ԹՈՒՐՔԻՈՅ ՄԷՋ ՊԱՇՏՕՆԱՊԷՍ ՀՐԱՊԱՐԱԿՈՒԱԾ Է ՆԱԽԱԳԱՀԻ ԹԵԿՆԱԾՈՒՆԵՐՈՒ ՎԵՐՋՆԱԿԱՆ ՑՈՒՑԱԿԸ

0

«Արմէնփրէս» վկայակոչելով թրքական «Անատոլու» գործակալութիւնը կը հաղորդէ, որ Թուրքիոյ բարձրագոյն ընտրական յանձնաժողովը հրապարակած է 24 Յունիսին տեղի ունենալիք նախագահական ընտրութիւններուն գրանցուած թեկնածուներու վերջնական ցուցակը: Երկրի նախագահի պաշտօնի համար կը մրցին վեց թեկնածուներ:

Թեկնածուներն են՝ գործող նախագահ, իշխող «Արդարութիւն եւ Զարգացում» կուսակցութեան թեկնածու Ռեճէպ Թայիպ Էրտողան, «Լաւ» կուսակցութեան առաջնորդ Մերալ Աքշենէր, քեմալական Հանրապետական Ժողովրդական Կուսակցութեան թեկնածու Մուհարէմ Ինջէ, քրտամէտ Ժողովուրդներու Ժողովրդավարական կուսակցութեան անդամ Սելահատտին Տեմիրթաշ, «Վաթան» կուսակցութեան ղեկավար Տողու Փերինչէք եւ «Սաատեթ» կուսակցութեան ղեկավար Թեմէլ Քարամոլլաօղլու:

Նախագահական եւ խորհրդարանական ընտրութիւնները տեղի պիտի ունենան նոյն օրը՝ 24 Յունիսին: Այս ընտրութիւններով Թուրքիան կ’ անցնի կառավարման խորհրդարանական համակարգէն նախագահական համակարգի:

Թուրքիոյ «Ազգայնական շարժում» կուսակցութիւնը յայտարարած է, որ նախագահական ընտրութիւններուն սատար պիտի հանդիսանայ նախագահ Էրտողանի:

Թուրքիոյ քաղաքական ասպարէզին մէջ վերջերս՝ Հոկտեմբեր 2017-ին յայտնուած «Լաւ» կուսակցութիւնը կը խոստանայ անակնկալներ մուծել  յառաջիկայ ընտրութիւններու ընթացքին: Ներկայիս Էրտողանի ղեկավարած քաղաքական ուժի հետ համագործակցող «Ազգայնական Շարժում» կուսակցութեան նախկին անդամ, նախապէս  երկրի ներքին գործոց նախարարի պաշտօնը զբաղեցուցած Մերալ Աքշենէր կ’ակնկալուի, որ նախագահական ընտրութիւններուն կը հանդիսանայ Էրտողանի հիմնական մրցակիցը: Ընդ որում, ան կ’ըլլայ առաջին կին թեկնածուն, որ կը մրցի անոր դէմ:

Քեմալական կուսակցութեան թեկնածու Մուհարէմ Ինջէ աւելի շուտ յայտարարած է, որ եթէ նախագահական ընտրութիւններու երկրորդ փուլ տեղի ունենայ եւ ինքը ձախողի, ապա պիտի աջակցի ընդդիմադիր թեկնածուին:

Յիշեցնենք նաեւ, որ քրտամէտ կուսակցութեան թեկնածու Սելահատտին Տեմիրթաշ Նոյեմբեր 2016-էն կը գտնուի Էտիրնէի բանտ: Ան կը մեղադրուի «ահաբեկչական խմբաւորում ստեղծելու եւ ղեկավարելու, յանցախումբի քարոզչութիւն իրականացնելու, յանցանքն ու յանցաւորին գովաբանելու» մէջ: Անոր դէմ հարուցուած քանի մը դատական թղթածրարներով գործիչին կը սպառնայ մինչեւ 142 տարուան ազատազրկում: Ան Թուրքիոյ պատմութեան մէջ առաջին գործիչն է, որ կալանաւորուած ըլլալով հանդերձ պաշտօնապէս նախագահական թեկնածու է:

Տողու Փերինչէքի եւ Թեմէլ Քարամոլլաօղլուի՝ նախագահի ընտրութիւններուն յաղթելու տոկոսը գրեթէ  չէզոքացած է:

Share.

Leave A Reply