ՓԱՅԼԱՆ ՏՐԱՊԻԶՈՆԻ ԵԿԵՂԵՑՒՈՅ ՎՐԱՅ ՅԱՐՁԱԿՈՒՄԻ ՀԱՐՑՈՎ ԿԸ ԴԻՄԷ ՆԱԽԱՐԱՐԻՆ

0

«Պիանէթ» լրատուական կայքը կը հաղորդէ, որ Թուրքիոյ քրտամէտ Ժողովուրդներու Ժողովրդավարական  Կուսակցութեան հայ պատգամաւոր Կարօ Փայլան 13 Մարտին, ներքին գործոց նախարար Սուլէյման Սոյլույէն յստակացում պահանջած է 6 Մարտին, Տրապիզոնի Սանթա Մարիա կաթողիկէ եկեղեցւոյ վրայ կատարուած յարձակումին առնչութեամբ։

Փայլան նախարարին ներկայացուցած դիմումին մէջ անդրադարձած է նախորդ տարիներուն նոյն եկեղեցւոյ վրայ կատարուած յարձակումներուն: Յատկապէս, ան յիշեցուցած է, որ 2006-ին հոն սպանուած էր եկեղեցւոյ քահանան՝ Անտրէա Սանթորօ, իսկ  Յունուար 2011-ին, եկեղեցին սպառնալիքներ ստացած էր, անոր գմբէթին խաչին համար: Եկեղեցւոյ վրայ նետուած էին շիշեր, որոնցմէ մէկուն մէջ եղած էր հետեւեալ գրութիւնը. «Եկեղեցւոյ գլխու խաչը կա՛մ դուք իջեցուցէք, կա՛մ մենք պիտի իջեցնենք»:

Այլ յարձակում մը տեղի ունեցած էր 15 Յուլիս 2016-ի ռազմական յեղաշրջման փորձէն ետք, երբ խումբ մը անձեր քարեր նետած էին եկեղեցւոյ վրայ՝ կոտրելով ապակիները. փորձ կատարուած էր նաեւ եկեղեցւոյ դուռը քանդելու:

«2006-էն ի վեր տեղի ունեցած իրադարձութիւնները ցոյց կու տան, որ եկեղեցւոյ վրայ համակարգուած յարձակումները կը շարունակուին», ըսած է Փայլան:

Ան հետաքրքրուած է նախարարէն, թէ արդեօք այդ յարձակումներուն առնչութեամբ հետաքննութիւն սկսա՞ծ է, եւ կամ ձեռնարկուա՞ծ են քայլեր՝ եկեղեցւոյ աապահովութիւնը երաշխաւորելու համար։ Ան հարց տուած է, թէ որո՞նք են 6 Մարտի յարձակումին կասկածեալները եւ թէ ինչո՛ւ այդ յարձակումը չէ կանխուած:

Փայլան փորձած է ճշդել նաեւ, թէ թրքական իշխանութիւնները քայլեր ձեռնարկա՞ծ են Տրապիզոնի մէջ երաշխաւորելու 2006-էն ի վեր յարձակումներու ենթարկուող քրիստոնեայ բնակչութեան ապահովութիւնը, ինչպէս նաեւ կանխելու ընդհանուր առմամբ Թուրքիոյ մէջ ատելութեան հողի վրայ իրականացուող յանցագործութիւնները, որոնց թիւը տարուէ տարի կը շարունակէ աճիլ:

Share.

Leave A Reply

This site uses Akismet to reduce spam. Learn how your comment data is processed.