ՔԵՍԱՊԻ ՄԷՋ ՀԱՅԿԱԿԱՆ ՑԵՂԱՍՊԱՆՈՒԹԵԱՆ 103-ՐԴ ՏԱՐԵԼԻՑԻ ՈԳԵԿՈՉՈՒՄ

0

Երկուշաբթի, 23 Ապրիլ 2018-ին, ՍԵՄ-ի «Շանթ» Մասնաճիւղի երիտասարդութիւնը, ըստ աւանդութեան, Հսկում մը կազմակերպելով ոգեկոչեց Հայոց Ցեղասպանութեան տարելիցը՝ Քեսապի Ս. Աստուածածին եկեղեցւոյ մէջ, ներկայութեամբ երեք համայնքներու հոգեւոր հովիւներուն, միութիւններու ներկայացուցիչներուն եւ քեսապահայերու հոծ բազմութեան:

Հսկումը սկսաւ երեկոյեան ժամը 8:00-ին: Ներկաները նախ մէկ վայրկեան յոտնկայս լռութեամբ յարգեցին հայ ժողովուրդին եւ սուրիական հայրենիքին նահատակներուն յիշատակը: Ապա բացման խօսքով լուսարձակի տակ առնուեցաւ ՍԵՄ-ի երիտասարդութեան կարեւոր դերը Հայ Դատի ճանաչումին, արդարացի լուծումին համար տարուող աշխատանքներուն մէջ: Շեշտը դրուեցաւ հայ ժողովուրդի անցեալի ու ներկայի փառաւոր յաղթանակներուն լոյսին տակ նոր սերունդին նայուածքը դէպի հայկական նոր վերածնունդ ուղղելու կարեւորութեան վրայ:

Հսկումի գեղարուեստական յայտագիրը կ՛ընդգրկէր Հայ Դատի գրասենեակներուն եւ անոնց աշխատանքին մասին տեսերիզի ցուցադրութիւն, խմբային եւ անհատական ասմունքներ, մեներգներ եւ խմբերգներ: Օրուան բանախօսն էր Քրիստափոր Հապոյեան, որ ժամանած էր Հալէպէն: Ան նախ գնահատեց ՍԵՄ-ի «Շանթ» Մասնաճիւղի երիտասարդութեան տարած աշխատանքը, ապա իր խօսքը ուղղեց երէց սերունդին եւ ծնողներուն՝ դիտել տալով որ անոնք յաջողած են պատրաստել այնպիսի պահանջատէր եւ ազգանուէր երիտասարդութիւն մը, որ իր աննկուն աշխատանքով եւ մեծ կորովով օրինակ պիտի հանդիսանան գալիք սերունդներուն:

Բանախօսը այնուհետեւ անդրադարձաւ թուրանական ծրագիրին, պարզելով անոր ծագումն ու հեռանկարը, աւելցնելով որ այդ ծրագրին նպատակներէն մէկն ալ հայ ժողովուրդին բնաջնջումն է, փոխարէնը, սակայն, հայութիւնը միշտ դէմ դրած է այս ծրագրին, բայց եւ հայ երիտասարդութիւնը առաջամարտիկը հանդիսացած է իր ժողովուրդի պայքարին՝ հիմնած է կուսակցութիւններ, կերտած է ազատ, անկախ Հայաստան  եւ մեծ նուաճումներ ունեցած է Հայ Դատի ուղիին մէջ: Վկայ՝ ՍԵՄ-ի կազմակերպած ձեռնարկները, որոնք կարեւոր են երիտասարդ սերունդին յիշողութիւնն ու պահանջատիրական ոգին վառ պահելու համար:

Հսկումի աւարտին, Տէր Նարեկ Քհնյ. Զերէնցեան իր սրտի խօսքով եւ «Պահպանիչ»ով փակեց ձեռնարկը:

Անի Քերպապեան

Share.

Leave A Reply

This site uses Akismet to reduce spam. Learn how your comment data is processed.