«ՄՕՐ ՅԻՇԱՏԱԿԻՆ ԱՌՋԵՒ ԱՄԷՆ ԳԼՈՒԽ ԿԸ ԽՈՆԱՐՀԻ»

0

Հովանաւորութեամբ ՍՕ Խաչի Շրջանային Վարչութեան, կազմակերպութեամբ ՍՕ Խաչի «Շուշի» Մասնաճիւղին, Մարտ ամսուն , Լաթաքիոյ Ս. Աստուածածին եկեղեցւոյ «Արարատ» սրահին մէջ տեղի ունեցաւ Մայրերու Օրուան նուիրուած հանդիսութիւն։

Հանդիսութեան բացումը կատարուեցաւ ՍՕ Խաչի քայլերգով, ներկայութեամբ Արժ. Տ. Տաթեւ Ա. Քհնյ. Միքայէլեանի, Ս. Աստուածածին եկեղեցւոյ Թաղական Խորհուրդին, Ազգ. Սրբոց Նահատակաց վարժարանի հոգաբարձական եւ ուսուցչական կազմերուն, ՍՕ Խաչի Շրջանային Վարչութեան ատենապետուհի Հռիփ Կանանեանի, ինչպէս նաեւ Լաթաքիոյ մէջ գործող միութիւններու ներկայացուցիչներուն։

Բարի գալուստի խօսքով հանդէս եկաւ հանդիսավար Ալին Գաբրիէլեան, ապա մասնաճիւղի ատենապետուհի Սաթենիկ Պետուրեան բացման խօսք արտասանեց՝ ողջունելով հայ մայրերը, որոնք հայ ընտանիքին ապահովութիւնը եւ կայուն կեանքը կþերաշխաւորեն։

Այնուհետեւ Հերմիկ Գաբրիէլեան տպաւորիչ առոգանութեամբ ասմունքեց Ժագ Յակոբեանի «Մեր Մայրեր»ը։

Սեւան Տէրմէնճեան անմահն Կոմիտասի «Գարուն Ա»ն նուագելով (դաշնամուր) յուզումնախառն պահեր պարգեւեց ներկաներուն։

Յայտագիրին իր մասնակցութիւնը բերաւ Համազգայինի «Վահան Նաւասարդեան» Մասնաճիւղի «Գեղարդ» պարախումբը՝ ներկայացնելով «Աւարայրի պար»ը։

Օրուան բանախօսն էր ՍՕԽ-ի Շրջ. Վարչութեան ատենապետուհի Հռիփ Կանանեան։ Ան ներկայացուց հայ կնոջ դերը հայ ազատագրական պայքարին եւ հայոց պատմութեան մէջ՝ անդրադառնալով պատմական մեր փայլուն էջերուն։ Բանախօսութեան ընթացքին մերթ ընդ մերթ ցուցադրուեցան ազատատենչ հայ կիներուն դիմանկարները։

Կանանեան դիտել տուաւ, որ 2018 տարեշրջանը՝ Հայաստանի Հանրապետութեան 100-ամեակը, հայ ժողովուրդին համար հպարտութեան տարի է։

Այնուհետեւ տեղի ունեցաւ երդման արարողութիւն, Շրջանային Վարչութեան անդամ՝ Սեդա ՏէրԱբրահամեանի կնքամայրութեամբ։‎ Բեմ բարձրացան 13 նորագիր անդամուհիներ, որոնք ուխտեցին ըլլալ հաւատաւոր եւ պարտաճանաչ անդամուհիներ՝ պահելու եւ նորահաս սերունդներուն փոխանցելու ՍՕ Խաչի աւանդը։

Ապա տեղի ունեցաւ 26 ընկերուհիներու պարգեւատրում, ձեռամբ ՍՕ Խաչի Շրջանային Վարչութեան, ուր պարգեւատրուեցան 30 տարուան վաստակ ունեցող անդամուհիներ։

Հանդիսութեան աւարտին, Տ. Տաթեւ Ա. Քհնյ. Միքայէլեան իր սրտին խօսքը յղելէ ետք «Պահպանիչ» աղօթքով փակեց հանդիսութիւնը։

Սօսի Պետուրեան

Share.

Leave A Reply