ՃԱԱՖԱՐԻ. «ՍՈՒՐԻԱԿԱՆ ԲԱՆԱԿԻՆ ՔԻՄԻԱԿԱՆ ԶԷՆՔԵՐ ՕԳՏԱԳՈՐԾԵԼՈՒՆ ՇՈՒՐՋ ՈՒԱՇԻՆԿԹԸՆԻ ԵՒ ԱՆՈՐ ԴԱՇՆԱԿԻՑՆԵՐՈՒՆ ՀՐԱՊԱՐԱԿԱԾ ԱՊԱՏԵՂԵԿԱՏՈՒՈՒԹԵԱՆ ՆՊԱՏԱԿԸ ԱՀԱԲԵԿԻՉՆԵՐԸ ՊԱՇՏՊԱՆԵԼ Է ՊԱՐԶԱՊԷՍ»

0

ՄԱԿ-ի մօտ Սուրիոյ մնայուն ներկայացուցիչ դոկտ. Պաշշար ալ Ճաաֆարի «Սփութնիք» լրատու գործակալութեան հետ ունեցած հարցազրոյցին ընթացքին հաստատեց, որ ԱՄՆ-ի եւ անոր դաշնակիցներուն հրապարակած զրպարտութիւնը՝ Արեւելեան Ղութայի մէջ սուրիական բանակին քիմիական զէնքեր օգտագործած ըլլալուն մասին, կը միտի պաշտպանել զինեալ ահաբեկչական խմբաւորումները եւ խոչընդոտել սուրիական բանակին յառաջխաղացքը՝ դիտել տալով, որ անոնք յաճախ այս խաղաքարտը կ՚օգտագործեն Սուրիոյ պետութեան վրայ ճնշում բանեցնելու համար:

Ճաաֆարի ըսաւ, որ Սուրիոյ կառավարութիւնը աւելի քան 140 նամակ յղած է ՄԱԿ-ի Ապահովութեան Խորհուրդին եւ քիմիական զէնքերու կանխարգիլման կազմակերպութեան, որոնց մէջ յստակ փաստագրումներ կատարած է զինեալ ահաբեկչական խմբաւորումներուն մօտ քիմիական զէնքերու գոյութեան մասին, սակայն այդ նամակներուն բովանդակութիւնը նկատի չէ առնուած խորհուրդին կողմէ:
Տարածաշրջանային կարգ մը կազմակերպութիւններու Սուրիոյ մէջ ահաբեկչական խմբաւորումներուն աջակցած ըլլալուն անդրադառնալով, Ճաաֆարի ըսաւ. «Սէուտական Արաբիա, Քաթար եւ Արաբական Ծոցի կարգ մը երկիրներ նիւթապէս կ՚օժանդակեն Սուրիոյ մէջ զինեալ ահաբեկչական խմբաւորումներուն՝ Սուրիոյ պատերազմը երկարաձգելու եւ տագնապը սրելու համար: Թուրքիա, իր կարգին, կը զօրակցի զինեալ այսպիսի խմբաւորումներու՝ իր սահմանը լայնօրէն բանալով անոնց դիմաց ու հազարաւոր ահաբեկիչներ Սուրիա ղրկելով։ Աւելին. անոնց մարզելու համար զօրանոցներ հաստատելով եւ քիմիական զէնքերու օգտագործման միջոցներ ստեղծելով այդ խումբերուն համար»:

Share.

Leave A Reply