ԱՐԹՈՒՐ ԵՂԻԱԶԱՐԵԱՆ. «ԵՐԿԻՐԸ ՑՆՑՈՒՄՆԵՐԷ ԶԵՐԾ ՊԱՀԵԼՈՒ ՀԱՄԱՐ ՀԱՄԱԽՈՀՈՒԹԵԱՆ ՍԿԶԲՈՒՆՔՈՎ ՊԷՏՔ Է ՁԵՒԱՒՈՐՈՒԻ ՓՈԽԱՆՑՄԱՆ ԿԱՌԱՎԱՐՈՒԹԻՒՆԸ»

0

ՀՅԴ ԳՄ անդամ, ռազմական փորձագէտ Արթուր Եղիազարեան 15 Մայիսին մամուլի ասուլիսի մը ընթացքին յայտնեց, որ տարիներով կուտակուած էին բազմաթիւ հարցեր, որոնք յառաջացուցած էին դժգոհութիւն, եւ հանգուցալուծումը ստացաւ այս շարժումով, ինչ որ յանգեցաւ վերջին քսան տարուան քաղաքական ընթացքի որոշակի փոփոխութեան:

«Թէեւ պարոն Փաշինեան յայտարարած է, որ անվտանգութեան առումով քաղաքական ընթացքի փոփոխութիւններ չեն ըլլար, բայց պէտք է արձանագրենք, որ այս բոլորով սկիզբ դրուեցաւ նոր հիմքի եւ այն հարցերը, որոնք տարիներով լուծումներ չէին ստանար, կամ դանդաղ էր ընթացքը, հնարաւորութիւն ստեղծած էր այս շարժումով նոր հանգուցալուծման տանիլ», ըսաւ ան եւ յայտնեց, որ արտաքին քաղաքականութեան փոփոխութիւններ չեն նախատեսուիր, այլ միայն մարտավարութեան փոփոխութիւններ պիտի ըլլան, բայց ներքին հարցերուն գծով փոփոխութիւններ սպասելի են: «Երկիրը ցնցումներէ զերծ պահելու համար համախոհութեան սկզբունքով պէտք է ձեւաւորուի կառավարութիւն, որ կ’անուանեմ անցողիկ կառավարութիւն», ըսաւ ան:

Արթուր Եղիազարեան յայտնեց, որ թէեւ խորհրդարանական ընտրութիւնները օրինական էին եւ տեղամասերուն մէջ կեղծիքներ չեղան, բայց բոլորն ալ կը հասկնային, որ այդ ընտրութիւնները իրական պատկերը չէին արտայայտեր, հակառակ պարագային այս շարժումը չէր ըլլար: Ինչ կը վերաբերի ապագայ ընտրութիւններուն Դաշնակցութեան մասնակցութեան, ան նկատել տուաւ, որ միշտ ալ Դաշնակցութիւնը ինքնուրոյն գիծ որդեգրած է, սակայն ատիկա կանոն չէ: Իսկ անդրադառնալով հայ-թրքական յարաբերութիւններու շուրջ Նիկոլ Փաշինեանի մօտեցումները կիսելուն շուրջ, Արթուր Եղիազարեան ըսաւ, որ վարչապետի հետ բանակցային գործընթացը կը շարունակուի եւ այս շրջանին մօտեցումները կը համընկնին:

«Թուրքիոյ հետ յարաբերութիւնները պէտք է ըլլան առանց նախապայմաններու եւ մեր ամենամեծ զիջումը այն է, որ մենք Ցեղասպանութեան ճանաչումը չենք դներ որպէս նախապայման», ըսաւ ան եւ յայտնեց, որ հայ-թրքական յարաբերութիւնները պէտք է լուծուին փաթեթային տարբերակով: Խօսելով Արցախի բանակցային կողմ ըլլալու մասին, ան ըսաւ, որ փաստ է, Հայաստանը հակամարտութեան կողմ չէ, եւ իրենք կ’ողջունեն Նիկոլ Փաշինեանի մօտեցումը, որ Արցախը պէտք է վերադարձնել բանակցային գործընթաց: «Ասիկա հայկական կողմի որդեգրած գործընթացը պէտք է ըլլայ», շեշտեց ան:

Share.

Leave A Reply