ՄԱՐԶԱԿԱՆ ՄԱՐՏ Բ./2018

0

ՀԱՅԿԱԿԱՆ

ՖԻՏԷ-ի Դասակարգումով Լեւոն Արոնեան Կրկին 5-րդն է

Կրոսմայսդըր Լեւոն Արոնեան ՖԻՏԷ-ի Մարտի 1-ին հրապարակած վարկանիշային աղիւսակին մէջ, կրկին 5-րդ տեղը գրաւեց: Արոնեանի ընթացիկ վարկանիշը, 2794 կէտ է: Հարիւր լաւագոյններուն մէջ Հայաստանի ներկայացուցիչներէն մաս կազմեցին Գաբրիէլ Սարգսեան (66-րդ, 2677), Վլատիմիր Յակոբեան (77-րդ, 2667) եւ Հրանդ Մելքումեան (81-րդ, 2664): Լաւագոյն եռեակին  մաս կազմեցին Մագնուս Կարլսէն (Նորվեկիա, 2843), Շահրիար Մամետեարով (Ատրպէյճան, 2809), Վլատիմիր Կրամնիկ (ՌԴ, 2800): Կանանց վարկանիշային աղիւսակին մէջ Էլինա Դանիէլեան գրաւեց 54-րդ տեղը  (2413), իսկ Լիլիթ Մկրտչեան՝ 63-րդ (2403):

ՄԻՋԱԶԳԱՅԻՆ                                                         

Ծանօթացում Ռուսիա 2018-ի Մասնակից Հաւաքականներու Պատմականին

«ԹԻՒ – 13»

Բերու

Բերուի ֆութպոլի պատմութիւնը ծնունդ առաւ 1922-ին: Այս հինգերորդ անգամն է, որ ան մաս պիտի կազմէ միջազգային ֆութպոլի մրցումներուն նախապէս մաս կազմած է 1930 – 1970 – 1978 – 1982 տարիներուն: 1930-ին ան յաջողեցաւ իր տեղը գրաւել առաջին համաշխարհային ֆութպոլի մրցումներուն եւ դուրս մնաց առաջին հանգրուանէն: Քուփա Ամերիկայի մրցումներուն Բերու 29 անգամ մասնակցեցաւ. Հաւաքականը երկու առիթներով տիրացաւ ախոյեանութեան՝ 1939-ին եւ 1975-ին: Բարձրագոյն յաղթանակով ան պարտութեան մատնեց Էքուատորը՝  9 – 1 արդիւնքով, իսկ մեծագոյն պարտութիւնը կրեց Պրազիլէն՝ 7 – 0 հաշիւով: Հաւաքականին պաշտօնական տարազին գոյնը ճերմակն է, իսկ երկրորդական տարազինը՝ կարմիր: Հաւաքականի մարզիչն է արժանթինցի Ռիքարտօ Ճարիքան:

Իտալիոյ Ֆութպոլի Ազգային Խումբը Նոր Մարզիչ պիտի Ունենայ

Անցեալ շաբթուան ընթացքին, իտալական մամուլը յայտնեց, որ Իտալիոյ ֆութպոլի Դաշնակցութեան մօտ կան երեք թեկնածուներու անուններ, որոնցմէ մէկը պիտի նշանակուի ֆութպոլի ազգային խումբի մարզիչ: Փոխանցուած անուններն են` Անթոնիօ Քոնթէ, Ռոպերթօ Մանչինի եւ Լուիճի Տի Պիաճիօ: Աւելցնենք, որ Իտալիոյ հաւաքականը համաշխարհային ֆութպոլի մրցումներուն մասնակցութեան առիթ չունենալուն պատճառով, Նոյեմբեր 2017-ին Ճիամփիեռօ Վենթուրայ հեռացաւ իր պաշտօնէն, որմէ ետք, ժամանակաւոր մարզիչի պաշտօնը վստահուեցաւ Իտալիոյ երիտասարդական ֆութպոլի ազգային խումբի մարզիչ Լուիճի Տի Պիաճիոյի:

Նէյմարի Վիրաբուժական գործողութիւնը  Յաջողութեան Պսակուեցաւ

Շաբաթ օր, ֆրանսական Փարիզ Սեն Ժերմէնի վարչակազմը պաշտօնապէս յայտարարեց, որ պրազիլցի յարձակողական խաղացող Նէյմարի վիրաբուժական գործողութիւնը յաջողութեամբ պսակուեցաւ: Ըստ ակումբի եւ Պրազիլի հաւաքականի բժշկական կազմին, 26 տարեկան պրազիլցին շուրջ 2 ամիս պիտի բացակայի ֆութպոլի դաշտերէն: Աւելցնենք որ պրազիլցի խաղցողը Մարսէյի դէմ տեղի ունեցած «Լիկ-1»ի մրցումին վիրաւորուեցաւ եւ 77-րդ վայրկեանին փոխարինուեցաւ այլ մարզիկով մը:

Share.

Leave A Reply