Վարչապետ Կարէն Կարապետեանի պաշտօնական այցելութիւնը Լիբանան

0

Հայաստանի վարչապետ Կարէն Կարապետեան 12 Մարտին պաշտօնական այցելութեամբ ժամանեց Լիբանան, ուր հանդիպումներ ունեցաւ իշխանութեան երեք պետերուն հետ, որոնց հետ ընդգծեց երկկողմանի յարաբերութիւններն ու գործակցութիւնը ամրապնդելու անհրաժեշտութիւնը։

Վարչապետ Կարապետեան եւ անոր ընկերակցող պատուիրակութիւնը, որուն մաս կազմեցին Հայաստանի Հանրապետութեան տարածքային կառավարման եւ զարգացման նախարար Դաւիթ Լոքեան, տնտեսական զարգացման եւ ներդրումներու նախարար Սուրէն Կարայեան, Սփիւռքի նախարար Հրանոյշ Յակոբեան, Հայաստանի գիւղատնտեսութեան  նախարար Իգնատի Առաքելեան, արտաքին գործոց փոխնախարար Արման Պապիկեան, Հայաստանի ուժանիւթի ենթակառուցուածքներու եւ բնական պաշարներու փոխնախարար Հայկ Յարութիւնեան, Լիբանանի մօտ Հայաստանի դեսպան Սամուէլ Մկրտչեան եւ «Փիւնիկ» մարդկային պաշարներու զարգացման համահայկական հիմնադրամի Հոգաբարձուներու խորհուրդի նախագահ եւ յատուկ յանձնառութիւններու արտակարգ եւ լիազօր դեսպան դոկտ. Լեւոն Սարգսեան Պէյրութի միջազգային օդակայանէն ուղղուեցան վարչապետարան:

Վարչապետ Սաատ Հարիրի վարչապետարանի մուտքին պաշտօնական արարողութեամբ դիմաւորեց հայաստանցի իր պաշտօնակիցը եւ անոր ընկերակցող պատուիրակութեան հետ ձեռնուելէ ետք, դռնփակ հանդիպում մը ունեցաւ Կարէն Կարապետեանի հետ:

Ապա տեղի ունեցաւ ընդարձակ հանդիպում մը, որուն ներկայ գտնուեցան նաեւ կիներու հարցերու պետական նախարար Ժան Օղասապեան եւ մշակոյթի նախարար Ղաթթաս Խուրի:

Հանդիպումէն ետք Կարապետեան յայտնեց, որ Հարիրիի հետ իր քննարկումները ընթացան դրական եւ փոխադարձ վստահութեան մթնոլորտի մէջ:

Կարէն Կարապետեան հաստատեց, որ երկու երկիրներուն միջեւ տնտեսական յարաբերութիւնները քաղաքականէն բաւական հեռու են՝ աւելցնելով, որ Հայաստան հսկայ ներուժ ունի այդ յարաբերութիւններու ամրապնդման առումով:

Այս շրջագիծին մէջ, վարչապետ Կարապետեան առաջարկեց Լիբանանի եւ Հայաստանի միջեւ ներդրումներուն զօրակցող լիբանանեան-հայկական միացեալ ֆոնտ մը հիմնել:

Կարէն Կարապետեան անդրադարձաւ լիբանանահայութեան դերակատարութեան, իւրաքանչիւր լիբանանահայ նկատելով Հայաստանի դեսպանը Լիբանանի մէջ եւ վարչապետ Հարիրիի փոխանցեց Հայաստան այցելութեան հրաւէր մը:

Հարիրի հայերէնով «բարի եկաք» ըսաւ վարչապետ Կարապետեանին: Ան յայտնեց, որ Հայաստանի վարչապետին հետ իր հանդիպումը հոյակապ եղած է: «Վարչապետ Կարապետեանի Լիբանան այցելութիւնը կը յաջորդէ հանրապետութեան նախագահ զօր. Միշէլ Աունի Հայաստան կատարած պաշտօնական այցելութեան, եւ այդ մէկը կը փաստէ, որ երկկողմանի յարաբերութիւնները բարելաւելու աշխատանքը որքան կարեւոր է Լիբանանի եւ Հայաստանի համար», ըսաւ Հարիրի եւ շեշտեց, որ Լիբանանի եւ Հայաստանի, ինչպէս նաեւ լիբանանցի եւ հայ ժողովուրդներուն միջեւ պատմական եւ ամուր յարաբերութիւններ գոյութիւն ունին՝ շնորհիւ լիբանանահայութեան, որ Լիբանանը բաղկացնող հանգոյցին անբաժանելի մէկ մասնիկն է, ինչպէս նաեւ Լիբանանի պետական հաստատութիւններուն մէջ լիբանանահայեր բարձր պաշտօններ կը վարեն:

Հարիրի շեշտեց, որ հայաստանցի իր պաշտօնակիցին հետ համաձայնած է ամրապնդել երկկողմանի յարաբերութիւնները բոլոր մարզերուն մէջ եւ բոլոր մակարդակներուն վրայ:

Հանրապետութեան նախագահ զօր. Միշել Աուն նոյնպէս ընդունեց վարչապետ Կարապետեան, որուն ներկայութեան ան ողջունեց Լիբանանի եւ Հայաստանի միջեւ ներդրումներուն զօրակցող լիբանանեան-հայկական միացեալ հիմնարկ մը հիմնելու ծրագիրը, ինչպէս նաեւ արեւու ճառագայթներով վերանորոգուած ներուժ ստանալու ծրագիրները: Նախագահ Աուն հաստատեց, որ ինք շատ ուրախ է երկկողմանի յարաբերութիւններու աշխուժացման եւ գործնականացման համար, ինչպէս անցեալ ամիս Հայաստան կատարած իր այցելութեան ընթացքին կնքուած համաձայնութեամբ:

Նախագահ Աուն ընդգծեց լիբանանահայութեան ազդու դերակատարութիւնը՝ լիբանանեան ազգային եւ քաղաքական կեանքին մէջ:

Իր կարգին, վարչապետ Կարապետեան հաստատեց, որ Լիբանան-Հայաստան միացեալ գերագոյն յանձնախումբը՝ տարիներու դադարէ ետք, մօտիկ ապագային պիտի վերսկսի իր ժողովներուն:

Վարչապետ Կարապետեան այցելեց նաեւ խորհրդարանի նախագահ Նեպիհ Պըրրիին, որուն հետ քննարկեց Հայաստանի եւ Լիբանանի խորհրդարաններուն միջեւ գործակցութիւնը աշխուժացնելու հեռանկարները, ինչպէս նաեւ շրջանային իրադարձութիւնները:

Երեկոյեան, վարչապետ Հարիրի վարչապետարանին մէջ ընթրիք մը սարքեց ի պատիւ Կարէն Կարապետեանի եւ անոր ընկերակցող պատուիրակութեան:

Վարչապետ Կարապետեան Լիբանանի մէջ Հայաստանի դեսպանատան մէջ հանդիպում մը ունեցաւ լիբանանահայութիւնը ներկայացնող հոգեւոր, ազգային եւ կուսակցական պատասխանատուներու եւ լիբանանահայ գործարար շրջանակի ներկայացուցիչներու հետ:

Հանդիպումին ընթացքին վարչապետ Կարապետեան գոհունակութիւն յայտնեց, որ Հայաստանի եւ Լիբանանի միջպետական յարաբերութիւնները ամրապնդելու շրջագիծին մէջ նաեւ զարկ կը տրուի տնտեսական ծրագիրներու գործադրութեան:

Վարչապետ Կարապետեան ներկայացուց Հայաստանի տնտեսական քաղաքականութիւնը` ընդգծելով, որ Հայաստանի մէջ սկսած է տնտեսական աճ արձանագրուիլ, եւ աւելցուց, որ տնտեսական բարգաւաճումն ու զարգացումը հետզհետէ աւելի տեսանելի պիտի դառնան բոլորին:

Հայաստանի Հանրապետութեան վարչապետ Կարէն Կարապետեանի Լիբանան այցելութեան երկրորդ օրը սկսաւ հայ գործարարներու հետ նախաճաշով: Հայաստանի զարգացման հեռանկարներու եւ առկայ խնդիրներու շուրջ զրոյցներ եւ միտքերու փոխանակում տեղի ունեցան: Վարչապետ Կարէն Կարապետեան հաստատեց, որ Հայաստանի գլխաւոր առաւելութիւններէն մէկը ուժեղ սփիւռքի առկայութիւնն է` հայրենակիցներ, որոնք անկախ իրենց գտնուելու վայրէն անհանգիստ են իրենց հայրենիքի ապագային  համար

Ճաշի մը ընթացքին վարչապետը եւ անոր ընկերակցող պետական պատուիրակութիւնը հանդիպում ունեցան Լիբանանի Կեդրոնական դրամատան կառավարիչին եւ լիբանանեան դրամատուներու գործադիր տնօրէններուն հետ: Վարչապետը ներկայացուց Հայաստանի տնտեսութեան պատկերը եւ ներդրումային միջավայրը, նախորդ տարուան ընթացքին արձանագրուած ցուցանիշները, Հայաստանի միջոցով այլ շուկաներ մուտք գործելու կարելիութիւնները:

Օրուան ընթացքին վարչապետ Կարէն Կարապետեանն ու անոր  ընկերակցող պետական պատուիրակութիւնը այցելեցին Հայկազեան համալսարան, ուր ծանօթացան համալսարանի զանազան բաժիններուն, ծրագիրներուն: Անոնք հանդիպում մը ունեցան Հայկազեան համալսարանի նախագահ վեր. դոկտ. Փոլ Հայտոսթեանին հետ եւ քննարկեցին Հայաստանն ու Սփիւռքը յուզող հարցեր: Այցելութեան առիթով վեր. դոկտ. Փոլ Հայտոսթեան յուշանուէր մը յանձնեց վարչապետ Կարէն Կարապետեանին:

Վարչապետ Կարէն Կարապետեանն ու անոր ընկերակցող պետական պատուիրակութիւնը այցելեցին նաեւ Զմմառու պատմական վանք, ուր դիմաւորուեցան Հայ կաթողիկէ համայնքի Պէյրութի պատրիարքական թեմի օգնական եպիսկոպոս Գէորգ եպս. Ասատուրեանի եւ Զմմառու պատրիարքական կղերի միաբանութեան անդամներուն կողմէ: Հիւրերը շրջեցան Զմմառու վանքի զանազան բաժանմունքները, այցելեցին մատենադարան եւ թանգարան: Զմմառու վանքի եկեղեցւոյ մէջ վարչապետ Կարէն Կարապետեանին նուիրուեցաւ Զմմառու Տիրամօր սրբապատկերը:

 

Share.

Leave A Reply

This site uses Akismet to reduce spam. Learn how your comment data is processed.