ԳԱՄԻՇԼԻԻ ՀՄԸՄ-Ը ՓԱՌԱՒՈՐ ՇՈՒՔՈՎ ՏՕՆԵՑ ՍԿԱՈՒՏԻՆ ՕՐԸ

0
Հովանաւորութեամբ Ճեզիրէի Հայոց Առաջնորդական փխՓոխանորդ Հոգշ. Տ.Ռուբէն Աբղ. Նալպանտեանի, կազմակերպութեամբ Սկաուտ Խորհուրդին, Կիրակի, 25 Մարտ 2018-ի երեկոյեան ժամը 6:00-ին, Գամիշլիի «Կիւլպէնկեան» սրահէն ներս տեղի ունեցաւ Սկաուտի Օրուան տօնակատարութիւնը, ներկայութեամբ ՀՄԸՄ-ի Սուրիոյ Շրջանային Վարչութեան ներկայացուցիչ Զաւէն Գասպարեանի, պատկան մարմնի,ազգային և միութենական մարմիններու ներկայացուցիչներու եւ հոծ բազմութեան։
Հանդիսութեան բացումը կատարեց ՀՄԸՄ-ի փողերախումբը՝ ազգային երգերով, որուն ընկերակցեցաւ սկաուտական տողանցքը։
Ապա հանդիսավարները ներկաները հրաւիրեցին մէկ վայրկեան յոտնկայս յարգելու յիշատակը մեզմէ առյաւէտ բաժնուած ՀՄԸՄ-ականներուն։ Արարողութիւնը շարունակուեցաւ Սուրիոյ եւ Հայաստանի քայլերգներով։
 
Բացման խօսքով հանդէս եկաւ Սկաուտ Խորհուրդի ատենապետ բժշկհ. Մարի Մելքոնեան, որ պատմական անդրադարձով լուսարձակի տակ առաւ ՀՄԸՄ-ի հիմնադրութեան եւ զարգացման փուլերը՝ ողջունելով ՀՄԸՄ-ի 100-ամեայ վաստակը, «Միշտ Պատրաստ» կարգախօսով շարունակելու նախնիներուն աւանդը։
 
Այնուհետեւ վրայ հասաւ ձեռնարկին գեղարուեստական ու մարզական բաժինը։ Գայլ-արծուիկները ներկայացուցին ժողովական կեանքը նկարագրող թատերական պատկեր մը, ապա նաեւ հայկական պար մը։
 
Սկաուտութեան խօսքը արտասանեց մասնաճիւղիս փոխխմբապետուհի Նանար Սարգիսեան, որ շեշտեց ՀՄԸՄ-ի եւ Սկաուտութեան անքակտելի կապը՝ դիտել տալով, որ Սկաուտութիւնը սիրտն է ՀՄԸՄ-ին։ Սարգիսեան դրուատիքով արտայայտուեցաւ ծնողներու ազգային, բարձր գիտակցութեան և համագործակցութեան ոգիին մասին, որոնց շնորհիւ ՀՄԸՄ-ի շարքերը մշտապէս կը թարմանան նոր ուժերով։
 
Ապա տեղի ունեցաւ մասնաճիւղի եռամեայ գործունէութիւնը ներկայացնող տեսերիզի մը ցուցադրութիւնը, որմէ ետք բուրգերով եւ մարզական ներկայացումներով հանդէս եկան խումբ մը սկաուտներ՝ արժանանալով ներկաներու բուռն ծափողջոյններուն։ Ազգային և ՀՄԸՄ-ի նուիրուած փունջ մը երգերով հանդէս եկաւ Քրիստափոր Միքայէլեան։ Երգերուն առընթեր ներկայացուցան լոզունքներ եւ ասմունքներ։
 
Աւարտին տեղի ունեցաւ երդման արարողութիւն։ Օրուան կնքահայրն էր Յովիկ Պալեան, որ արարողութենէն ետք կատարեց վկայականաց բաշխում եւ աստիճանատուչութիւն։
 
Մասնաճիւղի վարչութեան ատենապետ Բժշկ. Անդրանիկ Սարգիսեան շնորհաւորեց սկաուտները՝ մաղթելով անոնց նորանոր վերելք եւ աշխատանքով բեղուն նոր շրջան մը։
 
Հուսկ, հոգեշնորհ հայր սուրբը իր հայրական օրհնութիւնը տուաւ։ Հանդիսութիւնը փակուեցաւ «Պահպանիչ» աղօթքով և ՀՄԸՄ-ի քայլերգով։
 
Բժշկհ. Մարի Մելքոն
Գամիշլի
Share.

Leave A Reply