ԱՐՄԷՆ ՌՈՒՍՏԱՄԵԱՆ. «ՍԵՐԺ ՍԱՐԳՍԵԱՆԷՆ Կ’ԱԿՆԿԱԼԵՆՔ, ՈՐ ՍՏԱՆՁՆԱԾ ԲԱՐԵՓՈԽՈՒՄՆԵՐՈՒ ԳՈՐԾԸՆԹԱՑԸ ԱՒԱՐՏԻՆ ՀԱՍՑՆԷ»

0

Հայաստանի Հանարպետութեան Ազգային Ժողովի ճեպազրոյցներու ընթացքին, ՀՅԴ խմբակցութեան ղեկավար Արմէն Ռուստամեան յայտարարեց, որ իրենք կը խօսէին ոչ թէ անձերու, այլ համակարգի փոփոխութեան մասին:

«Մենք 3 տարի այդ մասին խօսած ենք։ Մենք ըսած ենք, որ մեր գործողութիւնները անձերով չենք պայմանաւորուիր, մենք չէինք բացառեր նաեւ, որ Սերժ Սարգսեան կրնայ վաղը պաշտօն մը զբաղեցնել», ըսաւ ան:

Ռուստամեանի խօսքով, ըստ Սահմանադրութեան, իւրաքանչիւր կէս տարին անգամ մը խորհրդարանը կրնայ անվստահութիւն յայտնել վարչապետին: «1/3-ը կրնայ անվստահութիւն յայտնել վարչապետին, իսկ այսօր ընդդիմութիւնը այդքան է», ըսաւ ան:

Ըստ ՀՅԴ պատգամաւորին, իրենք ալ Սերժ Սարգսեանէն կ’ակնկալեն, որ բարեփոխումներու գործընթացը, որ ստանձնած է, աւարտին հասցնէ:

«Սերժ Սարգսեանն ալ պիտի ապացուցէ, որ այս փոփոխութիւնները ժողովուրդին համար էին: Ամենավատ տարբերակին ալ մեր երկիրը կ’ուղղուի շատ աւելի հաւասարակշռուած իշխանութիւն ունենալու ուղիով: Հիմնական սպառնալիքը, որ կը տեսնենք, նահանջի չուղղուիլն է այս անգամ ալ նախագահական ճամբով», ըսաւ ան:

Ռուստամեան նաեւ աւելցուց, որ Ազգային Ժողովին յատուկ նիստը պիտի գումարեն, որովհետեւ ի վերջոյ վարչապետը կը ծնի Ազգային Ժողովէն՝ աւելցնելով, որ ան որեւէ «հաւանական խափանում» չի տեսներ վաղուան նիստին գծով:

ՀՅԴ-ի նախարարական պաշտօններուն անդրադառնալով,  ՀՅԴ խմբակցութեան ղեկավարը ըսաւ, որ հաւանաբար յատուկ փոփոխութիւններ չըլլան:

«Բայց հետագային չեմ բացառեր, որ կառավարութեան մէջ փոփոխութիւններ տեղի ունենան, որովհետեւ այսօր կարեւոր կը նկատուին նաեւ անհատական կառավարման խնդիրները, որ նախարարներ պէտք է ստոյգ պատասխան տան իրենց ոլորտներու ձեռքբերումներուն համար», նկատել տուաւ ան:

Share.

Leave A Reply

This site uses Akismet to reduce spam. Learn how your comment data is processed.