ԱՐԾՈՒԻԿ ՄԻՆԱՍԵԱՆ.  «ԿԸ ՆԵՐԿԱՅԱՑՆԵՆՔ ՏՆՏԵՍԱԿԱՆ ՊԼՈՔԻ ԾՐԱԳԻՐԸ՝ ՅԵՂԱՓՈԽԱԿԱՆ ՄՕՏԵՑՈՒՄՆԵՐՈՎ»

0

Հայաստանի վարչապետ Նիկոլ Փաշինեան 16 Մայիսին Հայաստանի Հանրապետութեան տնտեսական զարգացումի եւ ներդրումներու նախարարութեան ղեկավար աշխատակազմին ներկայացուցած է նորանշանակ նախարար Արծուիկ Մինասեանը եւ իր տարած աշխատանքին համար շնորհակալութիւն յայտնած է նախկին նախարար Սուրէն Գարայեանին։

 

Վարչապետ Նիկոլ Փաշինեան հանդիպումի ընթացքին վերահաստատած է իր յայտարարութիւնը, որ Հայաստանի մէջ մենաշնորհներ պիտի չըլլան: Ան յայտնած է, որ հետեւողական աշխատանք պէտք է տանիլ, որպէսզի անոնք դադրին գոյութիւն ունենալէ:

 

«Ես չափազանց մեծ գոհունակութեամբ կ’արձանագրեմ, որ տնտեսական դաշտը ըստ պահանջի կ’արձագանգէ մեր քաղաքական յայտարարութիւններուն։ Ինծի հասած տեղեկութիւններուն եւ ներկայացուած զեկոյցներուն համաձայն, 8 Մայիսէն ետք, մեր տնտեսութիւնը ոչ միայն ժխտական ազդակներ չի ցուցաբերեր, այլեւ կը ցուցաբերէ դրական ազդակներ, ատիկա կը կարծեմ կապուած է առկայ լաւատեսական մթնոլորտին հետ», ըսած է Նիկոլ Փաշինեան:

 

Վարչապետին խօսքով, պէտք է ակնկալել նաեւ զբօսաշրջութեան ծաւալներու մեծացում, քանի որ միջազգային մամուլին մէջ Հայաստանը կը ներկայացուի դրական շեշտադրումներով: «Մարդիկ լայնօրէն հետաքրքրուած են Հայաստանով ու յոյսով եմ, որ ատիկա կը վերափոխուի գործողութեան ու կ’որոշեն գալ Հայաստան՝ տեսնելու, թէ ինչ երկիր է սա», յայտնած է Նիկոլ Փաշինեան:

 

Ան շնորհակալութիւն յայտնած է Սուրէն Գարայեանին իր տարած աշխատանքի համար՝ յոյս յայտնելով, որ ան նորանշանակ նախարարին ու կառավարութեան կը փոխանցէ իր ձեռք բերած գիտելիքները՝ կապուած այս կամ այն ծրագիրներու հետ: «Կ’ուզեմ շնորհակալութիւն յայտնել նախարարութեան աշխատակիցներուն արդիւնաւէտ աշխատանքին համար, խումբը շատ արհեստավարժ է: Պարոն Մինասեան նոր մարդ չէ համակարգին մէջ, մեծ յոյս կայ, որ ծրագիրները բնականոն հունով կ’ընթանան», ըսաւ Սուրէն Գարայեան՝ աւելցնելով, որ որեւէ պահուն պատրաստ է օժանդակելու իրենց:

 

Նորանշանակ նախարար Արծուիկ Մինասեան շեշտեց, որ վարչապետի կողմէ մատնանշուած հիմնահարցերը պիտի ըլլան իրենց գերատեսչութեան ծրագրային առաջնահերթութիւններն ու ամէնօրեայ գործունէութեան առանցքը: «Հակամենաշնորհային քաղաքականութիւնը որպէս կեդրոնական քաղաքականութեան մաս կ’ըլլայ ամէնօրեայ, բոլոր ծրագրային մօտեցումներուն մէջ: Մեզ կը սպասէ թէժ ու լաւ շրջան, մենք յառաջիկային կը ներկայացնենք տնտեսական պլոքի ծրագիրը, այնտեղ յեղափոխական մօտեցումներ կան, կը խնդրենք, որ աջակցութիւնը ըլլայ ամբողջական», ըսած է Արծուիկ Մինասեան:

Share.

Leave A Reply