ՀԱՏԱՊՏՈՒՂՆԵՐ

0

Վայրի եւ մշակուող բազմամեայ բոյսեր են հատապտուղները, որոնցմէ կը ստանանք հիւթալի, չբացուող եւ բազմասերմ պտուղներ: Անոնք կը պարունակեն հանքային աղեր, շաքար, կենսանիւթեր ու բուրումնաւէտ նիւթեր: Կ’օգտագործուին թարմ եւ վերամշակուած (խիւս, օշարակ, անուշ, դոնդող), հրուշակեղէնի եւ զովացուցիչ ըմպելիներու արտադրութեան մէջ:

Այս խումբին կը պատկանին  ազնուամորին, կարմիր եւ սեւ հաղարջը, լորամրգին, հապալասը, մոշը, թութը եւ ելակը:

 

Ազնուամորի

Հարուստ է C Կենսանիւթով, անոր թարմ հիւթը կ’իջեցնէ ջերմութիւնը  եւ կը պակսեցնէ քաթարաքթի հաւանականութիւնը, իսկ անոր տերեւներու եփուկը օգտակար է փսխումներու պարագային:

 

Հապալաս

Հապալասի հիւթը կը նպաստէ ջերմութիւնը իջեցնելու, իսկ տերեւներով պատրաստոած թէյը օգտակար է երիկամունքի քարային հիւանդութիւններու եւ ստամոքսի խանգարումներուն պարագային:

 

Սեւ Հաղարջ

Հարուստ է A, B, C, E եւ K կենսանիւթերով, ինչպէս նաեւ երկաթով եւ ֆոսֆորով:

Ան կը կանխէ քաղցկեղը, սրտանօթային հիւանդութիւնները եւ տարեց մարդոց մտային կարողութիւններու թուլացումը: Անոր հիւթը, մեղրի հետ խառնուած, լաւագոյն միջոցն է դեղնախտի ընթացքին լեարդի գործունէութիւնը վերականգնելու համար:

Սեւ հաղարջով պատրաստուած թէյերը ունին հակաբորբոքային յատկութիւններ, իսկ անոր հիւթը անփոխարինելի  բուժիչ միջոց  է նշիկաբորբոքումի պարագային:

Սեւ հաղարջի տերեւներէն պատրաստուած թուրմը կ’օգնէ երիկամներէն դուրս բերելու համար քարերը եւ յօդերը  մաքրելու կուտակուած աղերէն:

Ան կը բարձրացնէ մարմնի դիմադրողականութիւնը փոխանցիկ հիւանդութիւններուն ընթացքին եւ կը կանխէ արեան տկարութիւնն ու գերճնշումը:

 

Թութ

Հնագոյն ժամանակներէն ան դեղաբոյս կը համարուի չինական, հնդկական եւ ճափոնական բժշկութեան մէջ: Հարուստ է կենսանիւթերով  եւ օգտակար միկրօտարրերով:

Հասուն պտուղը փորը թուլացնող յատկութիւն ունի, չհասունցածը՝ պնդացնող:

Սեւ Թութի խտացուած հիւթը օգտակար է ստամոքսի եւ լեարդի կանոնաւոր աշխատանքին համար, կը նպաստէ նաեւ արեան մէջ հեմոկլոպինի բարձրացման  եւ ապաքինող ազդեցութիւն ունի վէրքերու համար: Ան որպէս կոկորդը ողողելու միջոց կը գործածուի բերնի խոռոչի խոցերու պարագային:

Չինացիները ճերմակ թութի տերեւներով կը բուժեն ջերմութեամբ եւ գլխացաւերով ուղեկցող մրսածութիւնը: Ան կը համարուի միզամուղ , հազը փափկացնող եւ քրտնաբեր միջոց: Իսկ անոր պարունակած ֆոսֆորին պատճառով շատ օգտակար է յղի կիներու եւ երեխաներու համար:

Շաքարախտի եւ ճարպակալման պարագային խորհուրդ կը տրուի անսահմանափակ քանակութեամբ թութ օգտագործել:

Սեւ թութի սննդային արժէքը կրկնակի է համեմատած ճերմակի հետ:

 

Մոշ

Մոշի հիւթը կը նպաստէ լեարդի եւ փայծաղի բորբոքումներու բուժման: Անոր տերեւներուն մզուածքը ունի հակաբորբոքային ազդեցութիւն՝ պակսեցնելով թարախային վէրքերու ցաւը, իսկ ճիւղերու թուրմով կրնանք մեր գլուխը լուալ, ինչ որ կը նպաստէ մազերու աճման: Ան կը բուժէ էքզէման:

 

 

Ելակ

Ելակը կը պարունակէ մեծ քանակութեամբ հակաօգսիտաններ, այդ իսկ պատճառով կը համարուի քաղցկեղի դէմ պայքարող պտուղ ու կարեւոր նշանակութիւն ունի սրտանօթային համակարգի պահպանման համար:

Ան, իր պարունակած մակնիզիումին եւ հանքային  նիւթերուն շնորհիւ,  մեր մարմնին կ’ապահովէ  ջերմուժ  եւ կը պահպանէ ոսկորներու ամրութիւնն ու ակռաներու առողջութիւնը:

Տերեւներէն պատրաստուած թէյը կ’օգնէ ստամոքսի խանգարումներու եւ անքնութեան ընթացքին, կը կարգաւորէ նիւթափոխանակութիւնը եւ արեան բարձր ճնշումը:

Հասուն ելակի հոտը կը պարունակէ մօտաւորապէս 50 անուշաբոյր նիւթեր, որոնք մարդուն կու տան բարձր տրամադրութեան զգացում եւ կ’օգնեն  յաղթահարելու գերճնշուածութիւնը:

Ելակը  կը բարելաւէ  նաեւ յիշողութիւնը:

Ելակը կը պարունակէ բաւարար քանակով պղինձ, որուն շնորհիւ մաշկը կը դառնայ փափուկ եւ առաձգական: Այդ պատճառով ելակի դիմակները բարերար ազդեցութիւն ունին մաշկին վրայ:

 

Ելակով Չոր Մաշկի Դիմակ

Եթէ ունիք շատ չոր մաշկ, մասնագէտներ կ’առաջարկեն հետեւեալ դիմակը.

-2 ելակ,1 հաւկիթի դեղնուց եւ 1 թէյի դգալ մեղր: Այս խառնուրդը քսել դէմքին, սպասել 20 վայրկեան, ապա դէմքը մաքրել բամպակով ու լուալ գաղջ ջուրով:

Սեւան Ազարիկեան-Պարմաքսզեան

 

 

 

Share.

Leave A Reply