ՀԱԼԷՊԻ Ս. ՔԱՌԱՍՆԻՑ ՄԱՆԿԱՆՑ ԵԿԵՂԵՑՒՈՅ ՄԷՋ ՍՐԲՈՑ ՔԱՌԱՍՆԻՑ ՄԱՆԿԱՆՑ ՈԳԵԿՈՉՈՒՄ

0
 Հալէպի հնադարեան Սրբոց Քառասնից Մանկանց Մայր Եկեղեցւոյ անուանակոչութեան յիշատակութիւնը յատուկ խորհրդաւորութիւն կը զգենու սուրիահայութեան, ի մասնաւորի հալէպահայութեան համար:
Արդարեւ Շաբաթ, 10 Մարտ 2018-ի առաւօտեան ժամը 10:00-ին, հովանաւորութեամբ եւ նախագահութեամբ Բերիոյ Հայոց Թեմի Առաջնորդ Գերշ. Տ. Շահան Սրբ. Արք. Սարգիսեանի, Ս. Քառասնից Մանկանց Մայր եկեղեցւոյ մէջ, մասնակցութեամբ Հալէպի քահանայից դասուն, Ազգային Իշխանութեան ներկայացուցիչներու եւ ուխտաւոր հաւատացեալներու, տեղի ունեցաւ Սրբոց Քառասնից Մանկանց տօնին նուիրուած յատուկ արարողութիւն: Ուխտաւորներ, անսահման կարօտով եւ անհատնում սիրով եկած էին իրենց աղօթքը մատուցելու եւ անցեալի տօնական մթնոլորտը վերապրելու: Ակներեւ էր եկեղեցւոյ ատեանէն մինչեւ վերնատուն եւ ապա եկեղեցւոյ շրջափակ հաւատացեալներուն բազմութիւնը: Պատերազմէն վերջ, անոնք առաջին անգամ ըլլալով համախմբուած էին Սրբոց Քառասնից Մանկանց Մայր եկեղեցւոյ սրբազան կամարներուն ներքեւ, ուստի մխիթարութիւն էր աղօթքի այս հաւաքը` տօնախմբութիւնը: Եկեղեցւոյ զանգին ղօղանջը հոգեպարար պահ ստեղծեց: Առաջնորդ Սրբազան Հօր եւ քահանայ հայրերուն կողմէ կատարուեցաւ սրբոց յիշատակի ժամերգութիւնը: Խնկաբոյր կամարներուն ներքեւ երգուեցաւ սրբոց յիշատակին նուրուած «Այսօր Ընդ Անմարմնոցն» շարականը։ Ուրախութեան արցունքներ գլորուեցան ներկաներուն աչքերէն: ժամերգութեան աւարտին հաւատացեալները միաձայն երգեցին «Տէր Ողորմեա»ն, ապա հալէպահայ նահատակներու անմեր յիշատակին համար աղօթք մատուցուեցաւ առ Աստուած:
Արարողութեան աւարտին Առաջնորդ Սրբազան հայրը ըսաւ. «Երկնաւոր Տէրը այս հրաշալի տօնին առիթով բոլորին աղօթքները ընդունի, ուխտերը կատարէ, մեր ընտանիքները իր շնորհքին մէջ պահէ, պատմական այս աղօթատան վերաշինութեան գործերը յաջողցնէ եւ իր բարի կատարումին հասցնէ»:
Առաջնորդ Սրբազան Հայրը ներկաները հրաւիրեց գոհաբանական ու փառաբանական աղօթք բարձրացնելու առ Աստուած եւ խնդրելու, որ դարաւոր պատմութիւն ունեցող մայր եկեղեցին ու մեր բոլորին սիրելի եկեղեցիները, դպրոցները, տուները եւ գործատեղիները վերաշինուին:
Արարողութեան աւարտին, «Պահպանիչ» աղօթքով եւ Տէրունական «Հայր Մեր»ի երգեցողութեամբ հաւատացեալները խաղաղութեամբ եւ ցնծութեամբ մեկնեցան իրենց բնակարանները:
Թող Ս. Քառասնից Մանկանց հաւատքի ջահը անմար մնայ մեր սրտերուն մէջ. անոնց հաւատքի վկայութիւնը մեզ մղէ հոգեւոր վերականգնումի, աղօթասիրութեան եւ եկեղեցասիրութեան, որպէսզի կառչած մնանք մեր «Հոգիի Ծննդավայր»ին՝ հայ առաքելական եկեղեցւոյ:
 
Եզնիկ Քհնյ. Զղջանեան
Խորէն Քհնյ. Պէրթիզլեան
Share.

Leave A Reply