ԾԻՍԱԿԱՆ ԳԻՏԵԼԻՔԵՐՈՒ ԴԱՍԱԽՕՍԱՇԱՐՔ

0

ՍՕ Խաչը իր մասնաճիւղերու եւ Շրջ. Յանձնախումբերու ներդրումով կը կազմակերպէ հանրօգուտ ձեռնարկներ, որոնք կ’ընդգրկեն կրօնական եւ ընկերային դաստիարակութենէն մինչեւ արդիական գիտելիքներու փոխանցում։ Շրջ. Վարչութեան նախաձեռնութեամբ եւ Շրջ. Դաստիարակչական Յանձնախումբին կազմակերպութեամբ Մեծ Պահոց շրջանին, յաջորդաբար տեղի ունեցան ծիսական գիտելիքներու մասին դասախօսութիւններ, ամէն Երկուշաբթի առաւօտ, ԱՄԺ Տան «Լ. Շանթ» սրահէն ներս, Բերիոյ Հայոց Թեմի քահանայ հայրերուն ներկայացումով, նպատակ ունենալով հանրութիւնը իրազեկ դարձնել ծիսական գիտելիքներու։

Յանձնախումբի ատենապետ Զեփիւռ  Մուղալեան բացման խօսքով յայտնեց. « Մեծ Պահքի տեւողութեան, արեւագալի եւ հսկումի ժամերը լաւագոյն առիթներ են ինքնասրբագրութեան եւ զղջումի, յաղթահարելու համար բազում փորձութիւններ։ Այս գիտակցութեամբ Յանձնախումբը դիմեց մեր եկեղեցւոյ քահանայ հայրերուն, որոնք իւրաքանչիւր դասախօսութենէ վերջ հրաւիրեցին ներկաները սրտբաց զրոյց ունենալու օրուան խորհուրդին կապակցաբար»։

Ծիսագիտութիւնը մեզի կը սորվեցնէ մեր եկեղեցւոյ խորհուրդները։ Համաձայն Մալխասեանց բառարանին, ծէս կը նշանակէ կարգ-կանոն,  սովորութիւն, որուն համազօր է արարողութիւն բառը։

Առաջին նիւթը ներկայացուեցաւ Երեքշաբթի, 19 Փետրուար 2018-ի առաւօտեան Տ. Յուսիկ Ա. քահանայ  Սեդրակեանի կողմէ, որ ընդհանուր ակնարկով թուեց հայ եկեղեցւոյ եօթը խորհուրդները, կեդրոնանալով Մկրտութեան եւ Դրոշմին վրայ։ Ան դիտել տուաւ, որ հայ եկեղեցին իր զաւակները կը մկրտէ եւ Ս.Միւռոնով  կը դրոշմէ, որպէսզի դաւանին քրիստոնէութիւնը եւ դառնան Հայաստանեաց Առաքելական Ս. եկեղեցւոյ անդամ։ Տէր Յուսիկ Ա. քահանայ կարեւորութեամբ շեշտեց հոգեւոր դաստիարակութեան անհրաժեշտութիւնը մեր զաւակներու կեանքէն ներս եւ անոնց առաջնորդութիւնը դէպի եկեղեցի եւ Կիրակնօրեայ դպրոցներ։

Յաջորդաբար երկու հանդիպումներով՝ Երկուշաբթի, 26 Փետրուար եւ 12 Մարտ 2018-ին, Տ. Մաշտոց Ա. Քհնյ. Արապաթլեան ներկայացուց ապաշխարհութեան եւ Ս. Հաղորդութեան խորհուրդները, Ս. Պատարագի ընթացքը եւ պատարագիչ կղերականի դերը, որ կը մարմնաւորէ Յիսուս Քրիստոսը եւ ծոմապահութեամբ Ս. Պատարագի կ՛ելլէ ու քաւութիւն կը խնդրէ Տիրոջմէն։ Անդրադառնալով ապաշխարհութեան ան յայտնեց, որ սա միացումն է մեր Տիրոջ, որուն շուրջ  օրինակներ բերաւ Ս. գրային առակներէն։

Տնօրհնէք, Միւռոնօրհնէք, Ջրօրհնէք ծէսերուն ակնարկելով ըսաւ, որ սոյն խորհուրդները օրհնութիւն են մեր կեանքին մէջ. անոնք սերունդէ-սերունդ մեզի կը փոխանցուին, լուսարձակի տակ բերելով հոգեհանգիստի սեղանի, նորակերտ բնակարանի եւ նշանախօսութեան յատուկ օրհնութեանց նշանակութիւնը։ Քրիստոնէութեան վաղ շրջանէն  ժողովուրդը հաւատացած էր աղի, արմտիքի, ջուրի եւ տունի օրհնութեան գաղափարին ։ Քահանայ հայրը յայտնեց, թէ ջուրը Յիսուսի մկրտութիւնը կը խորհրդանշէ, աղը՝ տնեցիները, այս իմաստով ալ կ’ըսուի «Տան ոչ ջուրը պակսի, ոչ ալ աղը»։ Իսկ տնօրհնէքը՝ առաքեալներուն կողմէ քրիստոնէութեան շրջանէ-շրջան տարածումը կը խորհրդանշէ։

Ինչ կը վերաբերի Միւռոնօրհնէքին, այս արարողութիւնը կը կատարուի եօթը տարին անգամ մը, յատուկ ծէսերով՝ Մայր Աթոռ Ս. Էջմիածնի եւ Անթիլիասի Մայրավանքին մէջ, մասնակցութեամբ հայ եկեղեցւոյ եպիսկոպոսներուն եւ բազմաթիւ կղերականներու։ Օրհնուած Ս. Միւռոնը, որուն մէջ կը խառնուի նաեւ հինէն մաս մը, կը բաժնուի բոլոր թեմերուն։ Ս. Միւռոնի պատրաստութեան համար կ’օգտագործուին քառասունէ աւելի ընտիր նիւթեր, որոնք 40 օր խորանին վրայ  Ս. Միւռոնի կաթսային մէջ ծածկուած կը մնան։

Մկրտութեան ժամանակ երեխան կը դրոշմուի Ս. Միւռոնով, որուն նպատակն է մարդը սրբել եւ մաքրել իր մեղքերէն, իսկ ջրօրհնէքը կը խորհրդանշէ մարդոց ապաքինումը հիւանդութիւններէ։

Քահանայ հայրը եզրակացնելով իր նիւթը, թելադրեց մեր եկեղեցւոյ ծէսերուն իմաստը, խորհուրդը եւ աւանդութիւնը փոխանցել սերունդներուն, քանի որ  անոնք մեզի շնորհուած Աստուածային օրհնութիւններ են ։

Դասախօսաշարքի չորրորդ բաժինով, 9 Ապրիլի առաւօտեան, Տ. Տաթեւ Ա. Քահանայ Միքայէլեան ներկայացուց «Քրիստոնէական Դաստիարակութեան Անհրաժեշտութիւնը  Ներկայ Կեանքին մէջ» նիւթը։

Ան ներկայացուց սփիւռքահայ մեր կեանքին փուլերը եւ դաստիարակութեան հիմնական նպատակները, որոնք են՝ գոյապայքար, հայակերտում եւ ազգապահպանում։ Ապա աւելցուց. «Համաշխարհայնացման այս դարուն համացանցը կլանած է ամէն ոք եւ մարդոց ուղղած դէպի մեկուսացում՝ զանոնք հեռացնելով ազգային պատկանելիութենէն, հաւատալիքներէն եւ ընկերութեան կորիզը հանդիսացող ընտանիքէն, հետեւաբար մեր պարտականութիւնն է հայ մարդը պահել քրիստոնավայել եւ Աստուածահաճոյ միջավայրի մէջ»։ Քահանայ հայրը թելադրեց.-

–              Անհրաժեշտ է որ հայկական վարժարաններ եւ միութիւններ իրենց դաստիարակչական ծրագիրներուն մէջ տեղ յատկացնեն քրիստոնէական դաստիարակութեան, համախորհուրդ՝  եկեղեցւոյ Կրօնական Ժողովին։

–              Քրիստոնէական եւ հայեցի դաստիարականութիւնը նակատել մէկ ամբողջութիւն։

–              Զարկ տալ նախամուսնական եւ նորակազմ ընտանիքներու բարոյական դաստիարակութեան ծրագիրներուն։

–              Յատուկ դասընթացքներու ընդմէջէն պատրաստել կրօնի դասաւանդման ուսուցիչներ։

–              Վերամշակել Կիրակնօրեայ դպրոցներու ծրագիրները եւ օգտագործել դաստիարակչական արդիական միջոցներ։

–              Ս. Գրքի սերտողութիւններ կատարել տարիքային տարբեր բաժանումներու հաւատացեալներուն յատուկ։

Քահանայ հայրը իր դասախօսութեան աւարտին նկատել տուաւ, որ  Մեծի Տանն Կիլիկիոյ ՆՍՕՏՏ Արամ Ա. Վեհափառ  Հայրապետը, Հայրապետական Մականը ստանձնած իր հռչակագիրով արդէն իսկ ահազանգ հնչեցուցած էր վերոյիշեալ մտածումները մարմնաւորող մարտահրաւէրներուն նկատմամբ։

Այս բոլորին մէջ հիմնականը կը մնայ միակամ աշխատանքը եւ հաւատաւոր զոհաբերութիւնը, որուն խօսուն օրինակը կը հանդիսանայ Սուրիահայ Օգնութեան Խաչը։

 

                                                                                                                      ՍՕ Խաչի

                                                                                                                    Դաստիարակչական   Յանձնախումբ

Share.

Leave A Reply

This site uses Akismet to reduce spam. Learn how your comment data is processed.