ՌՈՒՍՏԱՄԵԱՆ. «ԻՇԽԱՆՈՒԹԻՒՆՆԵՐԸ Կ’ԱՐՁԱԳԱՆԳԵՆ ԸՍՏ ԱՆՀՐԱԺԵՇՏՈՒԹԵԱՆ»

0

Հայաստանի Հանրապետութեան Ազգային Ժողովի ՀՅԴ խմբակցութեան ղեկավար Արմէն Ռուստամեան Ազգային Ժողովի ճեպազրոյցի ընթացքին ըսաւ, որ այսօր՝ 16 Ապրիլին դիւրութեամբ հասած է աշխատավայր՝ խորհրդարան, հակառակ Երեւանի փողոցներուն մէջ երթեւեկութեան կաթուածահար վիճակին:

«Ես առիթ ունեցած եմ գնահատել այն, ինչ որ կը կատարուի. ընդդիմութիւնը միշտ պիտի փորձէ աշխատիլ օրէնքի շրջանակներուն մէջ, եթէ օրէնքէն դուրս կու գայ, իշխանութեան առիթ կու տայ աշխատիլ այն զինանոցով, զոր կը թոյլատրուի», ըսաւ ան:

Ըստ Ռուստամեանի, իշխանութիւնները կ’արձագանգեն ըստ անհրաժեշտութեան: Միեւնոյն ատեն ան կոչ ուղղեց ոստիկանութեան զուսպ ըլլալ: «Մենք տեսած ենք օրեր շարունակ փակ փողոցներ, անոնք, ի վերջոյ, բացուած են, հարցը այն է, որ անոնք այնպիսի գործողութիւններ են, որոնք իշխանութեան կողմէ համապատասխան արձագանգի պիտի արժանանան», նկատեց պատգամաւորը:

Ռուստամեանի խօսքով, որեւէ երկրի մէջ նման գործողութիւններ օրինական չեն համարուիր: «Որեւէ տեղ տեսա՞ծ էք, որ կարելի է մտնել, ձայնասփիւռի շէնք գրաւել, գլխաւոր փողոցները փակել, ո՞ր մէկ երկրին մէջ ատիկա թոյլատրուած է, ոչ մէկ պայմանագիրով նման բան թոյլատրուած է», յայտնեց ան:

Պատգամաւորին համոզումով, Սերժ Սարգսեանի վարչապետութեան դէմ պայքարողները կ’առաջնորդուին «նպատակը կ’արդարացնէ միջոցը» սկզբունքով, ինչ որ տեւաբար վատ հետեւանքներ կ՛ունենայ:

Share.

Leave A Reply