ԱՐՑԱԽԻ ԱԺ ՓՈԽՆԱԽԱԳԱՀ. «ՓԱՇԻՆԵԱՆԸ ՆՈՐ ՄԱՐԴ ՉԷ․ ՀԱՅԱՍՏԱՆԻ ՈՒ ԱՐՑԱԽԻ ՀԱՄԱՐ ՆՈՐ ՀԵՌԱՆԿԱՐՆԵՐ ԿԸ ԲԱՑՈՒԻՆ»

0

Արցախի Հանրապետութեան Ազգային ժողովի փոխնախագահ Վահրամ Բալայեան «Առաջին լրատուական»ին հետ զրոյցին ընթացքին ըսաւ, որ Արցախի մէջ ապրող իւրաքանչիւր քաղաքացի սրտի տրոփով կը սպասէ, որ Հայաստանի մէջ միշտ այսպիսի դրական տեղաշարժներ ըլլան, Հայաստանի Հանրապետութեան մէջ տեղի ունեցող իւրաքանչիւր դրական զարգացում այս կամ այն ձեւով կ’անդրադառնայ նաեւ Արցախի անվտանգութեան հարցերու լուծումին:

 

Անդրադառնալով այն տեսակէտին, որ մտավախութիւն կայ, որ Հայաստանի մէջ ստեղծուած ներքաղաքական իրավիճակէն օգտուելով՝ Ատրպէյճան կրնայ որոշակի գործողութիւններու եւ սադրանքներու ձեռնարկել, Վահրամ Բալայեան յայտնեց. «Այսօրուան Հայաստանի Հանրապետութեան երիտասարդութեան խանդավառութեան պայմաններուն, Ատրպէյճան այսպիսի քայլի չի դիմեր, որովհետեւ փողոցը գտնուող այն երիտասարդը, որ դուրս եկած է իր հարցերը ներկայացնելու, համոզուած եմ, որ զէնքը ձեռին կը պաշտպանէ նաեւ իր հայրենիքին սահմանները: Ճիշդ այդ պատասխանատուութիւնն է, որ հանրութիւնը իր վրայ վերցուց: Այս տեսանկիւնէն ատրպէյճանցիները յիմար չեն, այդ ամէնը նկատի կ’առնեն եւ կը հաշուարկեն:

 

Ինչ կը վերաբերի Ատրպէյճանի յոխորտանքներուն, անոր խօսքով, ատոնք նոր մօտեցումներ չեն, եւ իրենք ալ լաւ գիտեն, որ այստեղ ապրող իւրաքանչիւր անձ պատրաստ է պաշտպանել իր երկրին սահմանները: «Շատ մը պարագաներու տկարը կը յոխորտայ: Մենք պէտք է այդ ամէնը լսենք եւ նկատի առնենք այն առումով, որ մեր վառօդը միշտ չոր պահենք, բնակչութիւնը պէտք է հոգեբանօրէն պատրաստ ըլլայ, այսպէս ապրելով՝ թշնամին մեզի համար վտանգաւոր չէ:

Ունենալ բանակ, փորձել երկրին տնտեսութիւնը, ժողովրդավարական հիմնարկները զարգացնել. ասիկա այն ճամբան է, որով պէտք է պատասխանել մեր թշնամիներուն»:

Վ. Բալայեան վարչապետի այցելութիւնը Արցախ համարեց խորհրդանշական եւ աւելցուց, որ այսօրուան իշխանութիւնները աշխարհին ապացուցեցին, որ Արցախի հիմնահարցերը իրենց համար գերակայ են: Անոր խօսքով, նոր հեռանկարներ կը բացուին Հայաստանի Հանրապետութեան եւ Արցախի համագործակցութեան համար՝ բոլոր առումներով:

Փոխվարչապետը դրական համարեց Դաւիթ Տոնոյեանի ՀՀ պաշտպանութեան նախարար նշանակումը:

Անոր կարծիքով, անհրաժեշտ է նախ բանակի տեքնիք կատարելագործումը ապահովել:

Բալայեան ընդգծեց, որ Հայաստան պէտք է ունենայ իր սեփական ռազմական արդիւնաբերութիւնը:

Share.

Leave A Reply

This site uses Akismet to reduce spam. Learn how your comment data is processed.