ՍՈՒՐԻԱԿԱՆ ՊԱՏՈՒԻՐԱԿՈՒԹԻՒՆԸ ՄԱՍՆԱԿՑԵՑԱՒ «ԱՍԹԱՆԱ 9»Ի ԲԱՆԱԿՑՈՒԹԻՒՆՆԵՐՈՒՆ

0

Երկուշաբթի, 14 Մայիս 2018-ին, Ղազախստանի մայրաքաղաք Ասթանայի մէջ ընթացք առին «Ասթանա 9»ի բանակցութիւնները: Այս ծիրէն ներս, սուրիական պատուիրակութեան նախագահ դոկտ. Պաշշար ալ Ճաաֆարի հանդիպում ունեցաւ Իրանի արտաքին գործոց նախարարի գլխաւոր օգնական Հուսէյն Ճապիրի Անսարիի նախագահած իրանեան պատուիրակութեան հետ:
Հանդիպումին ընթացքին կողմերը քննարկեցին «Ասթանա 9»ի բանակցութիւններուն օրակարգը, իրանեան- սուրիական կողմերուն միջեւ խորհրդակցութիւններու համակարգումն ու անոնց շարունակականութեան ապահովումը՝ լուսարձակի տակ առնելով թրքական իշխանութիւններուն միջազգային պայմանագիրներուն, օրէնքներուն եւ Ասթանայի համաձայնութիւններուն շարունակուող խախտումը:
Ասթանայի մէջ, Ճաաֆարի այլ հանդիպում մը ունեցաւ ռուսական պատուիրակութեան հետ՝ Սուրիոյ մօտ Ռուսիոյ նախագահի յատուկ ներկայացուցիչ Ալեքսանտր Լավրենթիվի նախագահութեամբ:
Ճաաֆարի սուրիական լրատուամիջոցներու ներկայացուցիչներուն հետ զրոյցի մը ընթացքին ըսաւ. «Վաղը մենք պիտի շարունակենք երկկողմ բանակցութիւնները երկու բարեկամ երկիրներուն՝ Ռուսիոյ եւ Իրանի հետ, լրումին պիտի հասցնենք նաեւ մեր խորհրդակցութիւնները թրքական կողմին եւ մասնակից այլ երկիրներու պատուիրակութիւններուն հետ, որպէսզի կարելի ըլլայ եզրափակիչ յայտարարութիւնը բանաձեւել»:

Share.

Leave A Reply

This site uses Akismet to reduce spam. Learn how your comment data is processed.