ՃԱԱՖԱՐԻ. «ՄԱԿ-Ի ԱՆՎՏԱՆԳՈՒԹԵԱՆ ԽՈՐՀՈՒՐԴԻ ՄՆԱՅՈՒՆ ԿԱՐԳ ՄԸ ԱՆԴԱՄՆԵՐ ԱՊԱՏԵՂԵԿԱՏՈՒՈՒԹԵԱՄԲ ԿԸ ՓՈՐՁԵՆ ՍՈՒՐԻՈՅ ԴԷՄ ՅԱՐՁԱԿՈՒՄԻ ՄԹՆՈԼՈՐՏ ՆԱԽԱՊԱՏՐԱՍՏԵԼ»

0

ՍԱՆԱ .- Երկուշաբթի, 9 Ապրիլ 2018-ին, ՄԱԿ-ի մօտ Սուրիոյ մնայուն ներկայացուցիչ դոկտ. Պաշշար ալ Ճաաֆարի յայտնեց, որ սուրիական տարածքներու ուղղութեամբ իսրայէլի շարունակուող յարձակումները պիտի չյաջողին պաշտպանել «Իսրայէլ»ի գործակալները՝ զինեալ ահաբեկչական խմբաւորումները, աւելցնելով, որ ՄԱԿ-ի Անվտանգութեան Խորհուրդի մնայուն կարգ մը անդամներ ապատեղեկատուութիւն տարածելով կը փորձեն Սուրիոյ դէմ յարձակումի մթնոլորտ նախապատրաստել:

Անվտանգութեան Խորհուրդի Սուրիոյ իրավիճակին յատկացուած նիստին, Ճաաֆարի ըսաւ. «ՄԱԿ-ի մօտ ԱՄՆ-ի ներկայացուցիչ Նիքի Հէյլի յիշեց, որ Ռուսիա մեծ կարելիութիւններ կը մսխէ Սուրիոյ վարչակարգին զօրակցելու համար… Այստեղ հարց կու տամ ներկայացուցիչին. ԱՄՆ որքա՞ն գումար կը յատկացնէ Սուրիոյ երեխաներուն կաթ եւ դեղորայք ուղղարկելու համար, իսկ որքա՞ն՝ զինեալ ահաբեկչական խմբաւորումներուն զէնք ու զինամթերք տրամադրելու եւ Ռաքքան քարուքանդ դարձնող Միջազգային Դաշինքին ռազմական միջոցներ հայթայթելու համար»:

Ճաաֆարի հարց տուաւ, թէ ԱՄՆ-ի ներկայացուցիչը ինչու Անվտանգութեան Խորհուրդի այս բեմէն յաճախ սպառնալիքներ կ՛ուղղէ Սուրիոյ: Արդեօ՞ք այս արարքով ան կը խոստովանի, որ իր երկիրը կ՛արհամարհէ այս խորհուրդը, միջազգային կազմակերպութիւնն ու միջազգային օրէնքի սկզբունքները: Թոյլ տուէք քննութեան ենթարկել ԱՄՆ-ի ներկայացուցիչին եւ իմ արտայայտութիւնները եւ ուշադրութիւն դարձուցէք, թէ իմ խօսքերուն մէջ երբեւիցէ «ամերիկեան վարչակարգ» արտայայտութիւնը օգտագործա՞ծ եմ: Բնականաբար՝ ոչ, որովհետեւ այս յարկին տակ այսպիսի արտայայտութիւն ունենալը ամօթ է, օրէնքով իսկ բացառուած է:

Ճաաֆարի աւելցուց. «Թայֆուր օդակայանին ուղղութեամբ իսրայէլեան յարձակումները չէին իրականանար առանց արեւմուտքի համաձայնութեան»:

Երեքշաբթի, 10 Ապրիլ 2018-ին, դոկտ. Պաշշար ալ Ճաաֆարի Անվտանգութեան Խորհուրդի նիստին կրկին խօսք առնելով ըսաւ. «Սուրիոյ ուղղուած արեւմուտքի սպառնալիքներն ու անոր տարածած ապատեղեկատուութիւնը մեր երկրին ուշադրութիւնը պիտի չշեղեն իր գերիշխանութիւնն ու տարածքային ամբողջականութիւնը պահպանելէ ու որեւէ յարձակումի դէմ դնելէ: Սուրիա ՄԱԿ-ի Անվտանգութեան Խորհուրդի մնայուն կամ ոչ մնայուն անդամներուն թոյլ պիտի չտայ, որ Սուրիոյ մէջ իրագործեն այն ինչ որ իրագործեցին Իրաքի եւ Լիպիոյ մէջ»: Ապա դիտել տուաւ, որ Սուրիա կ՛ողջունէ քիմիական զէնքերու չէզոքացման հետաքննութեան խումբը եւ պատրաստակամութիւն կը յայտնէ գործակցելու անոր հետ:

Share.

Leave A Reply

This site uses Akismet to reduce spam. Learn how your comment data is processed.