ՀԱԼԷՊԱՀԱՅ ԵՐԳՉԱԽՈՒՄԲԵՐՈՒ ՓԱՌԱՏՕՆ

0

Հովանաւորութեամբ Հայաստանի Հանրապետութեան 100-ամեակի Սուրիոյ Կեդրոնական Մարմինին, Կիրակի, 6 Մայիս 2018-ի երեկոյեան ժամը 6:00-ին, Հալէպի «Գէորգ Եսայեան» սրահէն ներս տեղի ունեցաւ հալէպահայ երգչախումբերու փառատօնը՝ մասնակցութեամբ Կրթասիրաց Մշակութային Միութեան «Առնօ Պապաճանեան» եւ Համազգայինի «Զուարթնոց» երգչախումբերուն:

Փառատօնին ներկայ էին  հալէպահայ երեք համայնքապետները, Հայաստանի Հանրապետութեան Հալէպի Գլխաւոր Հիւպատոս Արմէն Սարգիսեան, Սուրիոյ խորհրդարանի երեսփոխան Ժիրայր Րէիսեան, Ազգ. Վարչութեան, հալէպահայ մշակութային, մարզական, հայրենակցական,  բարեսիրական միութիւններու ներկայացուցիչներ, արժանապատիւ քահանայ հայրեր եւ հոծ բազմութիւն:

Մայիս ամիսը հայ ժողովուրդի պատմութեան մէջ հայրենիքին, ազգին անձնուրաց նուիրուածութեան ու հաւատարմութեան նուիրական խորհրդանիշն է: Ուստի այս յաղթանակի ոգին ապրեցնելու եւ գալիք սերունդներուն մէջ հայու ազատատենչ ոգին բարձր պահելու կը ծառայեն սոյն նախաձեռնութիւնները:

Օրուան բեմավար Քրիստ Հապոյեանի հրաւէրով,  Հայ Կաթողիկէ Համայնքի անունով արաբերէն բացման խօսք արտասանեց Նուշիկ Տէր Սարգիսեան: Ան անդրադառնալով Սուրիոյ Նահատակաց տօնին, վեր առաւ հայրենիքի պաշտպանութեան համար իրենց կեանքը զոհաբերած հայ եւ արաբ նահատակներուն սխրանքը: Ապա ներկայացուց հայ մշակոյթին դերը յաղթանակներու փառաբանման եւ հոգեւոր մեր արժէքներու պահպանման մէջ:

Նուշիկ Տէր Սարգիսեան դիտել տուաւ, որ նախանցեալ շաբաթ, «Նարեկացի» երգչախումբի գեղարուեստական ղեկավարին  արկածի ենթարկուելուն եւ վախճանելուն հետեւանքով, «Նարեկացի» երգչախումբը մաս պիտի չկազմէ այս ձեռնարկին:

Հայերէն բացման խօսք արտասանեց Նայիրի Պարսումեան:

Ան լուսարձակի տակ առաւ երգի ու երաժշտութեան արժէքը՝ աւելցնելով որ հայ երգն ու երաժշտութիւնը մեր լինելութեան եւ պայքարի կարեւոր գործօններէն կը համարուին: Անդրադառնալով Սուրիոյ նահատակաց տօնին, Սուրիոյ հայ եւ տեղացի նահատակներուն, ինչպէս նաեւ Սարդարապատի, Բաշ Ապարանի եւ Ղարաքիլիսայի նահատակներուն կերտած յաղթանակներուն ըսաւ.«Մեր ձայնն ու երգը կը միացնենք Սարդարապատի զանգերու ղօղանջներուն՝ ուխտելով համախմբուիլ  ու ծառայել հայութեան ու հայրենիքին»:

Փառատօնի սկիզբը ելոյթ ունեցաւ Կրթասիրաց Մշակութային Միութեան «Առնօ Պապաճանեան» երգչախումբը, գեղարուեստական ղեկավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Լիզէթ Աւընեանի: Խումբը յաջորդաբար ներկայացուց  հոգեւոր, դասական եւ հայրենասիրական հետեւեալ երգերը.- «Տէրունական Աղօթք», «Տոմինէ Եզու», «Սանգդուս», «Կատակ»,«Տէոկրացիաս Պրիթէն», «Հայոց Կանայք», արաբերէն երգ մը եւ հայկական ժողովրդական երգերու շարք մը:

Ապա ջութակահարներ՝ Տեսիլ Սարեան եւ Անժելլա Տաղլեան ներկայացուցին «Կապոյտ Մանուշակ» եւ «Տեսնեմ Անին» երգերը, դաշնամուրի ընկերակցութեամբ Ռուզան Պարսումեանի:

Այնուհետեւ ելոյթ ունեցաւ Համազգայինի «Զուարթնոց» երգչախումբը, գեղարուեստական ղեկավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Ռուզան Պարսումեանի՝ յաջորդաբար մեկնաբանելով «Եաման Եար», «Ճօճան», «Ալմաստը Շողում է», «Հոյ Իմ Նազանի Եարս», «Փամփուշտդ, Հալէ՛պ», «Ազգ Փառապանծ», «Պիտ Պաշտպանեմ», «Վերականգնի՛ր Կիլիկիա»,«Հայոց Բանակ» եւ «Հայրենիքիս Հետ» երգերը, վերջինս  մենակատարութեամբ Արամ խաչատուրեանի եւ Լենա Աշըգեան-Պաղտոյեանի:

Աւարտին քոյր երգչախումբերը միասնաբար ներկայացուցին «Տօնդ Շնորհաւոր, Հալէպ» եւ «Երեւան-Էրեբունի» երգերը: Երգչախումբերու միասնական ելոյթը կ’արտացոլէր հալէպահայութեան միասնական ոգին: Անոնք երգերու գեղեցիկ ընտրանիով, կատարողական բարձր մակարդակով ոգեւորեցին հանդիսականները:

Փառատօնի եզրափակիչ պատգամը տուաւ Բերիոյ Հայոց Թեմի Առաջնորդ Գերշ. Տէր Շահան Սրբազան Արք. Սարգիսեան, որ ըսաւ. «Փառք եւ գոհութիւն կու տամ Աստուծոյն, ամենակալ, ամենազօր, մարդասէր եւ հայասէր Աստուծոյն, որ մեզ խաւարէն լոյս, ստրկութենէն ազատութիւն եւ անկախութիւն առաջնորդուելու կամք, իմաստութիւն եւ զօրութիւն շնորհեց: Հայաստանի Հանրապետութեան 100-ամեակը, արդարեւ, ամէն հայու ամենացնծալի տօնն է: 100-ամեակի Սուրիահայ Կեդրոնական Մարմինի Գործադիրին կողմէ կազմակերպուած այս փառատօնին առիթով, համայն ժողովուրդին եւ մեր անունով բարձրագոյն գնահատանքս կ’ուզեմ յայտնել կազմակերպիչ մարմինին, որ հաստատակամ,  որդեգրուած ծրագիրին հաւատարիմ մնալով, մեր ժողովուրդին ուրախութեան, հպարտութեան, ցնծութեան, հայրենիքով մարդ դառնալու եւ հայրենիքին համար նպատակադրուած կեանք ապրելու հրաւէրը տուաւ»:

«Աստուածաշունչ մատեանին մէջ փառքը կը վերաբերի Աստուծոյ: Փառատօն բառը երբ կը գործածենք՝ պէտք է մտածենք փառքի մասին»:

«Այս փառատօնը զԱստուած փառաբանելու կողքին, մեր ազատութեան, անկախութեան ճանապարհին իրենց կեանքը նուիրագործած անմահներուն փառքին եւ օրհնութեան օրն է: 6 Մայիսը Միջին Արեւելքի շատ մը երկիրներու մէջ իրենց անկախութեան համար նահատակուածներուն տօնն է նաեւ: Մենք Սուրիական Հայրենիքին մէջ, Սուրիոյ բոլոր հերոս նահատակներուն մեր յարգանքի տուրքը մատուցեցինք: Խոնարհեցանք յիշատակին առջեւ նաեւ հայ հերոսներուն, որոնք 28 Մայիս 1918-ին  կերտեցին անկախ հայրենիք եւ այդ թուականէն մինչեւ քառօրեայ պատերազմ դէմ դրին մեր թշնամիներուն: Թող անոնց ներկայութիւնը մեզ զգաստութեան հրաւիրէ: Թող անոնց պատգամը ազատ, անկախ Հայաստանի Հանրապետութիւն կերտելու եւ զայն ամուր պահելու, անփորձանք պահելու վճռակամութեամբ պարուրէ մեր սրտերն ու հոգիները»:

«Կը գնահատենք մեր երկու երգչախումբերը՝ Կրթասիրաց եւ Համազգային մշակութային միութեանց միասնական եւ միասնակամ ներկայութիւնը: Այս բեմէն արտասանուած միասնակամութեան եւ միասնականութեան կոչերը լոզունքներ չեն: Սոսկ լոզունքներու հաւատացողները այս սրահէն դուրս կը գտնուին: Մեր միասնականութիւնը եւ միակամութիւնը ամէն բանէ վեր պէտք է դասենք: Ձեր ծափողջոյններով կ’ուզեմ առանձնաբար գնահատել տիկ. Գայիանէն, ինչպէս նաեւ երգչախումբերուն դաշնամուրով ընկերակցողները՝ իրենց հրաշալի ծառայութեան համար»:

Ելոյթը իր աւարտին հասաւ Սրբազան Հօր «Պահպանիչ» աղօթքով:

Լուսին Ապաճեան-ՉիլԱբոշեան

Share.

Leave A Reply

This site uses Akismet to reduce spam. Learn how your comment data is processed.