ՆՍՕՏՏ ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ ՀԱՅԿԱԿԱՆ ՊԼՈՔԻ ԵՐԵՍՓՈԽԱՆՆԵՐԸ

0

Հինգշաբթի, 10 Մայիս 2018-ի առաւօտուն, ՆՍՕՏՏ Արամ Ա. Վեհափառ Հայրապետը ընդունեց այցելութիւնը Լիբանանի նորընտիր Խորհրդարանի հայկական պլոքի անդամները՝ գլխաւորութեամբ Տիար Յակոբ Բագրատունիի։

Յայտնենք, որ Տիար Բագրատունիի կողքին, հայկական պլոքի ներկայ անդամներն են Տիար Յակոբ Թերզեան եւ Ալեքսանտր Մաթոսեան։ Վեհափառ Հայրապետը, ողջունելով անոնց երեսփոխան ընտրուիլը, ուրախութիւնը յայտնեց հայկական երեսփոխանական պլոքի կազմութեան համար, միաժամանակ ըսաւ, որ մեր համայնքային ներկայութիւնը Խորհրդարանէն ներս աւելի զօրեղ պիտի դառնար, եթէ Հնչակեան ու Ռամկավար կուսակցութեանց ներկայացուցիչները եւս ընտրութեան յաջողութիւն արձանագրէին։ Նորին Սրբութիւնը շեշտեց, որ անհրաժեշտ է քաղաքական մարզէն ներս, մեր երեք կուսակցութիւնները փոխադարձ հասկացողութեան ու գործակցութեան ոգիով շարունակեն պաշտպանել Լիբանանի հայութեան իրաւունքներն ու շահերը։

Հայկական պլոքի ներկայացուցիչները, բաժնելով Հայրապետին տեսակէտները՝ հաւաստիացուցին, թէ վերանորոգ նուիրումով ու գործակցական ոգիով պիտի շարունակեն պաշտպանել հայ համայնքին իրաւունքները։

Share.

Leave A Reply

This site uses Akismet to reduce spam. Learn how your comment data is processed.