ՍՈՒՐԻՈՅ ԽՈՐՀՐԴԱՐԱՆԻ ԵՐԵՍՓՈԽԱՆ ԺԻՐԱՅՐ ՐԷԻՍԵԱՆ ԿԸ ՄԱՍՆԱԿՑԻ ՈՒՂՂԱՓԱՌՈՒԹԵԱՆ ՄԻՋԽՈՐՀՐԴԱՐԱՆԱԿԱՆ ՎԵՀԱԺՈՂՈՎԻՆ

0

«Ազդակ».-Երկուշաբթի, 2 Ապրիլին, Լիբանանի «Մոնրօ» պանդոկին մէջ տեղի ունեցաւ Ուղղափառութեան միջխորհրդարանական վեհաժողովը, որուն մասնակցող 8 հոգինոց սուրիական պատուիրակութեան մաս կը կազմէր սուրիահայութիւնը ներկայացնող երեսփոխան Ժիրայր Րէիսեան: Առաջին նիստին, որուն կը մասնակցէին կազմակերպութեան վարչութեան եւ յանձնախումբերու նախագահներն ու զեկուցաբերները, նիւթը կը կեդրոնանար Թուրքիոյ շրջանային քաղաքականութեան եւ գործադրած միջամտութիւններուն վրայ: Զեկուցաբերները անդրադարձան յատկապէս Միջին Արեւելքի մէջ Թուրքիոյ կողմէ կատարուած զինուորական միջամտութիւններուն` բուռն քննադատութեան ենթարկելով վերջին շրջանին Աֆրինի մէջ Թուրքիոյ զինուորական ներխուժումը: Անոնք պահանջ ներկայացուցին, որ 4 ապրիլին տեղի ունենալիք ժողովի փակման յայտարարութեան մէջ յստակօրէն դատապարտուի Թուրքիոյ յարձակողապաշտութիւնը: Սուրիոյ խորհրդարանի երեսփոխան Ժիրայր Րէիսեան խօսք առնելով ընդգծեց, որ Թուրքիոյ վարած քաղաքականութիւնը հակաքրիստոնէական ըլլալէ անդին նաեւ հակամարդկային է` թուելով Սուրիոյ արդիւնաբերական, շինարարական եւ ենթակառոյցներու քանդումին պատճառները, որոնք թէ՛ ուղղակի եւ թէ անուղղակիօրէն կատարուած են Թուրքիոյ կողմէ, որ 100 երկիրներէ աւելի եկած ահաբեկչական խմբաւորումներու անդամները զինած, անոնց ապաստան եւ նիւթական միջոցներ տրամադրած էր՝ այս բոլորը ծառայեցնելով Սուրիոյ կործանումին, եկեղեցական-կրօնական եւ մշակութային քանդումին՝ մէջբերելով Հալէպի մէջ գտնուող իսլամական ձեռագիրներու ոչնչացման օրինակը, որուն պատճառը Թուրքիան եղած է: Յիշենք, որ զանազան երկիրներու երեսփոխաններ նոյնպէս խօսքեր առին եւ անդրադարձան Թուրքիոյ ապակառուցողական քաղաքականութեան:

Share.

Leave A Reply

This site uses Akismet to reduce spam. Learn how your comment data is processed.