ՅԱՐԳԱՆՔ ՍՈՒՄԿԱՅԻԹԻ ԶՈՀԵՐՈՒՆ

0

Կիրակի, 4 Մարտ 2018-ի առաւօտեան, Լաթաքիոյ Ս. Աստուածածին Եկեղեցւոյ մէջ յաւարտ Սուրբ եւ Անմահ Պատարագի, հոգեհանգստեան պաշտօն կատարուեցաւ 1988-ին Փետրուար եւ Մարտ ամիսներուն Սումկայիթ քաղաքին մէջ կատարուած եղեռնագործութեան զոհ գացած հայորդիներու յիշատակին, որմէ ետք ներկայ հաւատացեալները ուղղուեցան «Գանձասար» սրահ, ուր տեղի ունեցաւ ոգեկոչման հանդիսութիւն:

Ներկաները մէկ վայրկեան յոտնկայս յարգելէ ետք նահատակներու յիշատակը, բացման խօսքով հանդէս եկաւ Ռիթա Կաղեան-Տիքպիքեանը: Ան նկատել տուաւ, թէ «Այս տարի 30 ամեակն է Ատրպէյճանի Սումկայիթ քաղաքին մէջ հայ խաղաղ բնակչութեան դէմ թուրք ազերիներու կողմէ գործադրուած բարբարոսութիւններուն եւ ջարդերուն, որոնք իրենց բնոյթով ո՛չ մէկ տարբերութիւն ունէին դար մը առաջ գործադրուած թուրք ոճրային արարքներէն ու ցեղասպանութենէն: Մեր ժողովուրդը այս օրերուն կþոգեկոչէ Սումկայիթի իր նահատակները նաեւ բողոքի ցոյցերով եւ քաղաքական ելոյթներով հանդէս կու գայ աշխարհի բոլոր ծագերուն, Սումկայիթի սպանդին դատապարտումը եւ պատժումը պահանջելով»:

 

Գեղարուեստական յայտագրով իրենց մասնակցութիւնը բերին Ազգ. Սրբոց Նահատակաց Վարժարանի միջնակարգէն խումբ մը աշակերտներ, որոնք «Տունն իմ հայրենի» գեղեցիկ երգը երգելով հմայեցին ներկաները: Ինչպէս նաեւ Անի Պետրոսեանի եւ Սէրլի Հանունիքի կատարողութեամբ ներկաները ունկնդրեցին Վահան Թէքէեանի թուրքին ուղղուած «Պիտի իյնաս» քերթուածը: Ասմունքող աշակերտուհիներու ինքնավստահ կեցուածքն ու ճիշդ առոգանութիւնը տպաւորեց ներկաները:

Օրուան պատգամը փոխանցեց Արժ. Տ. Տաթեւ Ա. Քհնյ. Միքայէլեանը: Ան յետադարձ ակնարկով անդրադառնալով Սումկայիթի դէպքերուն ըսաւ. «Ջարդարար խուժանը ծրագրուած կերպով տունէ-տուն մտնելով կոտորեց հայ անզէն ազգաբնակչութիւնը: Մեր ազգակիցները ենթարկուեցան անարգանքի, հալածանքի եւ սպաննութեան, միայն այն պատճառով, որ Արցախի ժողովուրդը կը հետապնդէր իր օրինական իրաւունքն ու ազատութիւնը»:

Քահանայ Հայրը շեշտեց, որ այսօր աւելի քան որեւէ ժամանակ մենք պէտք է անդրադառնանք, որ իբրեւ ազգութիւն Հայաստանի մէջ կամ սփիւռքի տարածքին պէտք է գիտակցինք, թէ պարտաւոր ենք բռունցք դառնալ, ըլլալ մեր հայրենիքին կողքին եւ մեր ազգին ազատութեան պայքարին մէջ բերենք ամբողջական մասնակցութիւն:

«Հոգւոց» աղօթքով եւ բոլորին կողմէ արտասանուած «Տէրունական աղօթք»ով փակուեցաւ օրուան հանդիսութիւնը:

Թղթակից

Share.

Leave A Reply

This site uses Akismet to reduce spam. Learn how your comment data is processed.