ՀԱՅԱՍՏԱՆԻ ԿԱՌԱՎԱՐՈՒԹԻՒՆԸ ՔՆՆԱՐԿԱԾ Է «ԴԷՊԻ ԽԵԼԱՑԻ ՀԱՅԱՍՏԱՆ. ՆՈՐԱՐԱՐՈՒԹԵԱՆ ԶԱՐԳԱՑՈՒՄԻ ՌԱԶՄԱՎԱՐԱԿԱՆ ՄՕՏԵՑՈՒՄ» ՆԱԽԱԳԻԾԸ

0

Հայաստանի Հանրապետութեան վարչապետի պաշտօնակատար Կարէն Կարապետեանի մօտ տեղի ունեցած է խորհրդակցութիւն, որուն ընթացքին ներկայացուած է «Դէպի խելացի Հայաստան. Նորարարութեան զարգացումին ռազմավարական մօտեցում» նախագիծը:

Զեկուցուած է, որ նախագիծով ձեւաւորուած է նորարարութեան վրայ հիմնուած երկրի զարգացումին ընդհանրական տեսլականը, գնահատուած են երկրի նորարարական համակարգի կատարողականը, կարելի ներդրումներու ծաւալներն ու անոնց արդիւնքները:

Նախագիծի հեղինակները յայտնած են, որ նախագիծի ծիրէն ներս կը նախատեսուին ձեռնարկներ, որոնք միտուած են ըլլալու նորարարութեան կարեւորութեան մասին հասարակութեան գիտակցութեան բարձրացումին, հանրային ներդրումներու համար անհրաժեշտ առաջնահերթութիւններու սահմանումին, բարեփոխոխումներու օրակարգի ձեւաւորումին, տեղական դերակատարներու եւ նուիրատուներու ջանքերու միաւորումին: Անդրադարձ կատարուած է նաեւ նորարարութեան ոլորտին մէջ առկայ հարցերուն եւ մարտահրաւէրներուն, ինչպէս նաեւ անոնց կարելի լուծումներուն:

Նախագիծի շուրջ տեղի ունեցած է միտքերու փոխանակում, ներկայացուած են տարբեր տեսակէտեր եւ առաջարկներ: Կարէն Կարապետեան ողջունած է փաստաթուղթի մշակումը եւ յանձնարարած լրամշակել զայն՝ հաշուի առնելով ներկայացուած առաջարկները:

Share.

Leave A Reply

This site uses Akismet to reduce spam. Learn how your comment data is processed.