ՔՈՒԷՅԹԻ ՄԷՋ ԲԱՑՈՒԱԾ Է «ԲԱՐԵԿԱՄՈՒԹԵԱՆ ԳՈՅՆԵՐԸ» ՄԱՆԿԱՊԱՏԱՆԵԿԱՆ ԳԵՂԱՆԿԱՐՉԱԿԱՆ ԱՇԽԱՏԱՆՔՆԵՐՈՒ ՑՈՒՑԱՀԱՆԴԷՍԸ

0

Քուէյթի մէջ Հայաստանի Հանրապետութեան դեսպանութեան նախաձեռնութեամբ՝ տեղի Հայ Ազգային վարժարանի հետ գործակցաբար, Ապտել Ազիզ Ալ Պապտէյն գրադարանին մէջ բացում կատարուեցաւ «Բարեկամութեան գոյները» (Colors of Friendship) խորագիրը կրող մանկապատանեկան գեղանկարչական աշխատանքներու ցուցահանդէսը։ Հայաստանի Հանրապետութեան 100-ամեակի տօնակատարութեան շրջագիծին մէջ ընթացող ձեռնարկներու շարքին այն երկրորդն էր։ Քուէյթի հայ մանուկներու աշխատանքներու հիմնական նիւթը Հայաստանն էր, անոր արեւը, զինուորը, հեքիաթը, արեւավառ միրգն ու առհասարակ այն ամէնը, ինչ որ մանուկներուն երեւակայութեան մէջ կը խորհրդանշէ հայրենիքը։

Գոյներու լեզուով Հայաստանի` իրենց պատկերացումներն էին ներկայացուցած նաեւ արաբ մանուկներ։

Ցուցահանդէսի բացումին ներկայ էր թեմի առաջնորդ գերաշնորհ տէր Մասիս Զոպուեան, Ռուսաստանի, Ուքրանիոյ, Իրաքի դեսպանները, Սենեկալի փոխդեսպանը, Քուէյթի մէջ հաւատարմագրուած դիւանագիտական կորպուսի եւ միջազգային կազմակերպութիւններու ներկայացուցիչներ, ինչպէս նաեւ մեր հայրենակիցները։

Ողջունելով ներկաները` Քուէյթի մօտ ՀՀ դեսպան Մանուէլ Պատէեան շեշտեց. «Հայ եւ արաբ ժողովուրդները բարեկամութեան եւ փոխըմբռնման հարուստ պատմութիւն ունին։ Մեր բարեկամութիւնն ալ աւելի խորացնելու ու ամրապնդելու մեծ ներուժ ունինք։ Բարեկամութեան եւ սիրոյ լեզուով կը խօսի մեր նոր սերունդը։ Վկան այս նկարներն են։ Մենք սնոնցմէ սորվելու շատ բան ունինք, մենք նաեւ պատասխանատուութիւն ունինք բարեկամութեան, սիրոյ եւ խաղաղութեան մէջ պահելու մեր Երկիր մոլորակը»։

Ներկաներուն իր խօսքը փոխանցեց նաեւ Ազգային վարժարանի տնօրէն Ներսէս Սարգիսեան։

Ցուցահանդէսին հետեւեցաւ բացօթեայ մշակութային ծրագիրը, ինչպէս նաեւ մատուցուեցան հայկական ազգային խոհանոցը ներկայացնող ճաշատեսակներ, որ իրագործուեցաւ ՀՕՄ-ի եւ Համազգայինի տեղական կառոյցներու աջակցութեամբ։
Քուէյթի Ապտել Ազիզ Ալ Պապտէյն գրադարանէն ներս հայկական շունչը շարունակուեցաւ ամբողջ օրուան ընթացքին։

Share.

Leave A Reply

This site uses Akismet to reduce spam. Learn how your comment data is processed.