ԱԶԱՏՈՒԹԵԱՆ ՀՐԱՊԱՐԱԿԻՆ ՎՐԱՅ ՏԵՂԻ ՈՒՆԵՑԱԾ Է «ԻՄ ՔԱՅԼԸ» ՆԱԽԱՁԵՌՆՈՒԹԵԱՆ ՀՐԱՒԻՐԱԾ ՀԱՆՐԱՀԱՒԱՔԸ

0

Երեւան, «Երկիր Մետիա».- Ազատութեան հրապարակին վրայ տեղի ունեցած է «Իմ քայլը» նախաձեռնութեան հրաւիրած հանրահաւաքը։

Հայաստանի Հանրապետութեան Ազգային Ժողովի «Ելք» խմբակցութեան ղեկավար, «Քաղաքացիական Պայմանագիր» կուսակցութեան վարչութեան անդամ Նիկոլ Փաշինեան քաղաքացիներուն հետ միասին քայլերթով հասած է Ազատութեան հրապարակ, ուր սկսած է «ընդդէմ Սերժ Սարգսեանի վարչապետ դառնալուն» հանրահաւաքը:
Հանրահաւաքի մասնակիցները մտադրած են մինչեւ 17 Ապրիլ մնալ Ազատութեան հրապարակ։

«Սիրելի հայրենակիցներ, քայլերթի 14 օրերուն ընթացքին, մենք Գիւմրիէն յետիոտն քալելով հասանք Երեւան, եւ ահա Ազատութեան հրապարակին վրայ ենք: Ասիկա արշաւ էր յանուն Հայաստանի քաղաքացիին, ընդդէմ արտագաղթի եւ յանուն նոր կեանքի: 14 օրերու ընթացքին մենք յետիոտն կտրած ենք 212 քիլոմեթր ճամբայ եւ կատարած շուրջ 320.000 քայլ: Այդ քայլը արած ենք այսօր այստեղ ձեզի հանդիպելու համար», ըսած է Փաշինեան:
Ան յայտարարած է, որ կը փափաքի համերաշխութեան ձեռք մեկնել Հայաստանի բոլոր ընդդիմադիր քաղաքական ուժերուն: «Սիրելի գործընկերներ, մենք այս ընթացքին մէջ շատ հակասութիւններ ունեցած ենք, կռուած ենք, վիճած ենք, երբեմն նաեւ իրար վիրաւորած ենք, բայց կը կարծեմ, որ ժամանակն է, որ ներենք միմեանց», ըսած է Փաշինեան:

Share.

Leave A Reply