ՍՓԻՒՌՔԻ ԴԱՇՆԱԿՑԱԿԱՆ ՄԱՄՈՒԼԻ ՊԱՏԱՍԽԱՆԱՏՈՒՆԵՐԸ ՀԱՆԴԻՊԵՑԱՆ  ՀԱՅԱՍՏԱՆԵԱՆ ՄԱՄՈՒԼԻ ՆԵՐԿԱՅԱՑՈՒՑԻՉՆԵՐՈՒն  ՀԵՏ

0

Հայաստանի մէջ տեղի ունեցած է Դաշնակցական  մամուլի եւ հանրային կապերու պատասխանատուներու համակուսակցական խորհրդաժողովը, որու ընթացքին քննարկուած են հայկական ու կուսակցական մամուլի, համաշխարհային մակարդակով հայկական հարցերու լուսաբանումին, ատրպէյճանական ու թրքական քարոզչութեան հակազդելու շուրջ շարք մը հարցեր:

Երէկ` համաժողովի վերջին օրը, մասնակիցները իրենց քննարկումները կատարած են` հանդիպելով հայաստանեան լրատուամիջոցներու ներկայացուցիչներուն հետ: Ներկայ էր նաեւ Հայաստանի Լրագրողներու Միութեան նախագահ Սաթիկ Սեյրանեան:

ՀՅԴ Բիւրոյի հանրային կապերու գրասենեակի պատասխանատու Արտակ Սարգսեան յայտնեց.« Հայաստան կը գտնուին աշխարհի 15 երկիրներէ ՀՅԴ լրատուամիջոցներու պատասխանատուներ: Կը քննարկէինք ոչ միայն ներկուսակցական հարցերը քարոզչական ճակատի վրայ, այլեւ ընդհանուր` համազգային հարցեր, զորս ունինք արտաքին եւ ներքին հարթակներուն վրայ», ըսաւ Սարգսեան:

ՀՅԴ Գերագոյն Մարմինի ներկայացուցիչ Աղուան Վարդանեան ափսոսաց, որ ինք Հայաստան չէ եղած եւ չէ կրցած մասնակցիլ դաշնակցական մամուլի հերթական խորհրդաժողովին:  «Իրոք, այս խորհրդաժողովները, որոնք պարբերաբար տեղի կ’ունենան երկու տարին անգամ մը, կը գումարուին ամփոփելու եւ լաւ առիթ են նոր հորիզոններ բանալու: Ուրախութեամբ կը տեսնեմ, որ նաեւ դաշնակցական մամուլի ներկայացուցիչներու սերնդափոխութիւնը ակնյայտ է. երիտասարդութիւնը կամաց-կամաց իր տեղը կը գրաւէ, եւ վստահ եմ, որ խորհրդաժողովը ծառայած է իր բուն նպատակին», ըսաւ Վարդանեան:

Անդրադառնալով խորհրդաժողովի մասնակիցներուն` հայաստանեան լրատուամիջոցներու ներկայացուցիչներու հետ հանդիպումին` Վարդանեան յայտնեց, որ ան շատ կարեւոր է: «Ասիկա այն դաշտն է, ուր անջրպետներ, բաժանումներ չկան: Դուք իշխանութիւն էք, դուք իշխանութեան համակարգ մըն էք, եւ պիտի կարենանք միասնաբար լուծել այն հարցերը, որոնք կան մեր հասարակութեան, պետականութեան, Սփիւռքի, Արցախի դէմ` համատեղ, միմեանց աջակցելով եւ լրացնելով: Բնական է` մօտեցումները տարբեր են, ամէն մէկը իրականութեան կը նայի իր աշտարակէն, բայց այս դաշտին մէջ համախոհութիւնն ու համագործակցութիւնը շատ կարեւոր են: Ուրախ կ’ըլլամ, որ այսօրուան անմիջական շփումներէն ետք ուղղակի կապեր հաստատուին մեր տարբեր լրատուամիջոցներու միջեւ, ամէնօրեայ կապեր ըլլան, իրար փոխանցէք գաղափարներ եւ կարենաք մեր երկիրը, հասարակութիւնը աւելի լաւ  դարձնել», ընդգծեց ան:

Հայաստանի Լրագրողներու Միութեան նախագահ Սաթիկ Սեյրանեան   ընտրուելով այդ կառոյցի նախագահ, ելոյթին ընթացքին շեշտած է Սփիւռքի մամուլի  կարեւորութիւնը: «Առաջին հերթին կարեւոր կը նկատեմ մասնագիտական առումով: Մենք տարբեր երկիրներու մէջ կ’աշխատինք, եւ մեզի համար շատ կարեւոր է փորձի փոխանակումը մասնագիտական մակարդակով: Յունիսի սկիզբը տեղի պիտի ունենայ արտահերթ համագումար, որուն ընթացքին պիտի ներկայացուի նոր կանոնադրութիւնը: Այդտեղ առանձին հատուած մը պէտք է ըլլայ սփիւռքեան մամուլի հետ համագործակցութեան շուրջ»,- տեղեկացուց ան, ապա աւելցուց, որ Սփիւռքն ալ ներկայութիւն պէտք է ըլլայ հոն, որպէսզի ծանօթանան եւ առաջարկներ ներկայացնեն յունիսեան համագումարին:

Սեյրանեան նաեւ կոչ ուղղեց, որպէսզի ՀՅԴ սփիւռքեան մամուլի ներկայացուցիչներն ալ անդամակցին Հայաստանի Լրագրողներու Միութեան:

Share.

Leave A Reply

This site uses Akismet to reduce spam. Learn how your comment data is processed.