ԱՊՐԻԼԵԱՆ ՈԳԵԿՈՉՈՒՄ ԿՐԹԱՍԻՐԱՑ Ս. ՉԷՄՊԷՐՃԵԱՆ ԵՐԿՐԴ. ՎԱՐԺԱՐԱՆԷՆ ՆԵՐՍ

0

Ազգային աւանդութիւններ պահպանելը ինքնանպատակ արարք մը չէ, այլ աւանդ մըն է, որ կը փոխանցուի սերունդէ սերունդ, անոնց մօտ ամրապնդելու ազգային ինքնութիւնը եւ պահպանելու մեր արժէքները: Այս նպատակէն մեկնած, չկայ հայ դպրոց մը, աշխարհի ո՛ր անկիւնն ալ ըլլայ ան, որ չոգեկոչէ Հայոց Ցեղասպանութիւնը: Ահա եւ այդ աւանդութեան հետեւելով, սակայն իր իւրայատուկ գոյնն ու ոճը պահպանելով, Կրթասիրաց Ս. Չէմպէրճեան Երկրդ. Վարժարանի բոլոր կարգի աշակերտները, Կրթասիրաց Մշկթ. Միութեան «Զ. Գաբրիէլեան» սրահէն ներս, Երկուշաբթի 23 Ապրիլ 2018-ի կէսօրին, ներկայ գտնուեցան իրենց դասընկերներուն ու ուսուցիչներուն պատրաստած Ապրիլեան ոգեկոչական ձեռնարկին: Հանդիսութեան ներկայ էին նաեւ Արժ. Տ. Տաթեւ Ա. Քհնյ. Միքայէլեանը, վարժարանի Հոգաբարձութիւնը, տնօրէն երկրչփ. Անդրանիկ Պօղոսեանը, Ծնողաց յանձնախումբը, ինչպէս նաեւ ուսուցչական ու վարչական կազմերը:

Զոյգ քայլերգներէն ետք, ներկաները հրաւիրուեցան մէկ վայրկեան յոտնկայս յարգելու Հայոց Ցեղասպանութեան, ողջ հայ ազգի ու Սուրիական Հայրենիքի նահատակներուն յիշատակը: Աշակերտները արտասանեցին հայերէն ու արաբերէն բացման խօսքեր, որոնցմէ ետք սկսաւ աւելի քան մէկ ու կէս ժամ տեւող գեղարուեստական յայտագիրը:

Միջնակարգէն ու երկրորդականէն խումբ մը աշակերտներ ներկայացուցին «Chat-ի ընկեր» խորագիրով թատերական պատկեր մը: Ասմունքով հանդէս եկան նախակրթարանէն խումբ մը աշակերտներ՝ ներկայացնելով Ա. Ծառուկեանի «Ուխտ Արարատին» բանաստեղծութիւնը, իսկ միջնակարգէն ու երկրորդականէն խումբ մը ներկայացուց «Ոտքի՛, Հա՛յ Ազգ» քերթուածէն բաժիններ: Նոյնպէս միջնակարգէն ու երկրորդականէն խումբ մը ասմունքեցին արաբերէն «Չես Կրնար Ցեղասպանութեան Ենթարկել Մեզ Երկրորդ Անգամ» բանաստեղծութիւնը, որուն հեղինակն է վարժարանիս միջնակարգի դաստիարակ եւ արաբերէն լեզուի ուսուցիչ Արա Մութաֆեան: Մէջ ընդ մէջ հանդէս եկաւ վարժարանիս նախակրթարանի ու միջնակարգի աշակերտներէն բաղկացած երգչախումբը, որ ներկայացուց օրուան խորհուրդին համապատասխանող հայրենասիրական երգերու շարք մը՝ «Ատանայի ողբը», «Ապրիլ 24» , «Ձայն մը Հնչեց» եւ  «Հայեր Միացէ՛ք»: Իսկ ԺԱ. Կարգէն կարգ մը աշակերտներ մասնակցեցան արաբերէն հայրենասիրական երգերով: Այս առիթով  պատրաստուած էին երկու տեսերիզներ՝ հայերէն «Ա՜խ Տունս» եւ արաբերէն հայրենասիրական նիւթ մը: Յիշենք որ բեմը գեղեցկօրէն յարդարուած էր մեր ժողովուրդին պահանջատիրութիւնը արտայայտող պաստառով, Ծիծեռնակաբերդի մանրապատկերով, Պատմական Հայաստանի քարտէզներով ու ցեղասպանութեան պատկերներով:

Օրուան բանախօսն էր վարժարանիս արաբերէնի վաստակաւոր ուսուցչուհի Ուաֆա Սուլէյման, որ իր խօսքը բացաւ հէքիաթային նախաբանով: Ան գեղեցկօրէն ներկայացուց Հայաստան աշխարհը իր Սեւանայ լիճով եւ Տէր Զօրի անապատը կտրած հայ ժողովուրդին պատմութիւնը ներկայացնելով հասաւ մինչեւ Սուրիա՝ լուսարձակի տակ առնելով հայ ժողովուրդին խաղաղասէր եւ ստեղծագործ էութիւնը: Սուրիահայերուն հետ աղ ու հացի մտերմութիւնը շեշտելով, ան դատապարտեց Թուրքիոյ ոճրային արարքը, որ մինչեւ օրս կը շարունակէ իր վայրագութիւնը Սուրիոյ արաբ ժողովուրդին նկատմամբ:

Հանդիսութիւնը փակեց Արժ. Տ. Տաթեւ Քհնյ. Միքայէլեան, որ օրհնութիւններ տալէ առաջ, յիշեց Սուրիոյ դրական դերակատարութիւնը Հայոց  Ցեղասպանութեան տարիներուն՝ ներկայացնելով թէ ինչպէ՛ս սուրիացի ժողովուրդը ապաստան տուաւ հայերուն եւ ինչպէ՛ս հայութիւնը ծաղկուն կեանք ունեցաւ Սուրիական Հայրենիքի երդիքին տակ: Ապա ան  հրաւիրեց աշակերտները յոտնկայս, բարձրաձայն շնորհակալութիւն յայտնելու սուրիացի ժողովուրդին ու Սուրիոյ կառավարութեան: Քահանայ հայրը «Պահպանիչ»ով փակեց հանդիսութիւնը:

Ապրիլեան ոգեկոչումը առիթ մըն է, հայ աշակերտութեան համար ի մի գալու, վերյիշելու իրենց պապերուն անցեալը ու վերանորոգելու պահանջատիրութեան ուխտը: Ինքնաճանաչութեան ճամբան կը սկսի անցեալը ճանչնալով ու անոր հետ հաշտուելով: Հայկական Վարժարանը այն օճախն է, ուր հայ աշակերտը իր առաջին քայլերը կ’առնէ այդ ճամբուն վրայ եւ ուր սերունդէ սերունդ կը փոխանցուի պահանջատիրութեան ջահը:

Յուշիկ Ղազարեան

Share.

Leave A Reply

This site uses Akismet to reduce spam. Learn how your comment data is processed.