«ՏԱՐՕՆԻ ԱՐԾԻՒ»Ը ԳԱՄԻՇԼԻԻ ՄԷՋ

0

Հոկտեմբերի սկիզբը տօնական օր մը եղաւ Գամիշլիի հայութեան համար։ Տարօնի զոյգ միութեանց (Հալէպ եւ Գամիշլի) ֆութպոլի խումբերուն հանդիպումը մեծ խանդավառութիւն ստեղծեց տեղւոյն հայ եւ օտար շրջանակներու մէջ։

Հոկետմբեր 2-ի յետմիջօրէին Գամիշլիի ժողովուրդը խուռներամ  դաշտ խուժեց, չզրկուելու համար ֆութպոլի շատ հետաքրքրական խաղէն, որուն կը սպասէր շաբաթներ առաջ։

Վերջապէս հասած էր ժամը։ Խումբերը դաշտին վրայ կ’ընէին իրենց ցուցադրութիւնները, մինչեւ Քաղաքապետին գալը։ Իրաւարարը Հալէպի նախկին ֆութպոլիստ (ՍԺՍ խումբէն) Պրն. Ճորճ Հասքուրն էր, որ ձեռնհասօրէն վարեց խաղը։

Կողմերը բացառիկ խաղարկութիւն մը կը սկսէին ցոյց տալ շատ լաւ կազմակերպուած յարձակումներով։ Գամիշլիցիք, իրենց թարմ տղաքը գործի լծելով վտանգաւոր իջուածքներ կ’ունենան եւ սքորը կը բանան ճիշդ ութերորդ վայրկեանին՝ իրենց աջ բացին միջոցաւ, որ գնդակը առնելով մինչեւ փոքր քառէն կ’իջնէ եւ 3 մեթր հեռաւորութենէն կը նշանակէ իր խումբին առաջին եւ վերջին կէտը, գնդակը անցնելով Հալէպի բերդապահին սրունքներուն մէջէն։ Խաղը կը վերսկսի, Գամիշլիի խումբը կը փորձէ դարձեալ աքցանի մէջ առնել Հալէպի բերդը, բայց ապարդիւն։ Հալէպի յետսապահ գիծը ոչ միայն սթափած է, այլեւ հակայարձակողականի անցած։ Հալէպցիները, գտած ըլլալով իրենց պաղարիւնութիւնը, խաղի 20-րդ վայրկեանին կը սկսին նեղել Գամիշլիի բերդը։ Նեղ կացութեան մատնուած Գամիշլիցիք հազիւ կը յաջողին հեռացնել գնդակը, բայց հիւրերուն յամառ կամքն ու արագ փասարկութիւնը ի վերջոյ շփոթեցուց տեղացիներու յետսապահ գիծը, եւ ահա յանկարծ ձախ-մէջ՝  Բաբգէն հիանալի կերպով կþօգտագործէ առիթը եւ անայլայլ կէտի կը վերածէ չսպասուած շանտէլ-վոլէ մը, որ կամար կազմելով կ’իջնէ տեղացիներուն բերդին անկիւնը։

Խաղը կը շարունակուի փոխադարձ յարձակումներով՝ մինչեւ կիսախաղ, որ կ’աւարտի 1-1 հաւասար արդիւնքով։

Բ. կիսախաղը կը վերսկսի հիւրերուն աւելի արագ եւ վճռական յարձակողականով։ Ժանօ Մկրտիչեանի ստեղծած քոմպինները մատ խածնելով կու տան տեղացիներուն եւ իսկապէս, յիշեալ խաղացողը արժեցուց իր մէկ  տրիպլինկը՝ նշանակելով անակնկալ կէտ մը։ Արդիւնք՝ 2-1, ի նպաստ Հալէպի։

Գնդակը Գամիշլիին է, որ ամէն ճիգ ի գործ կը դնէ հաւասարելու համար, բայց ի զուր, որովհետեւ իր խաղացողները յոգնած վիճակ մը ունին այլեւ, փոխանցումները ճշգրիտ չեն. հետեւաբար դժուար թէ կարողանային արդիւնքի յանգիլ։ Մանաւանդ որ հիւրերուն յետսապահ գիծը կարծես նոր խաղի իջած՝ ի դերեւ կը հանէ տեղացիներուն բոլոր յարձակումները, միաժամանակ գեղեցիկ փոխանցումներ ընելով առջեւի գծին։

Ու պատահեցաւ անխուսափելին, աջ-մէջ՝ Սարգիս թէեւ չափազանց յոգնած, այսուհանդերձ չփախցուց առիթը նշանակելու իր խումբին վերջին կէտը, սքորը բարձրացնելով 3-1-ի, ի նպաստ Հալէպի Տարօնին։

Խաղը վերջացած է։ Յաղթող խումբը որոտընդոստ ծափահարութեանց ընդմէջէն կ’ուղղուի դէպի քաղաքապետը եւ կը ստանայ տեղւոնյ քաղաքապետարանին կողմէ տրամադրուած բաժակը, իսկ մարզասէր հասարակութիւնը վայելքի գեղեցիկ պահեր ապրելէ վերջ դաշտէն կը մեկնի գոհ տպաւորութեամբ։

Լեւոն Սարգիսեան

Share.

Leave A Reply

This site uses Akismet to reduce spam. Learn how your comment data is processed.