ՍՈՉԻԻ ՄԷՋ ՏԵՂԻ ՈՒՆԵՑԱԾ ԵՏ ԲԱՐՁՐԱԳՈՅՆ ԽՈՐՀՈՒՐԴԻ ՆԻՍՏԻՆ ՄԱՍՆԱԿՑԱԾ Է ՎԱՐՉԱՊԵՏ ՓԱՇԻՆԵԱՆ

0

Սոչիի մէջ 14 Մայիսին տեղի ունեցած է Եւրասիական Տնտեսական բարձրագոյն խորհուրդի նիստը, որուն մասնակցած են անդամ-պետութիւններու ղեկավարները: Նիստին ներկայ էր Հայաստանի Հանրապետութեան վարչապետ Նիկոլ Փաշինեանը.  նիստի մեկնարկին, զինք  գործընկեր պետութիւններու ղեկավարներուն ներկայացուց  Ռուսաստանի նախագահ Վլատիմիր Փութինն ու շնորհաւորեց վարչապետի պաշտօնը ստանձնելու առնչութեամբ: Նիստը մեկնարկած է ԵՏՄ անդամ-երկիրներու ղեկավարներու համատեղ լուսանկարով, որմէ ետք սկսած է սեղմ կազմով հանդիպումը, անոր յաջորդեց մեծաթիւ ներկայացուցչական կազմով հանդիպումը։

Օրակարգը կ’ընդգրկէր 12 հարց։ 2018-ին ԵՏՄ նախագահող երկիրը՝ Ռուսաստանն է։ Քննարկումի առանցքն էր յաւելեալ ջանքերով միասնական շուկայի ապրանքներու ու ծառայութիւններու ստեղծումին զարկ տալ, արտադրական կապերու  համագործակցութիւնը զարգացնել, ֆինանսական քաղաքականութեան մերձեցման գործընթացը բարելաւել: Բացի այդ, Քրեմլին կ’առաջարկէ ստեղծել նոր, արդիւնաւէտ փոխադրամիջոցային շղթաներ: Կողմերը քննարկեցին կազմակերպութեան դիտորդ-պետութեան կարգավիճակի մասին նախագիծի հաստատումը: Տուեալ կարգավիճակը Սոչիի մէջ տրուեցաւ Մոլտովայի Հանրապետութեան:

Առաջնահերթութիւններէն մէկը կը համարուի թուային օրակարգը: Ռուսաստան առաջարկած է միեւնոյն ատեն քանի մը նախագիծեր համացանցային առեւտուրի եւ թուային միջանցքներու ստեղծումի ոլորտին մէջ: Ռուսաստանի նախագահ Փութինի անունով ի պատիւ ԵՏՄ անդամ-պետութիւններու ղեկավարներուն մատուցուեցաւ ոչ պաշտօնական ճաշ: Սոչիի մէջ գումարուող ԵՏՄ գագաթնաժողովը անդամ-պետութիւններու երկրի ղեկավարներու առաջին հանդիպումն է 2018-ին։ ԵԱՏ բարձրագոյն խորհուրդը միութեան բարձրագոյն մարմինն է, որուն կազմի մէջ կը մտնեն անդամ պետութիւններու ղեկավարները: Եւրասիական Տնտեսական Միութիւնը կը գործէ 1 Յունուար 2015-էն, որուն կազմին մաս կը կազմեն Հայաստան, Պելառուս, Ղազախստան, Ղրղզստան եւ Ռուսաստան։

Share.

Leave A Reply

This site uses Akismet to reduce spam. Learn how your comment data is processed.