ՄՈՒԱԼԼԷՄ ԵՒ ՈՒԻԼԱՅԱԹԻ. «ԶԱՐԳԱՑՆԵԼ ԱՀԱԲԵԿՉՈՒԹԵԱՆ ՈՒ ԱՆՈՐ ԶՕՐԱՎԻԳ ԿԱՆԳՆՈՂ ԵՐԿԻՐՆԵՐՈՒՆ ԴԷՄ ՍՈՒՐԻՈՅ ԵՒ ԻՐԱՆԻ ՀԱՄԱԿԱՐԳՈՒԱԾ ԱՇԽԱՏԱՆՔՆ ՈՒ ԽՈՐՀՐԴԱԿՑՈՒԹԻՒՆԸ»

0

Չորեքշաթբի, 11 Ապրիլ 2018-ին, Սուրիոյ արտաքին գործոց նախարար Ուալիտ ալ Մուալլէմ ընդունեց Իրանի Իսլամական Յեղափոխութեան Գերագոյն Առաջնորդի միջազգային հարցերու խորհրդական Ալի Աքպար Ուիլայաթին: Կողմերը քննարկեցին Սուրիոյ եւ Իրանի ռազմավարական յարաբերութիւններու զարգացման հեռանկարները, ինչպէս նաեւ տարածաշրջանի եւ Սուրիոյ զարգացումները՝ քաղաքական իրավիճակներու փոփոխութեան եւ սուրիական բանակին ու անոր դաշնակիցներուն յաղթանակներուն լոյսին տակ:

Անոնք կարեւոր համարեցին ահաբեկչութեան ու անոր զօրավիգ կանգնող երկիրներուն դէմ Սուրիոյ եւ Իրանի համակարգուած աշխատանքին ու խորհրդակցութեան շեշտադրումը՝ ամրագրելու ահաբեկչութեան դէմ սուրիական բանակին յաղթանակները ու դիմագրաւելու արեւմուտքի եւ Իսրայէլի սպառնալիքներն ու տարածաշրջանը լարուած պահելու յաճախակի դրդումները:

Մուալլէմ, Ուիլայաթիի ներկայացնելէ ետք Սուրիոյ վերջին զարգացումներն ու սուրիական բանակին յառաջխաղացքը, երախտագիտութիւն յայտնեց Իրանին՝ զանազան բնագաւառներու մէջ Սուրիոյ զօրավիգ կանգնելուն համար:

Իր կարգին, Ուիլայաթի շեշտեց, որ Իրան պիտի շարունակէ զօրակցիլ Սուրիոյ ու անոր ժողովուրդին, ինչպէս նաեւ սատար հանդիսանալ ահաբեկչութեան դէմ անոր մղած պայքարին՝ պահպանելու Սուրիոյ տարածքային ամբողջականութիւնն ու վերականգնելու տարածաշրջանի անվտանգութիւնը: Ուիլայաթի շնորհաւորեց Սուրիան՝ Ղութայի մէջ սուրիական բանակին տարած յաղթանակին համար ու հաւաստիացուց, որ Իրան պիտի շարունակէ ամրապնդել Սուրիոյ հետ իր ռազմավարական յարաբերութիւնները:

Share.

Leave A Reply