ՆԱԼՊԱՆՏԵԱՆԻ ՊԱՇՏՕՆԱԿԱՆ ԱՅՑԵԼՈՒԹԻՒՆԸ ՍԹՈՔՀՈԼՄ

0

Հայաստանի արտաքին գործոց նախարարութեան մամլոյ, տեղեկատուութեան եւ հասարակայնութեան հետ կապի վարչութենէն կը տեղեկացնեն, որ պաշտօնական այցելութեամբ Սթոքհոլմ գտնուող Հայաստանի արտաքին գործոց նախարար Եդուարդ Նալպանտեան հանդիպում ունեցաւ Շուէտի առաջնակարգ վերլուծական կեդրոններու՝ Սթոքհոլմի Միջազգային Խաղաղութեան Ուսումնասիրութեան Կեդրոնի, Միջազգային Յարաբերութիւններու Շուէտական Հիմնարկի, Ուփսալայի Համալսարանի Խաղաղութեան եւ Հակամարտութիւններու Ուսումնասիրման Կեդրոնի, «Եարլ Հեալմարսըն» Հիմնարկի ղեկավարութեան եւ բարձրաստիճան դիւանագէտներու հետ:

Հանդիպումի ընթացքին, Եդուարդ Նալպանտեան ներկայացուց Հայաստանի արտաքին քաղաքական առաջնահերթութիւնները, անդրադարձաւ հայ-շուէտական յարաբերութիւններու զարգացումի ուղղութեամբ ձեռնարկուող քայլերուն:

Արտաքին գործոց նախարարը արժեւորեց Շուէտի հետ համագործակցութիւնը՝ երկկողմանի եւ բազմակողմսնի ձեւաչափերով, կարեւոր համարելով փոխգործակցութիւնը Հայաստան-Եւրոպական Միութիւն յարաբերութիւններու եւ մասնաւորապէս Արեւելեան գործընկերութեան ծիրին մէջ։ Նախարար Նալպանտեան անդրադարձաւ Հայաստան-Եւրոպական Միութիւն Համապարփակ եւ ընդլայնուած համաձայնագիրին ու անոր հետ կապուած համագործակցութեան հեռանկարներուն:

Նախարարը ներկաներուն ներկայացուց ղարաբաղեան հիմնահարցի բացառապէս խաղաղ կարգաւորման ուղղուած Հայաստանի եւ ԵԱՀԿ Մինսքի խումբի համանախագահ երկիրներուն համատեղ ջանքերը, ինչպէս նաեւ տարածաշրջանային եւ միջազգային շարք մը հրատապ հարցերու շուրջ Հայաստանի մօտեցումները:

Հայաստանի արտաքին քաղաքական գերատեսչութեան ղեկավարը պատասխանեց ներկաներու բազմաթիւ հարցումներուն, որոնք կ’առնչուէին կովկասեան եւ յարակից տարածաշրջաններու մէջ տեղի ունեցող իրադարձութիւններուն եւ միջազգային հարթակին վրայ կատարուող գործընթացներուն:

Share.

Leave A Reply

This site uses Akismet to reduce spam. Learn how your comment data is processed.