ՀՐԱՆԴ ՏԻՆՔ ՀԻՄՆԱՐԿԸ ՀՐԱՏԱՐԱԿԱԾ Է «ԿԵՍԱՐԻՈՅ ՀԱՅԵՐԸ ԿԸ ԽՕՍԻՆ» ՀԱՏՈՐԸ

0

«Ակունք».- Թուրքիոյ մէջ գործող Հրանդ Տինքի անուան հիմնարկը տպագրած է «Լռութեան Ձայնը» շարքէն 5-րդ հատորը՝ «Կեսարիոյ Հայերը Կը Խօսին» անունով:

2011-էն ի վեր իրականացուող «Անատոլիոյ հայերու բանաւոր պատմութեան նախագիծ»ի գործունէութեան ծիրէն ներս լոյս տեսած այս գիրքին մէջ կը ներկայացուին 28 հոգիի հետ կատարուած հարցազրոյցներ:

Հարցազրոյցներէն բացի, գիրքին մէջ տեղ գտած են նաեւ պատմաբան Մեհմէտ Փոլաթէլի յառաջաբանը եւ գիրքը կազմողին՝ դոկտ. Իճլալ Այշէ Քիւճիւքըրճայի վերջաբանը:

Նոյն շարքի միւս գիրքերուն նման, «Կեսարիոյ Հայերը Կը Խօսին» գիրքին մէջ եւս ընդգրկուած են Հայոց Ցեղասպանութեան մասին յուշեր եւ Թուրքիոյ հայերուն դիմագրաւած ինքնութեան տագնապներու քննարկումներ։

Կեսարիան եղած է Անատոլիոյ այն հազուագիւտ քաղաքներէն, ուր հանրապետական շրջանին եւս հայեր շարունակած են ապրիլ։ 1927-ի մարդահամարի տուեալներով՝ հոն պաշտօնապէս արձանագրուած են 1978 հայեր: Այդ թիւը 1932-ին իջած է 1600-ի, 1960-ին՝ 800ի, իսկ ներկայիս՝ գրեթէ զեռոյի: Յատկապէս 1950-ականներուն, այդ շրջանի հայերը Պոլիս գաղթած են՝ հաստատուելով գլխաւորաբար Սամաթիա թաղամասը։

Share.

Leave A Reply