ի գրքոյկը՝ դիտել տալով, որ ուրախալի է անոր գունազարդ էջերուն մէջ ընթերցել Սուրիոյ զանազան շրջաններէն մասնակից փոքրիկներուն գրութիւնները, ջինջ արեւմտահայերէնով արտայայտուած անոնց հարազատ ապրումները: Ապա անդրադարձաւ հայկական իրականութեան մէջ մանկական գրականութեան կարեւորութեան: Տունկեան իր խօսքը եզրափակելով ըսաւ. «Սիրելինե՛ր, այս շնորհանդէսը կ’ուզեմ անուանել շնորհաւորանք՝ մեր բոլորին ապրած իրականութիւնը, հարազատ, դաստիարակիչ եւ յառաջատեսիլ եղանակով մը խմբագրութեան կողմէ ներկայացուած տեսնելու ուրախութեամբ»:

«Գանձասար Բացառիկ 2018»ին մէջ լոյս տեսած Յուշիկ Ղազարեանի, Լեռնա Գարագիւթիւքի, Խաչիկ Արսլանեանի եւ Յարվարդի բանաստեղծութիւններէն հատուածներ ընթերցեցին Քրիստ Խրոյեան եւ Լուսին Ապաճեան-ՉիլԱբօշեան՝ ներկաները հաղորդակից դարձնելով հեղինակներուն ապրումներուն եւ ստեղծագործական իւրայատկութեան:

Այնուհետեւ խօսք առաւ «Գանձասար»ի խմբագիր՝ Զարմիկ ՉիլԱբօշեան-Պօղիկեան, որ նախ շնորհակալութիւն յայտնեց հատորին մասնակից գրողներուն եւ բոլոր անոնց, որոնք հաւանաբար գրութեամբ մը չմասնակցեցան այս հատորին, սակայն զանազան ձեւերով իրենց աջակցութիւնը բերին ու խթան հանդիսացան խմբագրակազմի աշխատանքներուն: Պօղիկեան դիտել տուաւ, որ այս ձեռնարկի կազմակերպումին նպատակը միայն հատորը ներկայացնել, կամ աշխատանքով մը պարծենալ չէ, երբե՛ք. այլ՝ հետաքրքրութիւն ստեղծելն ու հաւատք ընծայելն է թերթին, անոր կարեւոր դերակատարութեան, ու մանաւանդ՝ երիտասարդ գրողները աշխուժացնելն ու «Գանձասար»ին շուրջ համախմբելն է:

Յայտագրին աւարտին, Բերիոյ Հայոց Թեմի Առաջնորդ Գերշ. Տ. Շահան Սրբ. Արք. Սարգիսեան խօսք առնելով ըսաւ. «Մամուլին առաջին առաքելութիւնը ճշմարտութիւնը փոխանցելն է. մենք ոչ միայն հալէպի, ոչ միայն հայ համայնքի, ոչ միայն Սուրիոյ ու Միջին Արեւելքի մէջ, այլ ամէնուրեք, կ’ապրինք ընկերային հաւաքական այնպիսի իրավիճակի մը մէջ,  ուր մամուլը իր առաքելութենէն շեղած ընթացքի մէջ է: Շեղած է այն իմաստով, որ երբեմն սուտը, ապատեղեկատուութիւնը իրականութեան եւ ճշմարտութեան պէս տարածել կը փորձէ, մտքերը կը պղտորէ, մարդոց կեցուածքը եւ անոնց վերաբերմունքը յաճախ հարցականի տակ կը դնէ: Այս իմաստով, ես կը հաւատամ հայ մամուլին առաքելութեան՝ ճշմարտութեան խօսքը հայ մարդուն տալու եւ հայ մարդը վերստին մկրտելու ոչ թէ եկեղեցական իմաստով, այլ գիտակցական իմաստով, ճշմարտութեան խարանումով, մարդ արարածին մտքին զարգացումով: Ճշմարտութեան խարանում կ’ըսեմ, որովհետեւ ամէն մարդ չէ որ ճշմարտութիւնը կ’ընդունի, ճշմարտութիւնը կը լսենք,  ճշմարտութիւնը կը հասկնանք, ճշմարտութիւնը կրնանք ընդունիլ եւ կրնանք մերժել, բայց ճշմարտութիւնը կը մնայ անփոփոխ եւ այդ իմաստով հայ մամուլը հայ մարդուն հայ իրականութիւնը ճշմարտօրէն հրամցնելու առաքելութիւնը ունի: Այս առաքելութիւնը վերապահուած է նաեւ «Գանձասար»ին: Հայ մամուլի առաքելութեան մէջ երկրորդ կարեւոր խնդիրը դաստիարակչականն է, մամուլը կը դաստիարակէ, մարդը կ’առաջնորդէ եւ անոր մէջ, լեզուամտածողութեան ճամբով, գեղեցիկին հանդէպ հետաքրքրութիւնը  կը բարձրացնէ գիտակցութեան մակարդակի: Այս իմաստով, մամլոյ սպասարկութեան մէջ գտնուող գիտակից անձնաւորութիւնները՝ խմբագիրը եւ խմբագրական կազմին շուրջ համախմբուած համաստեղութիւնը կը միտին զարգացնել մարդը, բարձրացնել անոր գիտակցական մակարդակը: Երրորդը, որ յաճախ խօսուեցաւ, մեր բոլորին պատասխանատուութեան հրաւիրող հարցն է՝ արեւմտահայերէնի պահպանումն ու զարգագումը: Ճիշդ է որ լեզուն նահանջի մէջ է, բայց մենք ձեռնածալ եւ յուսահա՞տ պէտք է մնանք: Մենք ոչ մէկ նախաձեռնութեա՞ն պիտի դիմենք: Երբե՛ք: Հայ մամուլը ստանձնած է մեր ժողովուրդի զաւակներուն լեզուն՝ աղարտուած լեզուն անաղարտ դարձնելու եւ լեզուի բծախնդիր օգտագործման համար հայ հաւաքականութիւնը ինքնասրբագրումի մղելու դժուար, բայց կարեւոր պատասխանատուութիւնը ու այդ ճամբուն մէջ անշեղ պէտք է ընթանայ: Այս երեք մարտահրաւէրները՝ ճշմարտութեան ներկայացումը, դաստիարակութիւնը եւ արեւմտահայերէնի անաղարտ պահպանման ճիգերը «Գանձասար»ին մէջ կ’արտացոլան, կ’արտացոլան յատկապէս այս պարագային Բացառիկին մէջ: Այսօր «Գանձասար»ը սուրիահայ մամուլին մէջ առանձին է, սուրիահայութեան հիմնական ձայնն է : «Գանձասար Բացառիկ»ի հրատարակութիւնը ինքնին բացառիկ երեւոյթ մըն է. բացառիկ է այն իմաստով, որ քաջութիւն ունի հաւաքական ուժականութեամբ հանդէս գալու: Այս առիթով կը շնորհաւորեմ բոլոր գրիչները, որոնք մասնակցած են այս հատորին եւ կը մաղթեմ, բոլոր անոնց, որոնք կարողութիւն ունին գրելու,  չզլանան իրենց յօդուածները տրամադրելու «Գանձասար»ին»:

Այս առիթով Սրբազան Հայրը յայտարարեց, թէ մի ոմն «Գանձասար Բացառիկ»ի հրատարակութեան առիթով, «Գանձասար»ին կը նուիրէ 500.000 ս.ո.:

Խմբագիրը խօսք առնելով յատուկ շնորհակալութիւն յայտնեց Սրբազան Հօր, իր հայրական քաջալերանքին եւ «Գանձասար»ի ողջ ընտանիքին մշտապէս զօրավիգ կանգնելուն ու զանազան առիթներով թերթին առաքելութիւնը շեշտադրելուն համար՝ դիտել տալով, որ նման պահեր յաւելեալ պատասխանատուութեան կը հրաւիրեն ողջ խմբագրակազմը:

Շնորհանդէսին առիթով «Գանձասար»ին շնորհաւորագրեր ուղղած էին ՍՕԽ-ի Շրջ. Վարչութիւնը, ՀՄԸՄ-ի Շրջ. Վարչութիւնը, ՀՄԸՄ-ի Սկաուտ Խորհուրդը, Համազգայինի Սուրիոյ Շրջանային վարչութիւնը, Տպարան «Արեւելք»ի  տնօրէնութիւնն ու Տէր եւ Տիկ. բժիշկ Ղազար Պօղոս:

Աւարտին տեղի ունեցաւ համեստ հիւրասիրութիւն մը եւ ներկաները զրուցելու առիթ ունեցան:

 Թղթակից

 

Share.

Leave A Reply

This site uses Akismet to reduce spam. Learn how your comment data is processed.