ՌԵՆԱ ՏԱՂՏԻՎԵՐԷՆԵԱՆ՝ ՀԱԼԷՊԱՀԱՅ ՏԱՂԱՆԴԱՒՈՐ ԵՐԳՉՈՒՀԻՆ JAZZ-Ի ԱՇԽԱՐՀԻՆ ՄԷՋ

0

Հալէպի երաժշտական միջավայրին մէջ շատեր հասակ առած, ծաղկած, ապա նաեւ թռիչք առնելով մուտք գործած են այլ միջավայրեր։ Ռենա Տաղտիվերէնեան անոնցմէ մէկն է։ Իւրայատուկ ոճ եւ ձայն ունեցող այս երգչուհին նորանոր յաջողութիւններ կը նուաճէ ու նոր որակով կը ներկայանայ զանազան բեմերէ։

«Գանձասար» մտերմիկ հարցազրոյց մը ունեցաւ Ռենայի հետ, զոր կը ներկայացնենք ստորեւ.

 

«Գանձասար»- Ե՞րբ եւ ինչպէ՞ս մուտք գործեցիք երաժշտական աշխարհ։

«Ռ.Տ.»- Փոքր տարիքէս բեմ բարձրանալը հաճոյք էր ինծի համար, որովհետեւ հայրս երգիչ էր արդէն։ Առաջին անգամ մեծ բեմահարթակ բարձրացայ 8 տարեկանիս, երբ հայրս մենահամերգ ունէր Կրթասիրաց վարժարանի սրահէն ներս «Նիքապէթ Ֆաննանին» խումբին հետ, Վաչէ Երամեանի ղեկավարութեամբ։ Այնտեղ  «Beathles» խումբի երգերէն 2 կտոր երգեցի։ Յետոյ, Աւստրալիա տեղափոխուելէս ետք, երկար ատեն հեռու մնացի այս աշխարհէն։ 22 տարեկանիս, երբ վերադարձայ Հալէպ, վերսկսայ երգել հայկական մեր ակումբներու ձեռնարկներուն, հետագային նաեւ «Սպենդիարեան» եւ «Զուարթնոց» երգչախումբերուն մէջ։ Յետոյ երգելու ունակութիւնս օրէ օր զարգացուցի։ Հալէպի մէջ Jazz-ի խումբ մը կազմեցինք ու հանդէս եկանք օտար դեսպանատուներու կազմակերպած ձեռնարկներուն եւ փառատօններուն։

 

 

«Գ.»- Ձեր նախասիրած երաժշտական ժանրը Jazz-ն է։ Ներկայիս Երեւան կապրիք, օրին հալէպի մէջ ալ խումբ կազմած էք։ Ի՞նչ է տարբերութիւնը հայաստանեան եւ այլ երաժշտական միջավայրերուն։

«Ռ.Տ.»- Նախ Jazz ժանրով սկսայ, յետոյ անցայ blues, soul, funk, R&B եւ այս վերջերս նոյնիսկ rock ժանրին։ Հալէպի մէջ քիչ մը դժուար էր Jazz-ը տարածելը, բայց մենք (իմ խումբին հետ) բաւական մեծ աշխատանք տարինք մարդոց հրամցնելու այս ոճը։

Երեւանի մէջ աւելի դիւրին էր այս մէկը, որովհետեւ երաժշտական ոլորտը աւելի հասուն ու առողջ վիճակի մէջ է այնտեղ։

Այստեղ շատ աւելի լայն միջավայր ունեցայ, որովհետեւ իւրայատկութիւն ունէի իբր երգչուհի։ Երեւանի մէջ, չափազանցած չեմ ըլլար եթէ ըսեմ, միակ երգչուհին էի, որ blues ոճի խումբ ունէի։

 

«Գ.»-Վերջերս մասնակցեցաք THE VOICE երաժշտական մրցոյթին։ Ինչ տպաւորութեամբ վերադարձաք։

«Ռ.Տ.»- The Voice երաժշտական ծրագիրը ինծի համար շատ օգտակար փորձառութիւն մը եղաւ։ Առիթ ունեցայ շատ տաղանդաւոր երաժիշտներու ու երգիչներու ծանօթանալու եւ փորձառութիւն շահելու։ Ինծի համար կեանքը միշտ պէտք է ըլլայ նորութիւններով եւ շինիչ փորձառութիւններով լեցուն։

Ու տարիքը երբեք արգելք պէտք չէ ըլլայ այս մէկը իրականացնելու համար։

 

«Գ.»-Հետաքրքրական է իմանալ ձեր կարծիքը հայկական Jazz երաժշտութեան մասին։

«Ռ.Տ.»- Jazz-ը Երեւանի մէջ միշտ ալ գոյութիւն ունեցած է ու տարուէ տարի կը զարգանայ։ Փափաքելի է որ աւելի լայն առիթներ ընծայուին ու Երեւանի տաղանդաւոր երաժիշտները շփում ունենան օտարերկրացի jazz երաժիշտներու հետ։ Այս ուղղութեամբ բաւական աշխատանք ու ծրագիր գոյութիւն ունի։ Օտար հանրածանօթ երաժիշտներ յաճախ Հայաստան ելոյթներու կը հրաւիրուին։ Յոյսով եմ, որ հակառակ ուղղութեամբ ալ նման ծրագիրներ կ՛իրագործուին, որովհետեւ  երաժշտութիւնը կը զարգանայ բաժնեկցելով։

 

«Գ.»- Ինչ բանի կը ձգտիք երաժտական ձեր ասպարէզին մէջ։

«Ռ.Տ.»- Երաժշտութիւնն ու երգը ինծի համար սէր ու հաճոյք են, ոչ թէ գործ։ Անոր համար ալ կը կարծեմ, որ ես իմ նպատակիս հասած եմ՝ Երեւանի մէջ շաբաթական քանի մը օր համերգներ ու բաւական երկրպագուներ եւ հետեւողներ ունենալով։

Ունիմ մէկ այլ ձգտում մը, որուն առաջին քայլերը կ’առնեմ արդէն։ Նպատակս է նոր սերունդի տաղանդաւոր երաժիշտներուն համար աճելու, զարգանալու տարածք ստեղծել ու արուեստը բաժնեկցիլ անոնց հետ։

Երեւանեան զանազան ակումբներու (pubs/clubs) մէջ կը կազմակերպեմ (jam session), ուր կը հրաւիրեմ երիտասարդ երաժիշտներ՝ իրարու ծանօթանալու, նուագելու եւ գործակցութեան առիթներ ստեղծելու։

Մօտօրէն ռատիոյի հաղորդում մը պիտի սկսիմ այս նիւթին շուրջ։

 

Այս ամիս ստացայ Van music awards լաւագոյն երգի (hit song) մրցանակը՝ իմ յօրինած երգին համար, որ ձայնագրած ու տեսահոլովակի ալ վերածած ենք։ Շատ ուրախ ու հպարտ եմ այս մրցանակով, որովհետեւ անունս հնչեց անուանի ու յաջողակ շատ մը երգիչներու կողքին։

 

«Գ.»-Յաջողութիւն կը մաղթենք երաժշտական ձեր երթին։

 

Share.

Leave A Reply

This site uses Akismet to reduce spam. Learn how your comment data is processed.