ԽՄԲԱԳՐԱԿԱՆ՝ ՄԱՅԻՍ Ա./2018. ՍՈՒՐԻԱՀԱՅ ՀԱՄԱՅՆՔԻՆ ՆՈՒԱՃԱԾ ՎՍՏԱՀՈՒԹԻՒՆԸ

0

Հայոց Ցեղասպանութեան ոգեկոչական ձեռնարկներու նախօրէին, Սուրիոյ նախագահ տոքթ. Պաշշար ալ Ասատ եւ Առաջին Տիկին Ասմա ալ Ասատ ընդունեցին Բերիոյ Հայոց Թեմի Առաջնորդ Գերշ. Տէր Շահան Սրբ. Արք. Սարգիսեանն ու Ազգ. Վարչութեան եւ հայկական միութիւններու ներկայացուցիչները։

 

Նախագահը, այս առիթով, բարձրօրէն գնահատեց հայ համայնքին կառուցողական դերը՝ պատերազմի օրերուն Սուրիոյ դիմագրաւած ծանրագոյն դժուարութիւններու յաղթահարման մէջ: Նախագահին խօսքն ու հանդիպումէն ետք հրապարակուած նախագահական պալատին հաղորդագրութիւնը քանի մը ուղերձ կը հաղորդէին:

 

Այցելութիւնը առիթ էր մօտէն ծանօթանալու Բերիոյ Հայոց Թեմի գործունէութեան եւ վերականգնումի ծրագիրներուն, մտահոգութիւններուն եւ առաջարկներուն: Միւս կողմէ,  Հայոց Ցեղասպանութեան ոգեկոչական ձեռնարկներու նախօրէին նման հանդիպումի մը կազմակերպումը ու այս մանրամասնութիւնը նախագահական պալատի պաշտօնական հաղորդագրութեան մէջ արձանագրումը այլ բան չէր, եթէ ոչ զօրակցութիւն հայ ժողովուրդին ու անոր արդար պահանջատիրութեան:

 

Այցելութեան երկրորդ շարժառիթը լուսարձակի տակ բերելն էր պատերազմի ընթացքին հայութեան, Սուրիական Հայրենիքի  ընդհանուր շահերէն թելադրուած, հաւասարակշռուած մօտեցումն ու մշակութային, ուսումնակրթական, բարեսիրական աննահանջ գործունէութիւնը, յատկապէս Հալէպ քաղաքի պատերազմական աղիտալի օրերուն:

Այս իմաստով նախագահը կը շեշտէր թէ. «Հայրենասիրութիւնը լոկ խօսքով չեն արտայայտեր։ Հայրենասիրութիւն կը նշանակէ պատկանելիութեան զգացում, հայրենի հողի պաշտպանութիւն։ Կը նշանակէ, որ մեզմէ իւրաքանչիւրը իր ներդրումը բերէ ամենալաւ ձեւով, անկախ իր ազգային կամ ցեղային պատկանելիութենէն»:

Հանդիպումն ու կարծիքներու փոխանակումը հրաւէր մըն էր նաեւ նորովի թափով լծուելու վերականգնումի աշխատանքներուն, առաւել եւս բացուելու սուրիական միջավայրին՝ վերստին ծաղկեցնելու սուրիական բազմերանգ ընկերութիւնը: Այս պատգամն էր, որ նախագահը կը յղէր, երբ կ՛ըսէր. «Մեր ներկայ մարտահրաւէրը ոչ թէ միայն պատերազմին հետեւանքով երկրին քանդուած ենթակառոյցները վերանորոգելն է, այլ վերակազմաւորելն է սուրիական ընկերութիւնը իր բազմաշերտ ու գունեղ հիւսուածքով։ Այս բազմազանութիւնն է, որ կը զատորոշէ սուրիական ընկերութիւնը այլ ընկերութիւններէ»։

 

Նախագահը սուրիական ընկերութեան զանազան շերտերու համարկումին, գործակցութեան անդրադառնալով կարեւոր կը համարէր երկրի զարգացման գործընթացին մէջ քաղաքացիական հասարակութեան դերը, համաքաղաքացիներուն միջեւ գոյութիւն ունեցող տնտեսական, մշակութային, ուսումնակրթական, քաղաքական, ընկերային փոխյարաբերութիւններու զարգացման միջոցով: Սա հրաւէր մըն էր հայ համայնքին՝ իր գործուն դերակատարութիւնը ունենալու քաղաքացիական հասարակութեան վերաձեւաւորման մէջ եւս:

 

«Հայ համայնքը փոքրամասնութիւն մը չէ այլեւս, ան անբաժան մասնիկն է սուրիական ընկերութեան», կ’եզրափակէր նախագահը՝ նորարար ծրագիրներով միասնական աշխատանքի հրաւիրելով սուրիահայութիւնը, իսկ երկրէն մեկնող սուրիահայերուն վերադարձի կոչ ուղղելով:

 

«Գ.»

Share.

Leave A Reply