ՑՈՒՑԱՐԱՐՆԵՐԸ ԱՐԳԵԼԱՓԱԿԵՑԻՆ ՅԱՂԹԱՆԱԿԻ ԿԱՄՈՒՐՋԸ, ԱՊԱ ՈՒՂՂՈՒԵՑԱՆ ԴԷՊԻ ԳՐԻԳՈՐ ԼՈՒՍԱՒՈՐԻՉ ՓՈՂՈՑ

0

16 Ապրիլին Հաայատանի Հանրապետութեան Ազգային Ժողովի պատգամաւոր Նիկոլ Փաշինեան իր համակիրներուն հետ հասաւ Յաղթանակ կամուրջ: Փաշինեան յայտարարեց, որ եղած ուժերը կը դժուարանային արգելափակել կամուրջը, ատոր համար իրենք միացան անոնց: Ցուցարարները այնուհետեւ ուղղուեցան դէպի Գրիգոր Լուսաւորիչ փողոց:

Ցուցարարները մտան նաեւ Մանկավարժական Համալսարանի շէնք: Անոնք կը վանկարկէին` «Միացէ՛ք», «Դասադուլ», «Քայլ ա՛ռ»: Համալսարանի ներկայացուցիչը ըսաւ. «Դուք մտաք ներս, տեսաք, որ դուռը բաց է, ան որ կ’ուզէր միանալ, միացած է ձեզի, դուրս ելէք, որպէսզի մենք շարունակենք մեր աշխատանքը»:

Ցուցարարները փակած են Խանճեան փողոցը: Փակ են նաեւ Երեւանի շարք մը խաչմերուկներ եւ փողոցներ, այդ շարքին` Մոսկուեան, Սարեան, Աբովեան, Կորիւն, Նալպանտեան, Թումանեան, Հերացի, Ամիրեան, Օրբելի, Սայաթ-Նովա փողոցները, Մաշտոց եւ Բաղրամեան պողոտաները:

Յիշենք նաեւ, որ 14 Ապրիլին ցուցարարները մտած էին Հանրային ձայնասփիւռի կայան, ուր կուսակցութեան առաջնորդ Նիկոլ Փաշինեան հանդէս եկած է ուղերձով:

Share.

Leave A Reply

This site uses Akismet to reduce spam. Learn how your comment data is processed.