ԽՄԲԱԳՐԱԿԱՆ՝ Մարտ Դ./2018.ՁԻԹԵՆԻԻ ՃԻՒՂԸ ՄԻՆՉԵՒ Ո՞ՒՐ

0

Թուրքիա Սուրիայէն Իրաք կ’երկարէ ձիթենիի իր արիւնոտ ճիւղը: Աֆրինէն ետք, արաբական այլ տարածքներ ենթակայ կ’ըլլան թրքական բռնագրաւումին եւ հրթիռակոծումին: Անգարա կը յառաջանայ իր երկրին եւ քաղաքացիներուն ապահովութեան լոզունքները հնչեցնելով, միեւնոյն ատեն, սակայն, կոտորածի կ’ենթարկէ քիւրտերը ողջ աշխարհին աչքին առջեւ: Այս իմաստով Աֆրինի պատկերները կրնան կրկնուիլ նաեւ Իրաքի հիւսիսային շրջանին մէջ, եւ  դէպքերու ընթացքին հետեւողը կը համոզուի, որ այս բոլորը կրնան իրականանալ առանց միջազգային կամ տարածաշրջանային լուրջ դատապարտումներու:

Այս թոհուբոհին մէջ, սակայն, կ’անտեսուի՞ն տարածքներ գրաւելու եւ դրացի երկիրներու գերիշխանութիւնը ոտնակոխ ընելու Թուրքիոյ նկրտումները:

Վերջին շրջանին, ԱՄՆ-ի եւ Թուրքիոյ յայտարարութիւններուն մէջ Թուրքիոյ քայլը արդարացնող արտայայտութիւններ կը հնչեն: Ուաշինկթըն մէկ կողմէ կը հաստատէ, որ Թուրքիա իր ռազմավարական գործընկերն է, միւս կողմէ համաձայն չի գտնուիր Սուրիոյ մէջ ՆԱԹՕ-ի միջամտութիւնը պահանջող Թուրքիոյ առաջարկին, միեւնոյն ատեն, սակայն, արգելք չի հանդիսանար Աֆրինի մէջ «ձիթենիի ճիւղ» կոչուած գործողութեան: Փենթակոնի մամլոյ խօսնակին համաձայն, ԱՄՆ ամէն ջանք ի գործ կը դնէ նաեւ թրքական ուժերուն հետ Սուրիոյ մէջ բախում չունենալու համար:

Այս մօտեցումները մտածել կու տան, որ թրքական «ձիթենիի ճիւղ»ին դէպի  Իրաք երկարիլը կը ծառայէ նաեւ ԱՄՆ-ի  նպատակին՝ Պաղտատը, Դամասկոսը, Թեհրանը եւ Պէյրութը միացնող կապը խզելու: ԱՄՆ կրնայ աչք գոցել Թուրքիոյ այս թափանցումներուն ի տես՝ միայն իր շահերուն ծառայեցնելով զանոնք եւ ըստ կարելւոյն տկարացնելով Ռուսիոյ ազդեցութիւնը տարածաշրջանին վրայ: Միւս կողմէ, տարածաշրջանի երկիրները բնականաբար հաշտ աչքով պիտի չդիտեն շրջանին մէջ անկախութեան ձգտող որեւէ շարժում, ուստի դատապարտելով մէկտեղ Թուրքիոյ յառաջխաղացքը իրենց երկիրներուն տարածքային ամբողջականութիւնը առաջնահերթութիւն պիտի համարեն, բնականաբար:

Ղութայի ազատագրումն ու սուրիական բանակին դէպի Իտլիպ ուղղուիլը երկրի տարածքին քայլ առ քայլ ազատագրումին կը ծառայեն: Սուրիա, միեւնոյն ատեն կը դատապարտէ թրքական ներխուժումը, որովհետեւ քաջ գիտէ, որ Թուրքիա անվստահելի է եւ սուրիական տարածքներ գրաւելու նկրտումներ ունեցած է մշտապէս:

Այլ հարթակի վրայ, ռուսական ներկայութիւնը կը կաշկանդէ Թուրքիոյ նկրտումները: Ռուսիա Սուրիոյ տարածքային ամբողջականութեան պաշտպանն է տագնապի առաջին իսկ օրէն: Ինչ որ անհաւանական կը դարձնէ Սուրիոյ մէջ տարածուելու Թուրքիոյ ձգտումներուն իրականացումը: Թուրքիա չէզոքացնել փորձելով քրտական գործօնը, Սուրիոյ հիւսիսային շրջանին մէջ ժողովրդագրական փոփոխութիւններ յառաջացնելու, քրտաբնակ շրջաններուն մէջ իր սահմանին բնակութիւն հաստատած սուրիացի փախստականներ տեղադրելու փորձերուն կրնայ դիմել առաւելագոյն պարագային:

Այսուհանդերձ, Թուրքիա կը շարունակէ մնալ անվստահելի դերակատար սուրիական տագնապի լուծման տարբեր փուլերուն:

«Գ.»

Share.

Leave A Reply