ՌՈՒՄԲԵՐՈՒ ՏԱԿ ՍՏԵՂԾՈՒԱԾ ԱՐՈՒԵՍՏԸ

0

«Ռումբերու Տակ Ստեղծուած Արուեստը»: Այսպիսի իմաստալից խորագիրով Համազգայինի «Ն.Աղբալեան» Մասնաճիւղի «Մուշեղ Իշխան» Գրական Յանձնախումբը, Համազգայինի հիմնադրութեան 90-ամեակի ծիրէն ներս, նախաձեռնեց մշակութային գործունէութեան խորհուրդը ներկայացնող ձեռնարկ մը, որ տեղի ունեցաւ Ուրբաթ, 23 Մարտ 2018-ի երեկոյեան ժամը 6:30-ին, ԱՄԺ Տան «Լ. Շանթ» սրահէն ներս, շուրջ երկու հարիւր յիսուն հանդիսատեսներու ներկայութեամբ:

Նախքան յայտագիրը ներկաները ըմբոշխնեցին  Յովհաննէս Թումանեանի «Անուշ» օփերայէն հատուածներու ընթեցումով: Ձեռնարկը ընդգրկեց գեղանկարներու, քանդակներու ցուցադրութիւն, ճարտարապետական գործերու, գրական պատառիկներու ընթերցումներ եւ գեղարուեստական կոկիկ յայտագիր մը:

Սուրիոյ եւ Հայաստանի քայլերգներէն ետք, օրուան բեմավարներ՝ Քրիստ Գարամանեան եւ Նանոր Նալպանտեան, բեմ հրաւիրեցին Սեւան Տէյիրմէնճեանը՝ արտասանելու  Գրական Յանձնախումբի բացման խօսքը: Ան ողջունեց Հայաստանի Հանրապետութեան Հալէպի մեծարգոյ հիւպատոսը եւ ներկաները ու ըսաւ. «Այսօր՝ Համազգայինի Գրական Յանձնախումբը սրբազան պարտականութիւն եւ լուրջ պատասխանատուութիւն կը զգայ, պատերազմի թոհ ու բոհի տակ ստեղծուած մշակութային արուեստը հասցնելու արուեստասէր հանրութեան: Այս ձեռնարկը անոր լաւագոյն առիթն ու դրդապատճառն է»:

Տէիրմէնճեան շեշտեց. «Հեռուէն շատ դիւրին է գրել հայրենասիրական յօդուածներ, սակայն Հալէպի մէջ, արեան գնով մութի եւ մահուան սարսափի տակ ծնունդ առած արուեստը ժամանակը անպայման շատ բարձր պիտի գնահատէ»: Բացման խօսքէն ետք, բեմավարները փոխադարձաբար ընթերցեցին «Հալէպագրութիւն» ոտանաւորը:

Ապա բեմ հրաւիրեցին Համբիկ Հէքիմեանը, որ իւրայատուկ ոճով մեներգեց «Leave Us In Peace» երգը, անգլերէն բաժինի խօսք՝ Մարգրիտ Շամլեանի, արաբերէն բաժինի խօսք եւ  երգի երաժշտական մշակում՝ Համբիկ Հէքիմեանի:

Ապա ան մեներգեց «Յաղթանակի Որոշումը» արաբերէն երգը, արաբերէն բաժինի խօսքը  բանաստեղծ  Ապտուլ Մունէմ Լահհամի, ռուսերէն բաժինի խօսքը՝ Նունէ Երանոսեանի, երաժշտութիւն՝ Համբիկ Հեքիմեանի:

Երգեցողութենէն ետք, բեմ հրաւիրուեցաւ հալէպահայ հայրենաւանդ վաստակաւոր ուսուցչուհի, գրող Լալա Միսկարեան-Մինասեան, որ ընթերցեց «Ծիրանի Ոգիներ» իր գիրքէն բաժին  մը:

Անոր զգացական եւ տպաւորիչ ընթերցանութենէն ետք, Խաչիկ Աշճեան խոր ապրումով եւ յոյզով մեներգեց «Նոր Գիւղ» երգը, խօսք՝ բժշկ.  Ղազար Պօղոսի երաժշտութիւն՝ Տիգրան Մուարտեանի: Երգին դաշնամուրով ընկերակցեցաւ Յովհաննէս Օհանեան:

Այնուհետեւ Համազգայինի Հայագիտական Հիմնարկի շրջանաւարտ, կրթական մշակ  Յուշիկ Ղազարեան ընթերցեց իր  «Ոգեկոչում» եւ  «Տէր Զօր» ստեղծագործութիւնները:

Աշոտ Թեճիրեանը ոգեւորութեամբ մեներգեց «Անմեղ զոհեր» երգը, խօսք Ռաֆֆի Սիւլահեանի, երաժշտութիւն՝ Մհեր Մինասեանի:

Ապա հալէպահայ գրող Մարիանա Պէրթիզլեան-Ղազարեան ընթերցեց իր «Բողբողող Անմոռուկներ» եւ «Ձայն Տո՛ւր, Ծառ» գիրքերէն հատուածներ:

Ընթերցումին յաջորդեց արուեստագէտ Կարօ Սահակեանի պատրաստած հայկական եկեղեցիներու մանրակերտներուն ցուցադրութիւնը, եւ  Հ1 ալիքէն սփռուած յատուկ տեսանիւթը: Ցուցադրուեցաւ նաեւ քանդակագործ Վարդգէս Պարսումեանի քանդակները եւ պատերազմի օրերը խորհրդանշող ծաղրանկարները: Հետաքրքրական այս ցուցադրութենէն ետք, բեմ հրաւիրուեցաւ Համազգայինի «Ն.Աղբալեան» Մասնաճիւղի Գրական Յանձնախումբի ատենապետ, դեղագործ Յակոբ Տլտլեան, որ Շոփէնի երաժշտութեան զուգընթաց ընթերցեց իր անտիպ գործերէն բաժիններ:

Ճորճ Գալայճեան մեներգեց «Սուրիահայ Քաջեր» երգը, խօսք՝ Աւօ Գաթրճեանի,  երաժշտութիւն՝ Յովհաննէս Ատուրեանի:

Յայտագիրի աւարտին բեմավարները իրենց ջերմ շնորհակալութիւնը յայտնեցին աւելի քան քսանհինգ մասնակից արուեստագէտներուն, որոնք ընդառաջեցին Համազգայինի «Ն.Աղբալեան» Մասնաճիւղի «Մուշեղ Իշխան» Գրական Յանձնախումբի «Ռումբերու Տակ Ստեղծուած Արուեստը» ձեռնարկին եւ բուռն ծափողջոյններով պարգեւատրեցին զիրենք: Յիշենք, որ սոյն ձեռնարկի պատրաստութեան վերոյիշեալ մասնակիցներուն կողքին նպաստեցին արուեստագէտներ.- Զոհրապ Քէօշկէրեան, Կարօ Սահակեան, Վարդգէս Պարսումեան, Արմէն Յովսէփեան, Յակոբ Ժամկոչեան, Աշոտ Պապօղլեան, Ժինա Մինասեան, Մանիա Մենէշեան  եւ Սթեֆանի Սահակեան:

Սարին Հայրապետեան

 

Share.

Leave A Reply