ՓԱՇԻՆԵԱՆ. «ՏՐԱՄԱԴՐՈՒԱԾ ԵՆՔ ՆՈՐ ԹԱՓ ՀԱՂՈՐԴԵԼՈՒ ՀԱՅ-ՌՈՒՍԱԿԱՆ ՅԱՐԱԲԵՐՈՒԹԻՒՆՆԵՐՈՒՆ»

0

Հայաստանի Հանրապետութեան կառավարութեան տեղեկատուութեան եւ հասարակութեան հետ կապերու վարչութիւնը կը տեղեկացնէ, որ Եւրասիական միջկառավարական խորհուրդի նիստի ծիրէն ներս Սոչիի մէջ տեղի ունեցած է Հայաստանի նորընտիր վարչապետ Նիկոլ Փաշինեանի եւ Ռուսաստանի Դաշնութեան նախագահ Վլատիմիր Փութինի հանդիպումը:

«Յարգելի՛ վարչապետ, յարգելի՛ գործընկերներ, թոյլ տուէք ողջունել ու անգամ մը եւս շնորհաւորել Հայաստանի կառավարութեան ղեկավարի բարձր պաշտօնին ընտրուելու առիթով: Հանդիպումին սկիզբը կը փափաքիմ ըսել, որ Հայաստանը Ռուսաստանի համար տարածաշրջանին մէջ կը հանդիսանայ մօտ գործընկեր եւ դաշնակից, աիկա կը վերաբերի եւ՛ տնտնտեսական փոխգործակցութեան, եւ՛ անվտանգութեան հարցերուն: Դուք գիտէք, որ Ռուսաստանը կը մնայ Հայաստանի առեւտրատնտեսական գլխաւոր գործընկերը, ռուսական ներդրումները Հայաստանի տնտեսութեան մէջ կը կազմէ արտասահմանեան ներդրումներու գրեթէ 35 տոկոսը: Վերջին շրջանին մեզ մօտ կը նկատուի առեւտրաշրջանառութեան 25 տոկոսի աճ, եւ առաջանցիկ ընթացքով կ’աճին ռուսական շուկայ հայկական գիւղատնտեսական ապրանքներու մատակարարման ծաւալները, նախորդ ամիսներուն աճը կազմած է 38 տոկոս: Ասիկա շատ լաւ ուժականութիւն է, եւ յոյս ունիմ, որ կը յաջողինք ոչ միայն պահպանել այն, այլեւ բազմապատկել: Ձեզ յաջողութիւններ կը մաղթեմ կառավարութեան ղեկավարի պաշտօնին եւ յոյսով եմ, որ մեր յարաբերութիւնները կը շարունակեն զարգանալ նոյն ձեւով, ինչպէս եղած է մինչ այժմ: Մենք նոյն աշխուժութեամբ կ’աշխատինք միջազգային ասպարէզի, միջազգային կազմակերպութիւններու մէջ, սկսած Միացեալ Ազգերու Կազմակերպութենէն, ուր Հայաստանը եւ Ռուսաստանը մշտապէս աջակցած են միմեանց, աւարտած մեր տարածաշրջանային կազմակերպութիւններով, եւ՛ անվտանգութեան ոլորտին, եւ՛ տնտեսական զարգացման մէջ», ըսած է Վլատիմիր Փութին:

«Վլատիմի՛ր Վլատիմիրի, շնորհակալութիւն ջերմ խօսքերու համար: Հաճելի է, որ Հայաստանի վարչապետի պաշտօնին ընտրուելէս քանի մը օր ետք առիթը ունիմ հանդիպելու Ձեզի հետ, քանի որ կը կարծեմ, որ կան քննարկուելիք հարցեր, բայց այն, ինչ կը վերաբերի Հայաստանի եւ Ռուսաստանի միջեւ դաշնակցային եւ ռազմավարական յարաբերութիւններուն քննարկման ենթակայ չէ: Սկզբունքով կրնամ վստահեցնել, որ այդ հարցով Հայաստանի մէջ կայ հաւանութիւն, եւ հայ-ռուսական յարաբերութիւններու ռազմավարական կարեւորութիւնը ոչ ոք երբեւէ չէ դրած, եւ կը կարծեմ, չի դներ կասկածի տակ: Մենք տրամադրուած ենք լի ներուժով՝ նոր թափ հաղորդել մեր յարաբերութիւններուն եւ՛ քաղաքական, եւ՛ առեւտրատնտեսական ոլորտներուն մէջ: Յոյս ունինք զարգացնելու մեր յարաբերութիւնները ռազմաթեքնիքական ոլորտի եւ այլ բնագաւառներու մէջ: Այժմ Ռուսաստանէն շատ զբօսաշրջիկներ կը ժամանեն Հայաստան, ինչ որ հաճելի է: Կը կարծեմ՝ Հայաստանը հաճելի կը թուի ռուս զբօսաշրջիկներուն, հայերուն նոյնպէս շատ հաճելի է տեսնել այդքան զբօսաշրջիկներ Երեւանի մէջ: Մենք շատ բարձր կը գնահատենք այն հաւասարակշռուած դիրքորոշումը, որ Ռուսաստան ունէր մեր ներքաղաքական ճգնաժամի ընթացքին եւ կը կարծեմ, որ այդ մէկը շատ կառուցողական դիրքորոշում էր, ինչ որ բարձր կը գնահատուի ոչ միայն մեր կառավարութեան, այլ նաեւ հայ հասարակութեան կողմէն: Թոյլ տուէք անգամ մը եւս շնորհաւորել Ձեզ անցած տօներու առիթով, հետաքրքրական էր հետեւիլ Կարմիր հրապարակին վրայ տեղի ունեցած շքերթին: Մենք շատ տպաւորուած ենք այն ձեռքբերումներով, որոնք այժմ ունի ռուսական ռազմաարդիւնաբերական համալիրը: Եւս մէկ անգամ շնորհակալութիւն այս հնարաւորութեան համար», ըսած է Նիկոլ Փաշինեան:

Share.

Leave A Reply

This site uses Akismet to reduce spam. Learn how your comment data is processed.